एलन मस्क यांचा नवा पोल:युजर्सना विचारले ट्विटर हेडचे पद सोडू का? 1.18 कोटीपैकी 56% युझर्स म्हणाले - हो

ट्विटरचे नवे बॉस एलन मस्क यांनी मायक्रोब्लॉगिंग साइटच्या CEO पदावर राहावे की नाही यावर मत चाचणी सुरू केली आहे. त्यांनी युजर्सना विचारले की त्यांनी त्यांच्या पदावर कायम राहावे की ते सोडून द्यावे? आतापर्यंत बहुतांश युजर्सनी त्यांना पद सोडण्याचा सल्ला दिला आहे. मस्क यांनी या मत चाचणीसोबत लिहिले आहे की, ते या चाचणीच्या निकालांचे पालन करतील.

ही मत चाचणी 19 डिसेंबर 2022 रोजी भारतीय वेळेनुसार पहाटे 4:50 वाजता पोस्ट करण्यात आली आहे. सकाळी 11 वाजेपर्यंत 1.18 कोटींहून अधिक युजर्सनी मतदान केले आहे. 56% लोकांनी 'होय' आणि 44% लोकांनी 'नाही' असे उत्तर दिले. यात मतदानासाठी अजून 5 तास बाकी आहेत.

मत चाचणीच्या मदतीनेच ट्रम्प यांचे ट्विटर अकाउंटही बहाल करण्यात आले

अनेक मुद्द्यांवर निर्णय घेण्यासाठी एलन मस्क अनेकदा ट्विटरवर मत चाचणी म्हणजेच पोलची मदत घेतात. काही दिवसांपूर्वी, मस्क यांनी अमेरिकेचे माजी राष्ट्राध्यक्ष डोनाल्ड ट्रम्प यांचे ट्विटर खाते पुन्हा सुरु करण्यासाठी ट्विटर पोलद्वारे लोकांचे मत मागवले होते. माजी राष्ट्राध्यक्ष ट्रम्प यांचे खाते पूर्ववत करायचे का, असा प्रश्न त्यांनी पोलमध्ये वापरकर्त्यांना विचारला होता. 1.5 कोटींहून अधिक वापरकर्त्यांनी मतदानात भाग घेतला आणि 52% लोकांनी होय उत्तर दिले. या मतदानानंतर मस्कने ट्रम्प यांचे ट्विटर अकाउंट रिस्टोअर केले.

ट्विटर मोठ्या बदलांमधून जात आहे

एलन मस्क यांनी ऑक्टोबरमध्ये ट्विटर 44 अब्ज डॉलर म्हणजेच 3.58 लाख कोटी रुपयांना विकत घेतले होते. ट्विटरचा पदभार स्वीकारल्यापासून एलन मस्क कंपनीत मोठे बदल करण्यात व्यस्त आहेत. काही दिवसांपूर्वी, त्यांनी पहिल्या फेरीत सुमारे 3,700 कर्मचाऱ्यांना कामावरून काढून टाकले होते. सीईओ पराग अग्रवाल यांच्यासह त्यांनी नोकर कपातीची सुरवात केली होती.

इतर प्लॅटफॉर्म विनामूल्य जाहिरात करू शकणार नाही

तत्पूर्वी, रविवारी ट्विटरने जाहीर केले की ते इतर कोणत्याही सोशल मीडिया प्लॅटफॉर्मचा विनामूल्य प्रचार करणार नाही. कंपनीने म्हटले होते की, 'आता आम्ही इतर सोशल प्लॅटफॉर्म आणि त्यांच्या सामग्रीचा प्रचार करण्याच्या उद्देशाने बनवलेले ट्विटर हँडल ब्लॉक करू.

यामध्ये फेसबुक, इंस्टाग्राम, मास्टोडन, टूथ सोशल या प्लॅटफॉर्मचा समावेश आहे. ट्विटरने शनिवारी भारतीय सोशल मीडिया प्लॅटफॉर्म koo अॅपचे खातेही निलंबित केले होते.

पत्रकारांची खाती निलंबित करण्याचा निर्णय बदलावा लागला

ट्विटरने काही पत्रकारांची खातीही ब्लॉक केली होती. संयुक्त राष्ट्रांचे सरचिटणीस अँटोनियो गुटेरेस यांनी शुक्रवारी त्यावर टीका केली. अभिव्यक्ती स्वातंत्र्याच्या दृष्टिकोनातून त्यांनी हे धोकादायक उदाहरण असल्याचे म्हटले होते. तथापि, तीव्र टीका झाल्यानंतर काही तासांतच मस्क यांनी निर्णय मागे घेतला आणि पत्रकारांचे खाते पुन्हा सुरू केले.