गो फर्स्ट संकट:विमान प्रवासी वाढले, पण कंपन्या घटल्या, इंडिगो-टाटांनी व्यापले 81% मार्केट, GoFirst सह अनेक कंपन्या संकटात

देशात विमानसेवेचा व्यवसाय वाढत असला तरी कंपन्यांची संख्या कमी होत आहे. इंडिगो आणि टाटा समूहाची देशांतर्गत मार्गांवर 81% पेक्षा जास्त बाजार हिस्सेदारी आहे. उर्वरित 19% पैकी सुमारे 15% हिस्सा दोन कंपन्यांकडे आहे. यापैकी एक कंपनी गो फर्स्टचे काम बंद झाले असून स्पाइसजेटची स्थितीही चांगली नाही. देशांतर्गत विमान वाहतूक क्षेत्र डुओपॉलीकडे वाटचाल करत असल्याचे तज्ज्ञांचे म्हणणे आहे. म्हणजे दोनच कंपन्या किंवा गट बाजारात वर्चस्व गाजवतील.

देशात 15 एअरलाईन्स आहेत, परंतु केवळ 7 कार्यरत आहेत. यापैकी दोन (GoFirst आणि SpiceJet) खराब आर्थिक स्थितीत आहेत आणि दोन (Air India, Vistara) विलीन होणार आहेत. एलकेपी सिक्युरिटीजचे संशोधन प्रमुख एस रंगनाथन यांच्या म्हणण्यानुसार, “द्वयपक्षी परिस्थिती स्पष्टपणे दिसत आहे. जेट एअरवेजला विमानसेवा सुरू करणे शक्य दिसत नाही.

Akasa ऑपरेट करत आहे, पण केवळ नावालाच. कंपनीकडे 0.5% मार्केट शेअर देखील नाही. 30 एप्रिल रोजी नागरी विमान वाहतूक मंत्री ज्योतिरादित्य सिंधिया यांनी सांगितले होते की, 2,978 फ्लाइट्समध्ये विक्रमी 4,56,082 प्रवाशांनी उड्डाण केले. दोन दिवसांनंतर, 3 मे रोजी GoFirst ने ऑपरेशन बंद केले.

गो फर्स्ट : एअरलाइन्सचा तोटा अडीच पटीने वाढला आहे

कंपनीच्या वेबसाइटनुसार, 2020-21 या आर्थिक वर्षात कंपनीला 1,346.72 कोटी रुपयांचा तोटा झाला होता. 2021-22 मध्ये तो वाढून 1,807.8 कोटी रुपये झाला. या वर्षी एप्रिलपर्यंत GoFirst चे एकूण 11,463 कोटी रुपयांचे कर्ज आहे.

इंडिगो-टाटा समूह : दोन्ही गटांचा ताळेबंद चांगला आहे

एव्हिएशन सल्लागार हर्ष वर्धन म्हणाले, 2008 पासून बहुतेक भारतीय विमान कंपन्या तोट्यात आहेत. जेट एअरवेज, किंगफिशरसारख्या कंपन्या बंद पडल्या. काही विकल्या गेल्या. तथापि, इंडिगोने विस्तार सुरूच ठेवला. टाटा समूहही त्याच मार्गावर आहे. दोन्हींचा ​​​ताळेबंद मजबूत आहे.

हवाई वाहतूक: मार्चच्या तुलनेत एप्रिलमध्ये देशांतर्गत प्रवासी वाढले

हवाई वाहतूक नियामक DGCA च्या आकडेवारीनुसार एप्रिलमध्ये देशांतर्गत हवाई वाहतूक 15% वाढली आहे. गेल्या महिन्यात दररोज 4.3 लाख प्रवाशांनी विमान प्रवास केला. त्या तुलनेत मार्चमध्ये संपलेल्या 2022-23 या आर्थिक वर्षात दररोज सरासरी 3.73 लाख लोकांनी उड्डाण केले.