RBIचा खुलासा:गव्हर्नर म्हणाले- सर्व्हेनंतर घेतला 2000च्या नोटा बाद करण्याचा निर्णय, बदलण्यासाठी पुरेसा वेळ, कालही बँकांत गर्दी नव्हती

आरबीआय म्हणजेच रिझर्व्ह बँक ऑफ इंडियाचे गव्हर्नर शक्तिकांत दास यांनी बुधवारी सांगितले की, 2000 च्या नोटा रद्द करण्याचा निर्णय अनौपचारिक सर्वेक्षणानंतर घेण्यात आला आहे. या नोटांचा सर्रास वापर होत नसल्याचे सर्वेक्षणातून समोर आले आहे. भारतीय उद्योग महासंघ अर्थात CII च्या कार्यक्रमात शक्तिकांत दास यांनी हे सांगितले आहे.

कालही बँकांमध्ये नव्हती गर्दी
2000च्या नोटा बदलण्याबाबत शक्तिकांत दास म्हणाले की, आम्ही यासाठी पुरेसा वेळ दिला आहे, कालही बँकांमध्ये गर्दी नव्हती. लोक 30 सप्टेंबरपर्यंत बँकांमध्ये जाऊन त्यांच्या 2,000 रुपयांच्या नोटा बदलू शकतात किंवा जमा करू शकतात. RBI ने 19 मे रोजी 2000ची नोट चलनातून काढून घेण्याची घोषणा केली होती.

2023-24 साठी जीडीपीचा अंदाज 6.5%
शक्तिकांत दास म्हणाले की, सरकारने 2023-24 साठी 6.5% जीडीपी अंदाज दिला आहे, तर आंतरराष्ट्रीय नाणेनिधी (IMF) अंदाज 5.9% आहे. ते म्हणाले की, सेवा क्षेत्र आणि कृषी क्षेत्राची कामगिरी चांगली झाली आहे. महागाईवर बोलताना दास म्हणाले की, किरकोळ महागाई येत्या काही दिवसांत 4.7 टक्क्यांच्या खाली राहण्याची अपेक्षा आहे, पण महागाईशी आमचे युद्ध अजून संपलेले नाही.

व्याज दर महागाईच्या पातळीनुसार निर्धारित केला जातो
व्याजदरातील वाढ थांबविण्याबाबत दास म्हणाले की, कर्जाच्या व्याजदरातील वाढ रोखणे आपल्या हातात नाही. जमिनीवरील परिस्थिती आणि महागाईची पातळी यावर निर्णय घेतला जातो. सध्या रेपो दर 6.50% आहे. एप्रिलच्या धोरण बैठकीत यात बदल करण्यात आलेला नाही. मध्यवर्ती बँकेच्या चलनविषयक धोरणावर निर्णय घेण्यासाठी पुढील बैठक 6-8 जून रोजी होणार आहे.

जागतिक अर्थव्यवस्था दबावाखाली
जागतिक अर्थव्यवस्थेबद्दल, शक्तिकांत दास म्हणाले की, दीर्घकाळापासून भू-राजकीय आव्हाने, उच्च महागाई दराचा दबाव आहे. चालू वर्षात जागतिक वाढीमध्ये भारताचा वाटा सुमारे 15% असेल.