आपल्या शहरातील ताज्या बातम्या आणि ई-पेपर मिळवा मोफत

डाउनलोड करा
  • Marathi News
  • Dvm originals
  • Patients Without Symptoms Do Not Need Hospital, Now There Will Be 7 Days Home Isolation, Not 14 Days

कोरोनाची नवीन गाइडलाइन:लक्षणे नसलेल्या किंवा सौम्य लक्षणे असलेल्या रुग्णांसाठी आयसोलेशनचा कालावधी आता 14 ऐवजी 7 दिवसांचा, ऑक्सिजन सॅच्युरेशन देखील 94% ऐवजी 93%

12 दिवसांपूर्वी
  • कॉपी लिंक
  • वाचा सविस्तर...

कोणतीही लक्षणे नसलेल्या किंवा सौम्य लक्षणे असलेल्या कोरोना रुग्णांना आता 14 दिवसांऐवजी केवळ 7 दिवस त्यांच्या घरी आयसोलेट किंवा क्वारंटाइन राहावे लागेल. इतकेच नाही तर केंद्रीय आरोग्य मंत्रालयाच्या ताज्या मार्गदर्शक तत्त्वांमध्ये ऑक्सिजन सॅच्युरेशनचे प्रमाण देखील 94% वरून 93% करण्यात आले आहे.

नवीन मार्गदर्शक तत्त्वानुसार, ज्या दिवशी कोरोना चाचणीचा अहवाल पॉझिटिव्ह येईल त्या दिवसापासून 7 दिवसांच्या आयसोलेशन कालावधीची सुरुवात मानली जाईल. जर रुग्णाला आयसोलेशनदरम्यान सलग 3 दिवस ताप आला नाही तर आठव्या दिवसापासून तो कोरोना निगेटिव्ह मानला जाईल. यासाठी कोरोना तपासणीचीही गरज भासणार नाही.

अमेरिका आणि ब्रिटननंतर भारत हा तिसरा मोठा देश आहे ज्याने आयसोलेशनचा कालावधी कमी केला आहे.

देशात ओमायक्रॉन व्हेरिएंटची लागण झालेल्या रुग्णांची संख्या सातत्याने वाढत आहे. गुरुवारी दररोज येणाऱ्या कोरोना रुग्णांची संख्या एक लाखाच्या पुढे गेली. एका अंदाजानुसार, यापैकी सुमारे 60% रुग्णांना ओमायक्रॉनची लागण झाली आहे. ओमायक्रॉनच्या बहुतेक रूग्णांमध्ये गंभीर लक्षणे नसतात, परंतु डेल्टा प्रकाराच्या तुलनेत तो 30 पट वेगाने पसरतो.

लक्षणे नसलेला रुग्ण कोणाला मानले जाईल?

लक्षणे नसलेला रुग्ण म्हणजे ज्याचा अहवाल कोरोना पॉझिटिव्ह आहे, परंतु त्याला कोरोनाची कोणतीही लक्षणे नाहीत. त्याच वेळी, खोलीच्या सामान्य हवेमध्ये ऑक्सिजन सॅच्युरेशन 93% पेक्षा जास्त आहे. पूर्वी ऑक्सिजन सॅच्युरेशनचे हे प्रमाण 94% होते.

सौम्य लक्षणे असलेले रुग्ण कोण असतील?
ज्यांना तापासह किंवा तापाशिवाय अप्पर रेस्पीरेटरी ट्रॅक्टशी संबंधित लक्षणे आहेत. परंतु त्यांना श्वास घेण्यास त्रास होत नाही. याशिवाय, रुग्णाचे ऑक्सिजन सॅच्युरेशन 93% पेक्षा जास्त आहे, अशांना सौम्य लक्षण असलेले रुग्ण समजले जाईल.

रुग्णांना घरी कसे आयसोलेट केले जाईल?

  • जर डॉक्टरांनी लेखी स्वरुपात सांगितले की, रुग्णात लक्षणे नाहीत किंवा असल्यास सौम्य आहेत, तर अशा रुग्णांना होम आयसोलेट केले जाईल.
  • ज्यांच्या घरी रुग्ण तसेच त्यांच्या संपर्कात आलेल्या कुटुंबाला क्वारंटाइन ठेवण्याची व्यवस्था आहे अशा लोकांना घरी आयसोलेट केले जाईल,
  • रुग्णाची काळजी घेण्यासाठी एक व्यक्ती 24 तास तिथे असणे आवश्यक आहे. रुग्णाचा आयसोलेशनचा काळ संपेपर्यंत देखभाल करणारी व्यक्ती आणि डॉक्टर एकमेकांच्या संपर्कात राहतील.
  • नियंत्रण कक्षाचा क्रमांक कुटुंबाकडे राहील आणि आयसोलेट झालेल्या रुग्णाला वेळोवेळी मार्गदर्शन केले जाईल.

वृद्धांना देखील होम आयसोलेट केले जाऊ शकते?

  • 60 वर्षांपेक्षा जास्त वयाच्या संक्रमित आणि गंभीर आजारांनी ग्रस्त लोकांना डॉक्टरांच्या परवानगीनंतरच होम आयसोलेट केले जाईल.
  • एचआयव्ही किंवा कर्करोगाने ग्रस्त असलेल्या रुग्णांना घरी आयसोलेट केले जात नाही, परंतु डॉक्टरांनी उपचारानंतर होम आयसोलेशनची परवानगी दिल्यास ते केले जाऊ शकते.

होम आयसोलेट रुग्णांनी काय करावे आणि काय करू नये?

  • घरातील आयसोलेट रुग्णाला कुटुंबातील इतर सदस्यांपासून दूर राहावे लागेल. विशेषत: वृद्ध आणि बीपी, मधुमेह यांसारख्या गंभीर आजारांनी ग्रस्त असलेल्या आणि कर्करोगाने ग्रस्त असलेल्यांना अंतर ठेवावे लागेल.
  • आरोग्य विभागाने रुग्णासाठी ज्या खोलीची निवड केली आहे, त्याच खोलीत रुग्णाला आयसोलेट ठेवावे लागणार आहे. खोल्या वारंवार बदलता येणार नाही.
  • आयसोलेशनची खोली खुली आणि हवेशीर असावी जेणेकरून ताजी हवा आत आणि बाहेर जाऊ शकेल. रुग्णाने त्याच्या खोलीच्या खिडक्या उघड्या ठेवाव्यात.
  • आयसोलेट झालेल्या रुग्णाला खोलीच्या आतही ट्रिपल लेयर मास्क वापरावा लागेल. जर मास्क 8 तासांनंतर ओला किंवा गलिच्छ झाला तर तो बदलला पाहिजे.
  • रुग्णाची काळजी घेणारी व्यक्ती आणि रुग्ण दोघांनीही N-95 मास्क वापरावा.
  • मास्क टाकून देण्यापूर्वी, त्याचे तुकडे करावे आणि कागदाच्या पिशवीत किमान 72 तास ठेवावा. त्यानंतर मास्क फेकून द्यावा.
  • रुग्णाने विश्रांती घ्यावी आणि शरीरात पाण्याची पातळी कमी होऊ देऊ नये.
  • सावधगिरी बाळगा आणि आपले हात वारंवार धुवा. किमान 40 सेकंद साबणाने हात धुवा आणि सॅनिटायझर वापरा.
  • रुग्णाने त्याची भांडी किंवा इतर वस्तू कुटुंबातील कोणत्याही सदस्यासोबत शेअर करु नका.
  • दारे, स्विच बोर्ड, मास्क आणि हातमोजे यांसारख्या उपयुक्त वस्तू देखभाल करणारी व्यक्ती किंवा रुग्णाने स्वच्छ करत राहावे.
  • रुग्णाने त्याची नाडी आणि ऑक्सिजनची पातळी तपासत राहावी.
  • संक्रमित व्यक्तीने दररोज त्याच्या शरीराचे तापमान तपासावे आणि जर तब्येत बिघडली तर ही बाब ताबडतोब डॉक्टर आणि नियंत्रण कक्षाला कळवावी लागेल.

रुग्णाची देखभाल करणा-या व्यक्तीने काय करावे आणि काय करू नये?

मास्क कसा वापरायचा?

  • रुग्णाची काळजी घेणाऱ्या व्यक्तीने ट्रिपल लेयर मास्क वापरावा.
  • रुग्णाच्या खोलीत जाताना N-95 मास्क घालावा.
  • जेव्हा तुम्ही तोंडावर मास्क घालता तेव्हा त्याला वारंवार स्पर्श करू नका. असे केल्याने संसर्ग पसरू शकतो.
  • जर तुमचा मास्क गलिच्छ किंवा ओला झाला असेल तर तो ताबडतोब बदला.
  • मास्क टाकून देण्यापूर्वी, त्याचे तुकडे करा आणि कागदाच्या पिशवीत किमान 72 तास ठेवा. त्यानंतर मास्क फेकून द्या.
  • मास्क टाकून दिल्यानंतर हात धुवा.
  • हात धुण्यापूर्वी शरीराच्या कोणत्याही भागाला स्पर्श करू नका.

हात स्वच्छ कसे ठेवावेत?

  • जेव्हा तुम्ही तुमचे हात धुता तेव्हा किमान 40 सेकंद साबण आणि पाणी वापरा.
  • साबण उपलब्ध नसल्यास हॅण्डवॉशचा वापर करा.
  • हात धुतल्यानंतर टॉवेल किंवा स्वच्छ कापड वापरा.
  • टॉवेल किंवा कापड ओले असल्यास ते पुन्हा वापरू नका.
  • हातमोजे काढण्यापूर्वी आणि नंतर हात धुवा.
  • हातमोजे गलिच्छ झाल्यावर बदला किंवा धुवा.

रुग्णापासून अंतर कसे ठेवावे?

  • रुग्णाचा श्वास आणि लाळ यासारख्या गोष्टींशी थेट संपर्क टाळा.
  • रुग्णाची काळजी घेताना डिस्पोजेबल हातमोजे वापरा.
  • रुग्णाची भांडी, पाण्याच्या बाटल्या, टॉवेल आणि बेडिंग यासारख्या गोष्टी शेअर करू नका.
  • हातमोजे घालून, रुग्णाची भांडी साबण/डिटर्जंटने स्वच्छ करा.
  • हातमोजे काढल्यानंतर हात नक्की धुवा.
  • रुग्णाचे कपडे किंवा बेडिंग धुताना ट्रिपल लेयर मास्क आणि डिस्पोजेबल हातमोजे वापरा.

रुग्णावर घरी कसे उपचार केले जातील?

  • आयसोलेशन दरम्यान रुग्ण थेट डॉक्टरांच्या संपर्कात असेल आणि तब्येत बिघडल्यास त्वरित रिपोर्ट करेल.
  • जर रुग्णाला आधीच कोणताही आजार असेल तर तो डॉक्टरांचा सल्ला घेतल्यानंतरच औषधे घेऊ शकतो.
  • डॉक्टरांच्या सल्ल्यानुसार, रुग्ण गार्गल करू शकतात आणि दिवसातून तीनदा स्टीम देखील घेऊ शकतात.
  • रुग्णाने सोशल मीडियावर चुकीची माहिती देणे टाळावे.
  • डॉक्टरांचा सल्ला घेतल्याशिवाय औषध, रक्त तपासणी आणि सीटी स्कॅन यासारख्या गोष्टी स्वतः करू नका.

आयसोलेशन दरम्यान डॉक्टरांना भेटणे कधी आवश्यक आहे?

  • तीन दिवसांहून अधिक काळ ताप 100 अंशांपेक्षा जास्त राहिल्यास.
  • श्वास घेण्यास त्रास झाल्यास.
  • रुग्णाची ऑक्सिजन सॅच्युरेशन एका तासात किमान तीन वेळा 93% पेक्षा कमी असल्यास.
  • रुग्णाने एका मिनिटात 24 पेक्षा जास्त वेळा श्वास घेतल्यास.
  • छातीत सतत वेदना किंवा दाब जाणवल्यास.
  • रुग्णाला उठण्यास त्रास होत असल्यास.
  • खूप थकवा आणि स्नायू दुखत असल्यास.

होम आयसोलेशनचा कालावधी कधी संपणार

  • आयसोलेशन दरम्यान 3 दिवस सतत ताप न आल्यास 7 दिवसांत रुग्णाला कोरोना निगेटिव्ह समजले जाईल.
  • अशा प्रकारे लक्षणे नसलेल्या रुग्णांना 7 दिवसांत होम आयसोलेशनमधून डिस्चार्ज देण्यात येत आहे.
  • 7 दिवसांनंतर, होम आयसोलेटेड रुग्णाला कोणत्याही प्रकारची चाचणी करावी लागणार नाही.
बातम्या आणखी आहेत...