दुःखद:प्रसिद्ध गायिका अनुराधा पौडवाल यांचा मुलगा आदित्य पौडवालचे मूत्रपिंड निकामी झाल्यामुळे निधन, वयाच्या 35 व्या वर्षी घेतला अखेरचा श्वास

प्रसिद्ध पार्श्वगायिका अनुराधा पौडवाल यांच्यावर दुःखाचा डोंगर कोसळला आहे. त्यांचा मुलगा आदित्य पौडवाल याचे आज सकाळी निधन झाल्याचे वृत्त आहे. मृत्यूसमयी तो केवळ 35 वर्षांचा होता. गेल्या अनेक महिन्यांपासून तो किडनीच्या आजाराने ग्रस्त होता. तब्येत बिघडल्याने त्याला रुग्णालयात दाखल करण्यात आले होते. मात्र आज सकाळी मूत्रपिंड निकामी झाल्यामुळे त्याचे निधन झाले.

आदित्य पौडवालने आईकडूनच गायनाचे धडे घेतले होते. तोदेखील भजन गात असे. याचवर्षाच्या सुरुवातीला एका मुलाखतीत आदित्यने भक्ती संगीतावर लक्ष केंद्रित करणार असल्याचे सांगितले होते. सर्वात कमी वयाचा संगीत दिग्दर्शक म्हणून लिम्का बुक ऑफ रेकॉर्ड्समध्ये आदित्यचे नाव नोंदवले गेले आहे.