कंगनाच्या शोवर संकट:हैद्राबाद दिवाणी न्यायालयाने कॉपीराइट प्रकरणात 'लॉक अप' या शोवर आणला स्टे, निर्मात्यांवर संकल्पना चोरल्याचा आरोप

कंगना रानोटचा शो 'लॉक अप' स्ट्रीम होण्यापूर्वीच वादात सापडला आहे. हैदराबादच्या दिवाणी न्यायालयाने कंगनाच्या शोवर स्थगिती आणली आहे. 'लॉक अप' या शोवर कॉपीराइट उल्लंघनाचा गुन्हा दाखल करण्यात आला आहे. त्यामुळे न्यायालयाने चौकशीच्या आदेशासह शोवर स्टे लावला आहे.

शोबद्दल सनोबर बेग यांनी याचिका दाखल केली आहे. एकता कपूरने लॉक अप नावाने तयार केलेल्या शोचे कॉपीराइट त्यांच्या प्राइड मीडिया कंपनीकडे आहेत, असे या याचिकेत त्यांनी सांगितले आहे. सुनावणीदरम्यान, न्यायालयाने एकताच्या शोचे सर्व व्हिडिओ क्लिप, ट्रेलर आणि टीझर रेकॉर्डवर घेतले आणि ते तपासले. त्यानंतर न्यायालयाने या शोच्या प्रसारणावर तात्काळ बंदी घालण्याचे आदेश दिले आहेत.

प्रोमो पाहून धक्काच बसला: सनोबर
सनोबर बेग म्हणाले, ही कथा शंतनू रे आणि शीर्षक आनंद यांनी लिहिली होती. 7 मार्च 2018 रोजी कॉपीराईट कायद्यांतर्गत त्याची नोंदणीही करण्यात आली होती. पण जेव्हा मी शोचा प्रोमो पाहिला तेव्हा मला धक्काच बसला. हा शो फक्त आमच्या संकल्पनेशी मिळताजुळता नाही तर त्याची संपूर्ण कॉपी आहे. एवढ्या प्रमाणात कोणीतरी चोरी करू शकते यावर माझा विश्वास बसत नाहीये. कॉपीराइट उल्लंघनाबाबत आम्ही न्यायालयात दाद मागितली असून आम्हाला स्टे ऑर्डर मिळाला आहे.

नक्कीच न्याय मिळेल
सनोबर पुढे म्हणाले, आमच्या टीमने संबंधित कंपन्यांना ही संकल्पना पुढे न नेण्याची विनंती केली होती. पण त्यांनी आमचे ऐकले नाही आणि वेळापत्रकानुसार स्ट्रीम करण्याचा पूर्ण अधिकार असल्याचे सांगत आम्हाला आव्हान दिले. त्यामुळे न्यायालयाकडून तोडगा काढण्याशिवाय माझ्याकडे पर्याय नव्हता. संबंधित सर्व पक्षांना नोटीस देण्यात आली आहे. जर हा शो प्रसारित झाला तर तो न्यायालयाचा अवमान होईल. माझा न्यायव्यवस्थेवर पूर्ण विश्वास आहे आणि मला खात्री आहे की आम्हाला न्याय मिळेल.