बारसं:'जवान'चा दिग्दर्शक एटलीने जाहीर केले बाळाचे नाव, शाहरुख खानच्या नावाशी आहे खास कनेक्शन

तामिळ फिल्म इंडस्ट्रीमधील नव्या दमाच्या सर्वात यशस्वी दिग्दर्शकांपैकी एक म्हणून एटली कुमारला ओळखले जाते. लवकरच एटली 'जवान' या चित्रपटाद्वारे बॉलिवूडमध्ये पदार्पण करत आहे. येत्या 7 सप्टेंबर रोजी हा चित्रपट प्रदर्शित होत असून त्याच्या या चित्रपटात बॉलिवूडचा किंग शाहरुख खान झळकणार आहे. चित्रपटाचे मोशन पोस्टर रिलीज करत नुकतीच चित्रपटाची रिलीज डेट जाहीर करण्यात आली. यासोबतच एटलीने त्याच्या बाळाचे नावदेखील सोशल मीडियावर जाहीर केले आहे.

यावर्षी 31 जानेवारी रोजी एटली आणि त्याची पत्नी प्रिया मोहन एका गोंडस मुलाचे आईबाबा झाले आहेत. या दोघांनी पहिल्यांदाच त्यांच्या बाळाचा फोटो सोशल मीडियावर शेअर केला आहे. यावेळी त्यांनी बाळाचा चेहरा दाखवला नाही पण त्याचे नाव जाहीर केले. विशेष म्हणजे त्याच्या बाळाच्या नावाचे कनेक्शन थेट शाहरुख खानशी आहे.

सिद्धिविनायक मंदिरात बाळासोबत घेतले दर्शन
एटली आणि त्याची पत्नी प्रियाने त्यांच्या मुलासोबतचा पहिला फोटो सोशल मीडियावर शेअर केला आहे. दोघांनी मुलाची झलक दाखवली पण चेहरा हार्ट इमोजीने लपवला. त्यांनी आपल्या मुलाचे नाव "मीर" असे ठेवले आहे. या नावाचा अर्थ अतिशय खास असून याचा थेट संबंध शाहरूख खानशी आहे. या नावाचा अर्थदेखील खूप खास आहे.

शाहरुखच्या वडिलांचे नाव होते मीर
मीर या नावाचा अर्थ प्रमुख, हेड, नेता असा होतो. शाहरुख खानच्या वडिलांचे नाव मीर ताज मोहम्मद खान होते. शाहरुखने एटलीच्या मुलाचे नाव ठेवले असावे, असा अंदाज चाहते बांधत आहेत.

एटली सोशल मीडियावर खास पोस्ट शेअर करत दिली होती गुड न्यूज
एटलीने सोशल मीडियावर एक पोस्ट शेअर करत बाळाच्या जन्माची गोड बातमी चाहत्यांना दिली होती. "आई-वडील होण्याची भावना वेगळीच आहे. आम्हाला पुत्ररत्नाची प्राप्ती झाली आहे. पालकत्वाचा प्रवास आजपासून सुरू होत आहे," असे कॅप्शन त्याने पोस्टला दिले आहे. लग्नाच्या आठ वर्षांनी प्रिया आणि एटली आईबाबा झाले आहेत.

जवळजवळ आठ वर्षे रिलेशनशिपमध्ये राहिल्यानंतर एटली आणि प्रिया यांनी 2014 मध्ये लग्न केले होते. अनेकदा एटलीला त्याच्या रंगावरुन ट्रोल केले जाते, पण त्याने त्याच्या कामातून तो खणखणीत नाणं असल्याचे सिद्ध केले आहे.

कोण आहे एटली?
एटली कुमार हा हिंदीत पदार्पण करणार असला तरी तो तामिळ फिल्म इंडस्ट्रीमधील यशस्वी दिग्दर्शकांपैकी एक आहे. तामिळनाडूमधील मदुरईमध्ये 21 सप्टेंबर 1986 रोजी जन्मलेल्या एटलीचे पूर्ण नाव अरुण कुमार आहे.

एटली तामिळ चित्रपटसृष्टीमध्ये दिग्दर्शनाबरोबरच स्क्रीनप्ले रायटींग आणि निर्माता म्हणून ओळखला जातो. 2013 मध्ये 'राजा राणी' चित्रपटामधून एटलीने तामिळ चित्रपटसृष्टीमध्ये पाऊल ठेवले. फॉक्स स्टार स्टुडिओ आणि ए. आर. मुर्गुदास यांची संयुक्त निर्मिती असणाऱ्या ‘राजा राणी’ने बॉक्स ऑफिसवर दमदार कमाई केली.

‘राजा राणी’ चित्रपटाच्या आधी एटलीने एस शंकर यांच्या एन्थीरान (2010) आणि नानबान (2012) चित्रपटामध्ये सहाय्यक दिग्दर्शक म्हणून काम केले होते. ‘राजा राणी’च्या यशानंतर त्याने थारी (2016), मिरसाल (2017) आणि बिगील (2019) या चित्रपटाचे दिग्दर्शन निर्मिती आणि स्क्रीन प्ले रायटींग केले. दिग्दर्शनानंतर त्याने ‘ए ऑफ अ‍ॅपल प्रोडक्शन’ नावाची कंपनी स्थापन करुन निर्मिती क्षेत्रामध्ये पदार्पण केले.