अम्फन चक्रीवादळ / करीनाने बंगालच्या परिस्थितीबद्दल व्यक्त केली चिंता, फोटो शेअर करुन म्हणाली - 'आपण या सगळ्याचा विचार केला पाहिजे'

  • या चक्रीवादळात सुमारे 72 जणांचा जीव गेला आहे.

दिव्य मराठी

May 22,2020 05:00:57 PM IST

मुंबई. पश्चिम बंगाल आणि ओडिशामध्ये अम्फन महाचक्रीवादळामुळे मोठे नुकसान झाले आहे. यामुळे 72 लोकांचा मृत्यू झाला असून लाखो लोकांना धोक्याच्या ठिकाणांहून सुरक्षित स्थळी हलविण्यात आले आहे. दरम्यान, बंगालची ही वाताहत बघून अभिनेत्री करीना कपूर खाननेही याबद्दल चिंता व्यक्त केली आहे.

शुक्रवारी करीनाने तिच्या इंस्टाग्राम अकाऊंटवरून पश्चिम बंगाल आणि ओडिशाची काही छायाचित्रे शेअर केली असून यात तेथील जनजीवन अम्फन वादळामुळे कसे विस्कळीत झाले हे दिसून येतंय. 'आपण या सगळ्याचा विचार केला पाहिजे', असे कॅप्शन तिने दिले.

करीनाचे जी छायाचित्रे शेअर केली आहेत, त्यामध्ये रस्त्यावर प्रचंड पाणी साचले दिसून येत आहे. अनेक जण डोक्यावर सामान वाहून नेत आहेत. तर काही ठिकाणी झाडे कोसळली आहेत, अनेक माणसे आणि प्राणी जखमी झाले आहेत. या चक्रीवादळात सुमारे 72 जणांचा जीव गेला, तर बरीच पिकेही पूर्णपणे नष्ट झाली आहेत. करीनाशिवाय अनुष्का शर्मा, विक्की कौशल आणि कियारा अडवाणी यांच्यासह अनेक सेलिब्रिटींनी बंगालसाठी प्रार्थना केली आहे.

X