कॅप्टन कूलची नवी इनिंग:महेंद्रसिंग धोनीच्या 'LGM' या तामिळ चित्रपटाचा फर्स्ट लूक समोर, म्हणाला - कौटुंबिक मनोरंजनासाठी सज्ज व्हा!

कॅप्टन कूल महेंद्रसिंग धोनी आणि त्याची पत्नी साक्षी धोनी यांनी आता मनोरंज क्षेत्रात पाऊल टाकले आहे. धोनी आता निर्माता म्हणून चाहत्यांसमोर येत आहे. काही दिवसांपूर्वीच त्याने त्याच्या पहिल्या चित्रपटाची घोषणा केली होती. 'एलजीएम : लेट्स गेट मॅरिड' असे त्याच्या पहिल्यावहिल्या चित्रपटाचे शीर्षक असून नुकतेच त्याचे फर्स्ट लूक पोस्टर रिलीज करण्यात आले आहे. हा एक तामिळ चित्रपट आहे. यापूर्वी जानेवारीमध्ये धोनी आणि साक्षी यांनी या चित्रपटाचे मोशन पोस्टर रिलीज केले होते.

पोस्टर शेअर करताना आनंद वाटतोय – धोनी
महेंद्रसिंग धोनीने या चित्रपटाचे फर्स्ट लूक पोस्टर सोशल मीडियावर शेअर केले आहे. पोस्टर शेअर करताना त्याने लिहिले - "LGM चे फर्स्ट लूक पोस्टर शेअर करताना मला आनंद होत आहे. चांगल्या कौटुंबिक मनोरंजनासाठी सज्ज व्हा! हा चित्रपट सर्वांच्या चेहऱ्यावर हास्य आणेल. धोनी एंटरटेनमेंट प्रायव्हेट लिमिटेड चित्रपटासाठी संपूर्ण टीमला शुभेच्छा देतो!" असे धोनी म्हणाला आहे.

असे आणखी चित्रपट बनवणार - साक्षी धोनी
चित्रपटाची निर्मिती करण्यासोबतच धोनीने चित्रपटाची संकल्पनाही तयार केली आहे. हा कॉमेडी ड्रामा चित्रपट एका आई आणि कपल यांच्यातील ड्रामावर आधारित आहे. चित्रपटाविषयी बोलताना साक्षीने काही दिवसांपूर्वी सांगितले होते की, आम्ही अशा आणखी कथा मोठ्या पडद्यावर आणण्याची तयारी करत आहोत.

'एलजीएम' हा कॉमेडी ड्रामा चित्रपट
या चित्रपटात हरीश कल्याण, इवाना, नादिया आणि योगी बाबूसारखे स्टार्स दिसणार आहेत. रमेश थमिलमनी ‘एलजीएम : लेट्स गेट मॅरीड’मधून दिग्दर्शक म्हणून पदार्पण करणार आहेत. ते या चित्रपटाचे संगीतकारही आहेत. विशेष म्हणजे धोनीचा हा पहिला चित्रपट कमी बजेटमध्ये बनत आहे.

धोनी आणि साक्षी यांच्या प्रोडक्शन हाऊसचे नाव 'धोनी एंटरटेनमेंट प्रायव्हेट लिमिटेड' असे असून साक्षी या प्रोडक्शन हाऊसची व्यवस्थापकीय संचालक आहे. या चित्रपटासह धोनीने 2021 मध्ये एका स्पाय सीरिजची निर्मिती करणार असल्याची घोषणा केली होती. ही देशातील पहिली अ‍ॅनिमेटेड स्पाय सिरीज आहे. या सिरीजचे नाव ‘कॅप्टन 7’ असे आहे. धोनीच्या जर्सीचा नंबरही 7 होता. त्यावरूनच हे नाव घेतले आहे.