खुलासा:लग्नाच्या 19 वर्षांनंतरही आई झाली नाही अमृता सुभाष, स्वतः कारण सांगताना म्हणाली होती - 'म्हणून आम्हाला बाळ नकोय'

मराठी चित्रपट आणि रंगभूमीवर आपल्या दमदार अभिनयाने स्वतःचा वेगळा ठसा उमटवणारी अभिनेत्री म्हणजे अमृता सुभाष. आज अमृताचा वाढदिवस असून तिने वयाची 44 वर्षे पूर्ण केली आहेत. अमृताचे लग्न प्रसिद्ध मराठी दिग्दर्शक आणि अभिनेता संदेश कुलकर्णीसोबत झाले आहे. 2003 मध्ये त्यांचे लग्न झाले. या दोघांच्या लग्नाला 19 वर्ष पूर्ण झाली आहेत. पण अद्याप त्यांना मुलबाळ नाही. काही दिवसांपूर्वी एका मुलाखतीत अमृताने स्वतःचे मूल का होऊ दिले नाही, यावर भाष्य केले होते. अमृता शेवटची वंडर वुमन या चित्रपटात दिसली होती. यात तिने जया नावाच्या गरोदर महिलेची भूमिका साकारली होती. याच चित्रपटाच्या प्रमोशनदरम्यान एका मुलाखतीत तिने खासगी आयुष्यावर भाष्य केले होते.

आम्ही ठरवून बाळ होऊ दिले नाही
अमृता म्हणाली होती, "आता काळ बदलत चालला आहे, असे मला वाटते. आज अशी अनेक जोडपी आहेत ज्यांना मुलं आवडतात पण त्यांनी मूल न होऊ देण्याचा निर्णय घेतला आहे, त्यांच्यापैकीच एक आम्ही आहोत. मुलं आवडणे आणि त्यांना लहानाचे मोठे करणे या दोन भिन्न गोष्टी आहेत. आम्ही दोघेही आपापल्या करिअरमध्ये खूप बिझी आहोत. त्यामुळे आम्ही बाळाला वेळ देऊ शकू का? आणि त्याला न्याय देऊ शकू का? असा विचार आमच्या मनात आला. त्यामुळेच आम्हाला बाळ नको, असे आम्ही ठरवले."

कामावर आमचे प्रेम
पुढे अमृता म्हणाली, "आमच्या कामावर आमचे खूप प्रेम असल्यामुळे ते आम्ही सोडू शकत नाही. तसेच कामावरच्या प्रेमामुळे बाळाकडे दुर्लक्ष करणेही योग्य नाही. आमच्यासारखा विचार करणारे अनेक जण आहेत. परंतु आम्हाला मुलं आवडत नाहीत असा याचा अर्थ होत नाही. आमच्या मित्र-मैत्रिणींच्या मुलांवर मी खूप प्रेम करते. मी माझी कामं करून मला वेळ असेल तेव्हा त्यांच्याशी खेळायला जाऊ शकते. मी करिअरकडे ज्या पद्धतीने पाहते त्यात बाळाचे संगोपन मला करता आले असते का, असा प्रश्न मला पडतो."

काळानुसार पूर्णत्वाची व्याख्या बदलली आहे
अमृता म्हणते, "आता अनेक जण बदलत्या काळानुसार हा विचार करू लागले आहेत. काळानुसार पूर्णत्वाची व्याख्याही बदलली आहे. त्यामुळे एक बाई तिच्या कामामुळे पूर्ण असू शकते किंवा तिच्या असण्याने ती पूर्ण असू शकते. त्याच्यासाठी तिचे लग्न झाले म्हणजे तिचे योग्य झाले, तिला मूल झाले म्हणजे तिचे योग्य झाले, तिचे करिअर झाले म्हणजे तिचे योग्य झाले असे आता राहिलेले नाही," असेही ती सांगते.

वाचा अमृताच्या खासगी आयुष्याविषयी बरंच काही....

सोनाली कुलकर्णीची वहिनी आहे अमृता
अमृताचे लग्न प्रसिद्ध अभिनेत्री सोनाली कुलकर्णीचा भाऊ संदेश कुलकर्णीसोबत झाले आहे. या नात्याने सोनाली अमृताची नणंद होते. संदेश आणि अमृताचे लव्ह मॅरेज आहे. अमृताचा नवरा संदेश स्वत: एक लेखक आणि इंजिनिअरही आहे. तो पूर्वी एका इंजिनीअरिंग महाविद्यालयात ‘इंजिनीअिरग ड्रॉइंग’ हा विषय शिकवायचा. त्याच्या प्रेमात पडल्यावर अमृता एकदा चोरून त्याच्या एका लेक्चरला बसली होती.