मुव्ही रिव्ह्यू:आवर्जुन बघायला हवी मेजर संदीप उन्नीकृष्णन यांची ही कथा, प्रत्येक कलाकार मनात घर करुन जातो

मुंबईतील 26/11 च्या दहशतवादी हल्ल्यात देशासाठी शहीद झालेले मेजर संदीप उन्नीकृष्णन यांची ही कहाणी आहे. पण कथा केवळ त्यांच्या हौतात्म्याची नाही तर ती त्यांच्या आयुष्याची, त्यांच्या आईवडिलांची, त्यांच्या प्रेमाची, त्यांच्या भावनांची आहे. कथेत मेजर संदीप यांचे आयुष्य दाखवण्यात आले आहे, केवळ 26/11 वर हा चित्रपट केंद्रित नाही. हा चित्रपट पाहिल्यानंतर तुम्हाला मेजर संदीप यांचे जीवन जवळून समजून घेण्याची संधी मिळेल. दहशतवाद्यांशी लढताना सैनिक कोणत्या परिस्थितीतून जातो हे तुम्हाला माहीत आहे का? त्या काळात ते फक्त एका आघाडीवर नव्हे तर अनेक आघाड्यांवर लढत असतात आणि त्यांच्यासोबत त्यांचे कुटुंबही लढत असतात.

अभिनय

या चित्रपटातील प्रत्येक कलाकाराने आपल्या वाट्याला आलेल्या भूमिकेला योग्य न्याय दिला आहे. चित्रपटात कलाकार पात्र साकारत आहेत, असे कुठेही वाटत नाही. खरंच ही गोष्ट आपल्या शेजारी घडतेय असे जाणवते. आदिवि शेष मेजर संदीप यांची भूमिका साकारली नाही तर तो ती भूमिका जगला आहे. तुम्ही त्याच्या प्रेमात पडाल. मेजर संदीप यांच्या तरुणपणापासून ते सैन्यात भरती होण्यापर्यंतचे दिवस आणि त्यानंतर शत्रूंचा मुकाबला करण्याचे दृश्य. प्रत्येक फ्रेममध्ये आदिवि मेजर संदीपच वाटत आहे. या चित्रपटानंतर शेषचे स्टारडम प्रचंड वाढणार हे नक्की.

सध्या तो साऊथमध्ये लोकप्रिय आहे पण आता या चित्रपटानंतर तो हिंदी पट्ट्यातील मोठा स्टार बनेल. सई मांजरेकरने तिची व्यक्तिरेखा अतिशय सुंदर आणि नैसर्गिक पद्धतीने साकारली असून दबंग 3 नंतर तिचा अभिनय आणखीनच अप्रतिम असल्याचे पुन्हा एकदा जाणवते. या चित्रपटानंतर तिच्या टॅलेंटचा योग्य वापर होईल, अशी आशा आहे. मेजर संदीपच्या वडिलांच्या भूमिकेत प्रकाश राज आहेत. ते तुम्हाला रडवतात. शहीदाचे वडील जेव्हा आपल्या मुलाची कहाणी सांगतात, तेव्हा हृदय पिळवटून जाते. मेजर संदीप यांच्या आईच्या पात्रात रेवतीचे काम जबरदस्त आहे.

दिग्दर्शन

शशी किरण टिक्का यांनी या चित्रपटाचे दिग्दर्शन केले आहे. ते साऊथचे प्रसिद्ध दिग्दर्शक आहेत आणि या चित्रपटानंतर त्यांची मागणी वाढणार हे नक्की. चित्रपट कसा दिग्दर्शित केला जातो हे त्याच्याकडून अनेकांना शिकता येईल. कथा कशी सांगितली जाते? यावर शशी यांचे प्रभुत्व दिसून येते. कुठेतरी चित्रपट ताणलेला वाटत नाही.

का पहा

पहिले कारण म्हणजे ही आपल्या नायकाची कथा आहे. ही कथा आहे मेजर संदीप उन्नीकृष्णन यांची.. दुसरे म्हणजे हा चित्रपट नसून एक इमोशन आहे. जे अनुभवायला हवे. त्यामुळे हा चित्रपट नक्की बघायला हवा. आम्ही देतोय या चित्रपटाला पाचपैकी चार स्टार.