ठरलं तर मग!:13 मे रोजी राघव चड्ढा आणि परिणीती चोप्राचा साखरपुडा, नवी दिल्लीत होणार सोहळा

अभिनेत्री परिणीती चोप्रा आणि आम आदमी पार्टीचे खासदार राघव चढ्ढा यांनी अद्याप त्यांचे नाते अधिकृत केले नाही, परंतु वृत्तानुसार, दोघांचा लवकरच साखरपुडा होणार आहेत. मिळालेल्या माहितीनुसार, येत्या 13 मे रोजी नवी दिल्लीत साखरपुड्याचा कार्यक्रम होणार आहे. खरं तर दोघे गेल्या महिन्यात 10 एप्रिल रोजी साखरपुडा करणार असल्याची बातमी याआधी आली होती. पण आता ताज्या वृत्तानुसार, या महिन्यात दोघे अधिकृतरित्या आपल्या नात्यावर शिक्कामोर्तब करणार आहेत.

लंच डेटवर एकत्र दिसल्यानंतर डेटिंगच्या अफवा सुरू झाल्या
इंडियन एक्सप्रेसच्या वृत्तानुसार, या महिन्याच्या 13 तारखेला दोघेही नवी दिल्लीत साखरपुडा करणार आहेत. गेल्या महिन्यात परिणीतीची चुलत बहीण प्रियांका चोप्रा तिच्या ‘सिटाडेल’ चित्रपटाच्या प्रमोशनसाठी भारतात आली होती, त्याच वेळी परिणीती आणि राघव चढ्ढा यांची एंगेजमेंट होणार असल्याचीही शक्यता वर्तवली गेली होती. मात्र, तसे झाले नाही. गेल्या महिन्यात मुंबईत लंच डेटवर एकत्र दिसल्यानंतर दोघांच्या डेटिंगच्या चर्चांना उधाण आले होते.

या सेलिब्रिटींनी केली परिणीती-राघवच्या नात्याची पुष्टी
परिणीती आणि राघव अद्याप त्यांच्या नात्याविषयी मौन बाळगून आहेत. पण त्यांच्याशी संबंधित अनेकांनी त्यांच्या नात्याला दुजोरा दिला आहे. अलीकडेच गायक आणि अभिनेता हार्डी संधू याने दोघांच्या लग्नाच्या वृत्ताला दुजोरा दिला. तो म्हणाला की, "मी परिणीतीसाठी खूप आनंदी आहे, मी तिला शुभेच्छा देतो. मी तिचे फोनवर अभिनंदनही केले आहे."

हार्डी संधू आणि परिणीती यांनी 'कोड नेम : तिरंगा' या चित्रपटात एकत्र काम केले आहे. तो म्हणाला, "कोड नेम तिरंगा या चित्रपटाच्या शूटिंगदरम्यान परिणीती आणि माझ्यात लग्नाबद्दल चर्चा झाली होती. तेव्हा ती नेहमी म्हणायची की, जेव्हा मला वाटेल की मला योग्य व्यक्ती सापडली आहे तेव्हाच मी लग्न करेल."

'आप'च्या खासदाराने ट्वीट शेअर करुन दिल्या दोघांना शुभेच्छा
आम आदमी पार्टीचे खासदार संजीव अरोरा यांनी नुकतेच एक ट्वीट शेअर केले. या ट्वीटमध्ये त्यांनी लिहिले, 'मी परिणीती चोप्रा आणि राघव चढ्ढा यांचे मनापासून अभिनंदन करतो. तुम्ही आनंदी राहा. तुम्हाला शुभेच्छा.' या ट्वीटमध्ये संजीव अरोरा यांनी परिणीती आणि राघव यांचा फोटो देखील शेअर केला आहे. संजीव अरोरा यांच्या या ट्वीटने अनेकांचे लक्ष वेधले.

पंजाबमध्ये पहिल्यांदा भेटले दोघे
ई टाझम्सच्या वृत्तानुसार, परिणीती आणि राघव चढ्ढा पंजाबमध्ये पहिल्यांदा भेटले होते. हे दोघे किती दिवसांपासून नात्यात आहेत, याची अद्याप पुष्टी झालेली नाही. परंतु असे म्हटले जाते की, दोघेही जवळपास मागील सहा महिन्यांपासून एकत्र आहेत. राघव हे पंजाबमधील भगवंत मान सरकारचे मुख्य सल्लागार आहेत.

यापूर्वी परिणीतीचे नाव दिग्दर्शक मनीष शर्मासोबत जोडले गेले
राघव चढ्ढा यांच्यापूर्वी परिणीतीचे नाव दिग्दर्शक मनीष शर्मासोबत जोडले गेले होते. मनीष हा शाहरुख खानचा 'फॅन', परिणीतीचा पहिला चित्रपट 'लेडीज वर्सेस रिकी बहल' आणि 'शुद्ध देसी रोमान्स' यांसारख्या चित्रपटांच्या दिग्दर्शनासाठी ओळखला जातो. रिपोर्ट्सनुसार, परिणीती आणि मनीषला वेगळे होऊन एक वर्ष झाले आहे.