DID विजेत्याने सांगितली आपबिती:कन्नड येत नसल्याने कोरिओग्राफर सलमान युसूफला विमानतळ अधिकाऱ्याकडून त्रास

प्रसिद्ध डान्सर, कोरिओग्राफर आणि डान्स इंडिया डान्स सीझन 1 चा विजेता सलमान युसूफ खानने बुधवारी बंगळुरू विमानतळावर घडलेला एक प्रकार सांगितला आहे. अलीकडेच सलमान बंगळुरुहून दुबईला जाण्यासाठी केम्पेगौडा आंतरराष्ट्रीय विमानतळावर पोहोचला होता. मात्र आपल्याला कन्नड येत नसल्याने इमिग्रेशन अधिकाऱ्याने अपमान केला, असा आरोप सलमानने केला आहे.

सलमानसोबत विमानतळावर घडला अपमानास्पद प्रकार
सलमानने त्याच्या इन्स्टाग्रामवर एक व्हिडिओ शेअर केला आहे. व्हिडिओच्या कॅप्शनमध्ये केम्पेगौडा आंतरराष्ट्रीय विमानतळाला टॅग करत त्याने लिहिले, “मी केम्पेगौडा आंतरराष्ट्रीय विमानतळावरुन दुबईला जात असताना एका इमिग्रेशन अधिकाऱ्याला भेटलो, तो माझ्याशी कन्नडमध्ये बोलत होता. मी माझ्या मोडक्या तोडक्या कन्नडमध्ये आपल्याला भाषा समजते पण बोलता येत नाही, असे म्हणालो. तरीही तो माझ्याशी फक्त कन्नडमध्येच बोलत होता आणि मला माझा पासपोर्ट दाखवत तुझा आणि तुझ्या वडिलांचा जन्म बंगळुरूमध्ये झाला आहे आणि तुला कन्नड बोलता येत नाही, असे म्हणाला. तसेच मी तुमच्यावर संशय घेऊ शकतो असेही म्हणाला."

सलमान पुढे म्हणाला, "त्याच्या बोलण्याचा मला याचा राग आला आणि मी त्याला विचारले की, कोणत्या कारणाने तू माझ्यावर संशय घेऊ शकतो. मी बंगळुरूत जन्मलो असलो तरी मी कुठेही प्रवास करू शकतो. मी सऊदी अरबमध्ये लहानाचा मोठा झालो. (नोट - मला कन्नड भाषा येत नाही. माझे शालेय शिक्षण परदेशात झाले आहे. मला जितकी कन्नड भाषा येते, ती मी माझ्या मित्रांकडून शिकलोय.) माझी मातृभाषा हिंदी आहे आणि मी ती बोलू शकतो. आपल्या पंतप्रधानांना देखील कन्नड भाषा येत नाही," असे आपण त्या अधिकाऱ्याला बोलल्याचे सलमानने सांगितले.

विमानतळावरील कर्मचाऱ्यांनी मदत केली नाही
सलमानने आपल्या पोस्टमध्ये पुढे सांगितले की, मी या प्रकरणी तक्रार करण्यासाठी विमानतळावर गेलो असता कोणत्याही प्रकारची मदत मिळाली नाही. उलट तुम्हाला ऑनलाइन तक्रार करावी लागेल असे सांगण्यात आले. मला भाषेवरून इतका त्रास दिला, तर इतरांचा विचार करा, असे तो म्हणाला.

कोण आहे सलमान युसूफ खान?

सलमान युसूफ खान हा 'डान्स इंडिया डान्स'चा विजेता होता. त्याने 'एबीसीडी' या चित्रपटात काम केले आहे. त्याने 'झलक दिखला जा' सीझन चारमध्ये कोरियोग्राफर याना गुप्तासोबत काम केले. शिवाय 'खतरों के खिलाडी' या शोमध्येही सलमान झळकला होता.