दु:खद निधन:दाक्षिणात्य अभिनेते शरत बाबू यांचे वयाच्या 71व्या निधन, 220 हून अधिक चित्रपटांत साकारल्या भूमिका

तेलुगू आणि तामिळ चित्रपटसृष्टीतील उत्कृष्ट अभिनेत्यांपैकी एक असलेले शरत बाबू यांचे वयाच्या 71व्या वर्षी निधन झाले. गेल्या महिन्यात त्यांना हैदराबाद येथील रुग्णालयात दाखल करण्यात आले होते. ते व्हेंटिलेटरवर होते. त्यांनी त्यांच्या कारकिर्दीत 220 हून अधिक चित्रपटांमध्ये काम केले.

त्यांचा जन्म 31 जुलै 1951 रोजी आंध्र प्रदेशमध्ये झाला. त्यांचे खरे नाव सत्यम बाबू दीक्षित होते. आज म्हणजेच सोमवारी शरत बाबू यांच्या कुटुंबीयांनी त्यांच्या निधनाला दुजोरा दिला.

महिनाभरापासून रुग्णालयात

मिळालेल्या माहितीनुसार, त्याच्या अवयवांनी काम करणे बंद केले होते (मल्टिपल ऑर्गन फेल्युअर). त्यांची प्रकृती खालावल्याने त्यांना प्रथम बंगळुरू येथील खासगी रुग्णालयात दाखल करण्यात आले. यानंतर त्यांना हैदराबाद येथील एआयजी रुग्णालयात दाखल करण्यात आले होते.

येथे त्यांच्यावर महिनाभराहून अधिक काळ उपचार सुरू होते. यापूर्वी 3 मे रोजी त्यांच्या निधनाची अफवा कानावर आली होती. मात्र, त्यानंतर त्यांच्या कुटुंबीयांनी ही बातमी चुकीची असल्याचे सांगितले होते.

अनेक भाषांमधील चित्रपटांत काम
शरत बाबू यांनी 1973 मध्ये तेलुगू चित्रपट राजा राजाममधून पदार्पण केले. त्यांनी आपल्या संपूर्ण कारकिर्दीत तेलुगू, तमिळ, मल्याळम आणि कन्नड चित्रपटांमध्ये काम केले. त्यांना प्रतिष्ठेचा 'नंदी पुरस्कार'ही मिळाला होता. नुकतेच ते पवन कल्याणच्या 'वकील साब' या चित्रपटात दिसले होते. त्यांनी रजनीकांत आणि कमल हासन यांच्यासोबत अनेक चित्रपटांमध्ये काम केले आहे.