'पठाण'चा नवा विक्रम:'या' दिवशी बांगलादेशात प्रदर्शित होणार 'पठाण', तब्बल 52 वर्षांनंतर पहिल्यांदाच प्रदर्शित होणार चित्रपट

बॉलिवूडचा बादशाह शाहरुख खानचा 'पठाण' हा चित्रपट यावर्षी जानेवारी महिन्यात प्रेक्षकांच्या भेटीला आला. बॉक्स ऑफिसवर या चित्रपटाने कमाईचे अनेक नवीन विक्रम प्रस्थापित केले. आता या चित्रपटाने नवा विक्रम रचला आहे. बांगलादेश स्वतंत्र झाल्यानंतर तिने प्रदर्शित होणारा 'पठाण' हा पहिलाच हिंदी चित्रपट ठरला आहे. तब्बल 52 वर्षांनंतर तिने एखादा भारतीय चित्रपट प्रदर्शित होतोय.

बांगलादेश फाळणीनंतर प्रदर्शित होणारा पहिला हिंदी चित्रपट शाहरुखचा 'पठाण'
सिद्धार्थ आनंद दिग्दर्शित 'पठाण' हा चित्रपट ब्लॉकबस्टर ठरला आहे. आता शाहरुखचा 'पठाण' बांगलादेश फाळणीनंतर तिथे प्रदर्शित झालेला पहिला हिंदी चित्रपट ठरणार आहे. 12 मे 2023 रोजी हा चित्रपट बांगलादेशात प्रदर्शित होणार आहे.

आम्हाला आनंद आहे की, 'पठाण' बांगलादेशात प्रदर्शित होतोय : YRF
इंटरनॅशनल डिस्ट्रिब्युशनचे उपाध्यक्ष नेल्सन डिसुझा म्हणाले, "चित्रपट ही नेहमीच राष्ट्र, वंश आणि संस्कृती यांच्यात एकीकरण करणारी शक्ती आहे. चित्रपट हे माध्यम सीमा ओलांडते, लोकांमध्ये चेतना जागृत करते आणि एकत्र आणण्यात महत्त्वपूर्ण भूमिका बजावते. जगभरात अद्वितीय व्यवसाय कमाविणाऱ्या 'पठाण'ला आता बांगलादेशातील प्रेक्षकांचे मनोरंजन करण्याची संधी मिळणार आहे, याचा आम्हाला आनंद वाटतो".

बांगलादेशात शाहरुखची मोठी फॅन फॉलोइंग
नेल्सन डिसुझा पुढे म्हणाले, "पठाण' हा बांगलादेशात 1971 नंतर प्रदर्शित होणारा पहिला हिंदी चित्रपट ठरला आहे आणि अधिकाऱ्यांच्या निर्णयाबद्दल आम्ही त्यांचे आभार मानतो. शाहरुख खानचे बांगलादेशात जबरदस्त फॅन फॉलोइंग आहे. त्यामुळे आता बांगलादेशातही हा चित्रपट चांगलाच धुमाकूळ घालणार आहे".

व्हायआरएफच्या स्पाय युनिव्हर्सचा सर्वाधिक कमाई करणारा 'पठाण'
'पठाण' हा व्हायआरएफच्या स्पाय युनिव्हर्सचा सर्वाधिक कमाई करणारा चित्रपट ठरला. ज्यामध्ये ‘एक था टायगर’, ‘टायगर जिंदा है’ आणि ‘वॉर’सारख्या ब्लॉकबस्टर चित्रपटांचा समावेश आहे. 'पठाण' या चित्रपटाच्या माध्यमातून शाहरुखने चार वर्षांनी रुपेरी पडद्यावर कमबॅक केले होते. या चित्रपटातील शाहरुखचा अभिनय, गाणी सर्वकाही प्रेक्षकांच्या पसंतीस उतरले.

तगडी स्टारकास्ट असलेला 'पठाण'

'पठाण' या चित्रपटात शाहरुखसह दीपिका पादुकोण, जॉन अब्राहम, डिंपल कपाडिया आणि आशुतोष राणा महत्त्वाच्या भूमिकेत आहेत. तसेच बॉलिवूडचा भाईजान सलमान खानची झलकदेखील या चित्रपटात प्रेक्षकांना पाहायला मिळत आहे.

'पठाण' सर्वाधिक कमाई करणारा हिंदी चित्रपट
'पठाण' हा जगात सर्वाधिक कमाई करणारा पहिला बॉलिवूड चित्रपट ठरला आहे. या चित्रपटाने ग्लोबल बॉक्स ऑफिसवर तब्बल 1050 कोटींची कमाई केली होती. तर भारतात या चित्रपटाने 545 कोटी कमावले होते. तर ओव्हरसीजमध्ये 396.02 कोटी इतके कलेक्शन केले होते.

'पठाण'ने मोडला 'बाहुबली 2'चा रेकॉर्ड
या चित्रपटाने 'बाहुबली 2'चा 6 वर्षे जुना रेकॉर्ड अवघ्या 38 दिवसांत मोडला. 'बाहुबली 2'च्या हिंदी व्हर्जनने 510.90 कोटी लाइफटाइम कलेक्शन केले होतेते. 'बाहुबली 2' हा 500 कोटी क्लबमध्ये प्रवेश करणारा पहिला चित्रपट होता. 'पठाण' हा चित्रपट रिलीजपूर्वी वादात सापडला होता. 'बेशरम रंग' या गाण्यात दीपिकाने घातलेल्या भगव्या रंगाच्या बिकिनीमुळेही वाद निर्माण झाला होता.