'सिर्फ एक बंदा काफी है'वरुन वाद:मनोज बाजपेयी म्हणाले - बॉयकॉट ट्रेंडने काहीच फरक पडत नाही.. उलट त्याचा फायदा मलाच होईल

अभिनेते मनोज बाजपेयी यांचा आगामी 'सिर्फ एक बंदा काफी है' हा चित्रपट प्रदर्शनापूर्वीच वादाच्या भोवऱ्यात सापडला आहे. आता या वादावर मनोज यांची प्रतिक्रिया आली आहे. मनोज यांनी सांगितल्यानुसार, विरोध होईल किंवा बॉयकॉट करता येईल, असे चित्रपट ते करतच नाहीत. बॉयकॉट ट्रेंडने काहीच फरक पडत नाही, असेही ते म्हणाले आहेत.

मनोज यांच्या म्हणण्यानुसार, त्यांच्या चित्रपटावर बहिष्कार टाकला तरी त्यांचे काही नुकसान होणार नाही, उलट त्यांच्या चित्रपटाला त्याचा फायदाच होईल. या चित्रपटाचा धर्माशी संबंध जोडण्याची गरज नसल्याचे त्यांनी म्हटले आहे. मुलांच्या सुरक्षेच्या मुद्द्यावर हा चित्रपट बनवण्यात आला आहे. यात वादग्रस्त काहीही नाही, असेही त्यांनी स्पष्ट केले आहे.

या चित्रपटाबद्दल लोकांना सांगणे महत्त्वाचे आहे - मनोज
आपल्या चित्रपटाबद्दल बोलताना मनोज यांनी इंडियन एक्सप्रेसला सांगितले, 'हा चित्रपट बनवून आम्ही कोणतेही धाडसी काम केलेले नाही. लोकांना सांगण्याची गरज असलेला हा चित्रपट आहे. माझ्यासाठी हा वादग्रस्त नसून सुरक्षेचा मुद्दा आहे. पीडित मुलीने नरकयातना सहन केल्या आहेत. तरीही ती खंबीरपणे उभी राहिली. मोठे वकील तिच्या विरोधात उभे राहिले. असे असूनही तिने हिंमत सोडली नाही. आम्हाा सगळ्यांना त्या मुलीकडून खूप काही शिकायला मिळाले.'

लोक धर्माच्या नजरेतून हा चित्रपट का पाहत आहेत, हे समजत नसल्याचे मनोज यांनी सांगितले. ते म्हणाले, 'आई-वडिलांच्या स्वप्नाचा चुराडा करणाऱ्या गुन्ह्याबद्दल आपण बोलत आहोत. मुलीचे भविष्य पूर्णपणे उद्ध्वस्त केले. एखाद्या लहान मुलाला धर्म आणि श्रद्धा काय समजणार. जर प्रश्न आपल्या मुलाचा असेल तर इतर कोणावरही विश्वास ठेवू नये. असे शिकारी सर्वत्र आहेत.'

'एक वडील म्हणूनही मला एका विशिष्ट काळानंतर स्वतःच्या मुलीच्या खोलीत जाताना दार ठोठावून आत जायला सांगितले जाते. जर आपण आपल्या मुलांना या जगात आणले असेल तर त्यांचे संरक्षण करणे ही आपली जबाबदारी आहे,' असेही मनोज म्हणाले.

पुढे मनोज म्हणाले की, त्यांनी दिल्लीत रस्त्यावरील मुलांसोबत काम केले आहे. ते खूप शोषणातून जातात. या विषयावर चित्रपट बनत असल्याचे मला कळल्यावर हा विषय चांगल्या पद्धतीने दाखवून जनतेला संदेश दिला जाईल, असे आम्हाला वाटले. त्या गरीब मुलीच्या संघर्षाची कथा व्यर्थ जाऊ नये असे आम्हाला वाटत होते.'

'लोक मला बॉयकॉट करतील असे मला वाटत नाही'
मनोज यांना प्रश्न विचारण्यात आला की, सध्या सोशल मीडियावर बॉयकॉट हा ट्रेंड झाला आहे. त्यामुळे त्यांना याची भीती वाटते का? याचे उत्तर देताना मनोज म्हणाले, 'मला वाटत नाही की लोक मला बॉयकॉट करतील. गेल्या 30 वर्षांपासून मला खूप प्रेम मिळाले आहे.'

ते पुढे म्हणाले, 'लोकांचा विश्वास जिंकण्यात मला यश आले आहे. सनसनाटी निर्माण करण्यासाठी मी काहीही करणार नाही हे प्रेक्षकांना माहीत आहे. मी कोणाच्याही धर्माची बदनामी करणार नाही, हेही त्यांना माहीत आहे.'

आता जाणून घ्या नेमका वाद काय आहे?
'सिर्फ एक बंदा काफी है' या चित्रपटाचा ट्रेलर 8 मे रोजी प्रदर्शित झाला. खरं तर, चित्रपटात एका 16 वर्षांच्या मुलीवर एका भोंदूबाबाने बलात्कार केल्याचे दाखवण्यात आले आहे. हा चित्रपट सत्य घटनांनी प्रेरित असल्याचे डिस्क्लेमरमध्ये स्पष्टपणे लिहिले आहे. चित्रपटात दिसणाऱ्या भोंदूबाबाचा लूक आसारामसारखा आहे.

ट्रेलर रिलीज झाल्यानंतर आसाराम बापू ट्रस्टने चित्रपटाच्या निर्मात्यांना नोटीस बजावली होती. ट्रस्टच्या वकिलांनी चित्रपटाचे प्रदर्शन आणि प्रमोशनवर बंदी आणण्याची मागणी केली आहे. नोटीस जारी करताना बापूच्या वकिलाने म्हटले की, हा चित्रपट आक्षेपार्ह आणि त्याच्या अशिलाची बदनामी करणारा आहे, त्यामुळे त्याची प्रतिष्ठा खराब होऊ शकते. तसेच त्याच्या भक्तांच्या आणि अनुयायांच्या भावना दुखावल्या जाऊ शकतात. हा चित्रपट 23 मे रोजी OTT प्लॅटफॉर्म ZEE 5 वर रिलीज होणार आहे. मनोज बाजपेयी यांनी या चित्रपटात आसाराम विरोधात खटला लढणारे वकील पी सी सोलंकींची भूमिका साकारत आहेत. वास्तविक जीवनातही आसारामचा खटला पीसी सोलंकी नावाच्या वकिलाने लढवला होता.

आसाराम जन्मठेपेची शिक्षा भोगत आहे
आसारामचे गुन्हे 2013 मध्ये पहिल्यांदा उघडकीस आले होते. ऑगस्ट 2013 मध्ये एका अल्पवयीन मुलीने आसारामवर बलात्काराचा गुन्हा दाखल केला होता. आसारामने आपल्या मुलीवरील भूतबाधा दूर करण्याच्या नावाखाली तिच्यावर बलात्कार केल्याचा आरोप तिच्या पालकांचा आहे.

पीडित मुलगी 15 ऑगस्ट 2013 रोजी आसारामच्या जोधपूर आश्रमात गेली होती. त्याच दिवशी आसारामने त्या अल्पवयीन मुलीवर बलात्कार केला. 20 ऑगस्ट 2013 रोजी पीडितेच्या पालकांनी एफआयआर दाखल केला. पाच वर्षांनंतर एप्रिल 2018 मध्ये जोधपूर न्यायालयात आसारामला दोषी ठरवत त्याला जन्मठेपेची शिक्षा सुनावली होती.