सुष्मिता सेनला हृदयविकाराचा झटका:अँजिओप्लास्टी सर्जरी झाली, पोस्ट शेअर करत म्हणाली- 'माझं हृदय खरंच खूप मोठं आहे'

बॉलिवूड अभिनेत्री सुष्मिता सेनच्या तब्येतीबाबत मोठी माहिती समोर आली आहे. सुष्मिताला स्वत: पोस्ट शेअर करत ही माहिती दिली आहे. सुष्मिताला दोन दिवसांपूर्वी हृदयविकाराचा झटका आला होता. तिच्यावर अँजिओप्लास्टी सर्जरी करण्यात आल्याचेही तिने सांगितले आहे. सुश्मिताला हृदयविकाराचा झटका आला हे ऐकूनच चाहते चिंतेत पडले आहेत.

सोशल मीडियावर वडिलांसोबतचा फोटो केला शेअर
सुष्मिताने तिचे वडील सुबीर सेन यांच्यासोबतचा फोटो इन्स्टाग्राम अकाउंटवर शेअर केला आहे. सोबतच गेल्या काही दिवसांत नेमके काय काय घडले याबद्दल तिने लिहिले आहे.

सुष्मिताने तिच्या कॅप्शनमध्ये म्हटले आहे की, 'आपल्या हृदयाची काळजी घ्या. तुमच्या चांगल्या आणि वाईट काळात तुमचे हृदय तुमची साथ देणार आहे. मला दोन दिवसांपूर्वी हृदयविकाराचा झटका आला होता. त्यानंतर अँजिओप्लास्टीही करण्यात आली. स्टेंट टाकण्यात आले आहे. आता माझे हृदय सुरक्षित आहे. आणि एक महत्त्वाचे म्हणजे कार्डियोलॉजिस्टने हे कन्फर्म केले आहे की, माझं हृदय (मन) खरंच खूप मोठं आहे'.

सुश्मिताची अचानक तब्येत बिघडली होती. त्यानंतर तिला तातडीने रुग्णालयात दाखल करण्यात आले होते. एंजियोप्लास्टी झाल्यानंतर आता तब्येत बरी असल्याचेही तिने या पोस्टमध्ये म्हटले आहे.

सुष्मिता बॉलिवूडमधील सर्वात फिट अभिनेत्रींपैकी एक
सुष्मिता सेन 47 वर्षांची आहे. बॉलिवूडच्या फिट अभिनेत्रींमध्ये तिची गणना होता. सुष्मिता कायम सोशल मीडियावर स्वतःचे फिटनेस व्हिडिओ शेअर करत असते.. सुष्मिताच्या आजारपणाबद्दल समजताच चाहते आणि फिल्म इंडस्ट्रीशी संबंधित लोक ती लवकरात लवकर बरी व्हावी यासाठी तिला शुभेच्छा देत आहेत.

मिस युनिव्हर्स ठरल्यानंतर सिनेसृष्टीकडे वळवला मोर्चा
1994 मध्ये सुष्मिता सेनने मिस युनिव्हर्सचा किताब जिंकला होता. यानंतर तिच्याकडे चित्रपटांची रांग लागली होती. सुष्मिताने आपल्या चित्रपटातून सिनेसृष्टीत पाऊल ठेवावे, अशी अनेक बड्या निर्मात्यांची इच्छा होती. सुष्मिताने त्या काळातील सर्वात यशस्वी दिग्दर्शक महेश भट्ट यांच्या 'दस्तक' या चित्रपटातून सिनेसृष्टीत एन्ट्री घेतली. सुष्मिताचा चित्रपट प्रवास इथून सुरू झाला.

2010 पासून चित्रपटांपासून दूर, 10 वर्षांनी ओटीटीद्वारे कमबॅक
सुष्मिताचा शेवटचा चित्रपट 2010 मध्ये आलेला 'दुल्हा मिल गया' हा होता. यानंतर सुष्मिता चित्रपटांपासून लांब झाली होती. याकाळात तिने आपला जास्तीत जास्त वेळ आपल्या दोन्ही मुलींना दिला. 2020 मध्ये सुष्मिताने 'आर्या' या वेब सीरिजद्वारे अभिनयाच्या दुनियेत पुनरागमन केले. 2021 मध्ये या वेब सिरीजचा दुसरा सीझन आर्या- 2 आला होता. आता आर्या 3 देखील फ्लोअरवर आहे. लवकरच सिरीजचा तिसरा भाग प्रेक्षकांच्या भेटीला येणार आहे.

हृदयविकार हा जरी वृद्धांसाठी धोका मानला जात असला तरी आता तरुणही हृदयविकाराच्या विळख्यात सापडत आहेत. डब्ल्यूएचओ आणि अमेरिकन जर्नलच्या अभ्यासानुसार, 30 ते 40 वयोगटातील तरुणांमध्ये हृदयाच्या समस्यांमध्ये 13 टक्के वाढ झाली आहे. तर हृदयविकार हे जगातील आजारांमुळे होणाऱ्या मृत्यूचे सर्वात मोठे कारण आहे. दुसरीकडे भारतातही हृदयविकाराचे प्रमाण झपाट्याने वाढत आहे. गेल्या तीन दशकांत भारतात हृदयविकाराने मृत्यूमुखी पडणाऱ्यांचे प्रमाण दुप्पट झाले आहे. वाचा सविस्तर...

हृदयरोग हे अमेरिकेसह भारतातील पुरुष आणि महिलांच्या मृत्यूचे प्रमुख कारण आहे. स्त्रिया पुरुषांपेक्षा अधिक वेळा हृदयविकाराच्या लक्षणांकडे दुर्लक्ष करतात असे अभ्यास सांगतो. स्त्रियादेखील मदत घेण्यास कचरतात. कारण त्यांच्यात पुरुषांपेक्षा सौम्य लक्षणे असतात. म्हणून जेव्हा त्या हॉस्पिटलमध्ये पोहोचतात तेव्हा डॉक्टर त्यांच्या लक्षणांना कमी लेखतात किंवा उपचारांना उशीर करतात. खरं तर पुरुष/स्त्रियांमध्ये हृदयविकाराचे एक सामान्य लक्षण म्हणजे छातीत दुखणे किंवा अस्वस्थता. वाचा सविस्तर..