आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

बिग अनाउंसमेंट:'रंजना'मधून उलगडणार अभिनेत्री रंजना देशमुख यांचा जीवनप्रवास, 'या' दिवशी रिलीज होणार चित्रपट

7 महिन्यांपूर्वी
  • कॉपी लिंक
  • रंजना यांचा जीवनप्रवास चित्रपट रूपात मोठ्या पडद्यावर पहायला मिळणार आहे.

मराठी सिनेसृष्टीतील बऱ्याच अभिनेत्रींनी आपल्या संवेदनशील अभिनयानं रसिकांच्या मनावर आपला वेगळा ठसा उमटवण्यात यश मिळवलं आहे. आपल्या चौफेर अदाकारीनं ब्लॅक अँड व्हाईटचा जमानाही रंगीन बनवणाऱ्या अभिनेत्रींमध्ये रंजना देशमुख यांचं नाव आघाडीवर आहे. देखणा चेहरा, अभिनयातील विविधता, सुरेख संवादशैली आणि मनमोहक नृत्याच्या बळावर रंजना यांनी एक काळ गाजवत प्रेक्षकांवर जणू आपल्या सौंदर्याची मोहिनीच केली होती. त्या काळातील आघाडीच्या दिग्दर्शकांच्या चित्रपटात काम करताना अभिनेत्यांसोबत जोड्या जुळवत त्यांनी बरेच सिनेमे गाजवले. अशा चतुरस्र अभिनेत्री असणाऱ्या रंजना यांचा जीवनप्रवास चित्रपट रूपात मोठ्या पडद्यावर पहायला मिळणार आहे.

रंजना यांच्या जीवनावर आधारलेल्या 'रंजना - अनफोल्ड' या मराठी चित्रपटाची नुकतीच घोषणा त्यांच्या जन्मदिवसाचे औचित्य साधून करण्यात आली आहे. डॉ. श्रीकांत भासी, चेअरमन - कार्निव्हल ग्रुप हे या चित्रपटाची प्रस्तुती करणार असून कार्निव्हल मोशन पिक्चर्स आणि वैशाली सरवणकर हे या चित्रपटाचे निर्माते आहेत. 'रंजना - अनफोल्ड' या चित्रपटाद्वारे रंजना देशमुख यांचा प्रवास उलगडण्याचं शिवधनुष्य उचललं आहे.राष्ट्रीय पुरस्कार विजेते दिग्दर्शक अभिजीत मोहन वारंग यांनी. ते या चित्रपटाचे लेखन, दिग्दर्शन करणार आहेत. लवकरच चित्रीकरणाला सुरुवात करून पुढल्या वर्षी 3 मार्च 2023 रोजी 'रंजना - अनफोल्ड' रसिकांसमोर सादर करण्याची योजना आखण्यात आली आहे.

रंजना यांच्याविषयी थोडेसे...

मुंबईतच जन्मलेल्या रंजना यांनी 1960 ते 2000 पर्यंत विविध व्यक्तिरेखा साकारत मराठी रसिकांचं मनोरंजन केलं. वयाच्या पाचव्या वर्षीच 'हरिश्चंद्र तारामती' या चित्रपटाद्वारे बालकलाकार म्हणून काम करत त्या सिनेसृष्टीत दाखल झाल्या. तरुणपणी 'असला नवरा नको गं बाई' या चित्रपटात मुख्य भूमिका साकारत त्यांनी कौतुकाची थाप मिळवली. त्यानंतर 'मुंबईचा फौजदार', 'सुशीला', 'गोंधळात गोंधळ', 'गुपचुप गुपचुप', 'बहुरूपी', 'बिन कामाचा नवरा', 'खिचडी' अशा वेगवेगळ्या विषयांवर आधारलेल्या चित्रपटांमध्ये भूमिका साकारत त्यांनी आपल्या कलागुणांचं दर्शन घडवलं. आता पुन्हा एकदा त्या बायोपिकच्या रूपात मराठी रसिकांसमोर येणार आहेत. या चित्रपटात रंजना यांची भूमिका कोणती अभिनेत्री वठवणार हे अद्याप गुलदस्त्यात ठेवण्यात आले आहे.

कार्निवल मोशन पिक्चर्स हे डॉ. श्रीकांत भासी यांचे एक अग्रगण्य प्रॉडक्शन स्टुडिओपैकी एक असून आजपर्यंत अनेक उल्लेखनीय बॉलिवूड आणि प्रादेशिक चित्रपटांची निर्मिती त्यांनी केली आहे, ज्यामध्ये 'सचिन: अ बिलियन ड्रीम्स' - क्रिकेट दिग्गज सचिन तेंडुलकरवर आधारित हिंदी, मराठी, इंग्रजी या भाषांमधील चित्रपट, शिवसेना प्रमख बाळ ठाकरे यांच्या जीवनावर आधारित 'ठाकरे' हा हिंदी आणि मराठी चित्रपट केले असून 'मेरे देश की धरती', 'ब्लँक' आणि 'वार छोड ना यार' या बॉलिवूड चित्रपटांचादेखील त्यात समावेश आहे. 'सेकंड शो" या मल्याळम चित्रपटातून कार्निवल मोशन पिक्चर्सने मल्याळम सुपरस्टार दुलकर सलमानला लाँच केले. 'व्हायोलिन', 'मॅटिनी', 'हँगओव्हर', 'आदि कप्यारे कूटमणी', 'मुधुगव', एडक्कड बटालियन 06' या प्रादेशिक चित्रपटांची निर्मिती केली असून आता मराठीतील पहिल्यावहिल्या "रंजना....अनफोल्ड" हा चित्रपट घेऊन येण्यास सज्ज होत आहेत.

बातम्या आणखी आहेत...