सोनाली कुलकर्णीने मांडले स्पष्ट मत:म्हणाली - 'भारतातील बऱ्याच मुली आळशी, त्यांना चांगली नोकरी व घर असलेला पती हवा असतो'

मराठी चित्रपटसृष्टीबरोबरच बॉलिवूडमध्येही स्वतःचे वेगळे स्थान निर्माण करणारी अभिनेत्री सोनाली कुलकर्णी तिच्या स्पष्टवक्तेपणासाठीही ओळखली जाते. अलीकडेच सोनालीने एका कार्यक्रमाला हजेरी लावली. या कार्यक्रमातील तिचा व्हिडिओ सोशल मीडियावर व्हायरल झाला आहे. या व्हिडिओमध्ये सोनाली ही भारतातील मुली आणि मुलांबाबत बोलताना दिसत आहे. या व्हिडिओला कमेंट करुन अनेक नेटकऱ्यांनी सोनालीचे कौतुक केले आहे.

काय म्हणाली सोनाली?
अमित श्रीवास्तव नावाच्या ट्विटर अकाऊंटवरुन सोनालीचा हा व्हिडिओ शेअर करण्यात आला आहे. यामध्ये सोनाली लग्नासाठी मुलगा शोधताना मुलींच्या अपेक्षा किती अवाजवी असतात, याबाबत ती व्यक्त झाली आहे. सोनाली म्हणते, "भारतातील बऱ्याच मुली आळशी आहेत. त्यांना असा बॉयफ्रेंड पाहिजे किंवा असा पती हवा आहे की, ज्याच्याकडे चांगली नोकरी आणि घर असेल. पण त्या मुलीमध्ये एवढी हिंमत नाही की, ती म्हणेल जेव्हा तू माझ्यासोबत लग्न करशील तेव्हा मी आपल्या दोघांसाठी काय करु शकते?"

पुढे सोनाली म्हणाली, "तुमच्या घरात अशी मुली घडवा जी स्वतःसाठी कमवू शकेल. जी असे म्हणू शकेल की, घरात नवा फ्रिज घ्यायचा असेल तर अर्धे पैसे मी देईन. मुले 18 वर्षांची झाल्यावर त्यांना पैसे कमावण्याचा दबाव असतो. कुटुंबाला हातभार लावण्याची जबाबदारी येते. हे पाहून मला माझ्या या भावांसाठी रडायला येते. माझा नवरा 20 व्या वर्षी नोकरीला लागला आणि पैसे कमवू लागला. का? मुली तर 25-27 वर्षांच्या होईपर्यंत फक्त विचारच करत असतात. तरी हनिमून भारतात नको परदेशात हवा, असा त्यांचा हट्ट असतो. आता तर विचारूच नका. डेस्टिनेशन वेडिंग्स, प्री-वेडिंग सगळं आलंय आणि त्याचा खर्चही त्या मुलाने करायचा असतो. का? तुम्हाला सर्व ऐशोआराम हवा असेल तर मग तुम्हीही कमवा. तुम्हीही शिका, नोकरी शोधा, चार ऑफिसमध्ये जा, कामासाठी विचारा, असे होत नाही," असे सोनाली म्हणाली.

नेटकऱ्यांनी केले सोनाक्षीचे कौतुक
सोनाक्षीच्या स्पष्टवक्तेपणाचे नेटकऱ्यांनी कौतुक केले आहे. एका नेटकऱ्याने सोनालीच्या व्हिडिओला कमेंट केली, 'खूप छान बोलली. पोटगीवरही बंदी घालणे ही काळाची गरज आहे. लोकोमोटिव्ह चालवण्यापासून ते प्रजासत्ताक दिनाच्या परेडमध्ये रेजिमेंटच्या प्रमुख तुकडीपर्यंत, प्रत्येक क्षेत्रात मुली मुलांच्या खांद्याला खांदा लावत असतील तर घटस्फोटासाठी पोटगी का मागतात?' आणखी एका प्रतिक्रिया देताना म्हटले, 'तू खूप चांगले बोलली आहे. मुलींवर योग्य संस्कार न करण्यासाठी मी पालकांना जबाबदार धरतो.'