मुंबई पोलिसांची कारवाई:'तारक मेहता..'च्या असित मोदींवरील आरोपांची चौकशी सुरू, जेनिफर मिस्त्रीने केला लैंगिक छळाचा आरोप

​​​​​​'तारक मेहता का उल्टा चष्मा' फेम अभिनेत्री जेनिफर मिस्त्रीने या शोचे निर्माते असित मोदी यांच्यावर लैंगिक छळाचा आरोप केला आहे. तिच्या लेखी तक्रारीवरून मुंबई पोलिसांनी आता या प्रकरणाचा तपास सुरू केला आहे. मात्र, या प्रकरणी अद्याप एफआयआर दाखल झालेला नाही. लवकरच या प्रकरणाशी संबंधित सर्वांचे जबाब नोंदवणार असल्याचे पोलिसांचे म्हणणे आहे. असितशिवाय जेनिफरने तिच्या तक्रारीत शोमधील इतर काही क्रू मेंबर्सवरही लैंगिक छळाचा आरोप केला आहे.

दिव्य मराठीशी संवाद साधताना जेनिफर मिस्त्रीने सांगितले की, गेल्या अनेक वर्षांपासून तिच्यासोबत हे घडत आहे. ती म्हणाली, 2019 मध्ये मी माझ्या सहकलाकारांना या लैंगिक छळाबद्दल सांगितले होते, त्यावेळी त्यांनी मला पाठिंबा दिला (त्या अभिनेत्यांची नावे सांगू शकत नाही), पण आज माझे पती आणि माझ्या सासरच्या लोकांशिवाय कुणाचाही मला पाठिंबा नाही.

जेनिफरने सांगितल्यानुसार, असित मोदींनी 2019 पासून त्रास द्यायला तिला सुरुवात केली. आम्ही शूटिंगसाठी सिंगापूरला गेलो होतो. तेव्हापासून असित माझ्यासोबत गैरवर्तन करत आहेत. सिंगापूरमध्ये असताना अनेकवेळा त्यांनी मला हॉटेलच्या खोलीत बोलावले होते, जेव्हा मी त्यांना जाब विचारला, तेव्हा मस्करी करतोय असे ते म्हणायचे. लोकांसमोर माझ्या ओठांची स्तुती करायचे, खासगी मेसेज पाठवायचे. ज्याकडे मी सुरुवातीला दुर्लक्ष केले. जेव्हा मी त्यांना सडेतोड उत्तर दिले, तेव्हा त्यांनी मला अधिकच त्रास द्यायला सुरुवात केली.

असित यांच्या वागण्याला कंटाळून जेनिफरने हा शो सोडला आहे आणि निर्मात्यांना कायदेशीर नोटीस पाठवली आहे. शोमध्ये जेनिफर रोशन सिंग सोढीची भूमिका साकारत होती.

शोचे प्रोजेक्ट हेड सोहेल रमाणी यांनी जेनिफरला धमकी दिली

जेनिफर मिस्त्री हिने मालिकेचे निर्माते असितुकमार मोदी यांच्यासह प्रोजेक्ट हेड सोहेल रमाणी आणि कार्यकारी निर्माते जतिन बजाज यांच्याविरोधातही तक्रार दाखल केली आहे. जेनिफरने सांगितल्यानुसार, "यावर्षी 7 मार्च रोजी माझ्या लग्नाचा वाढदिवस आणि होळी एकाच दिवशी होती. मी सेटवरून निघताना मला सोहेल आणि जतिन यांनी कारमागे उभे राहून थांबवण्याचा प्रयत्न केला. मी या शोमध्ये 15 वर्षे काम केले आहे, त्यामुळे ते मला अशा पद्धतीने बळजबरीने थांबवू शकत नाही, असे मी त्यांना सांगितले. त्यावेळी सोहेलने मला धमकी दिली. त्यामुळे मला असितकुमार मोदी, सोहेल रमाणी आणि जतिन बजाज यांच्याविरोधात लैंगिक शोषणाची केस दाखल करावी लागली."

7 मार्च रोजी हाफ डे घेणार असल्याचे आपण आधीच निर्मात्यांना सांगितले होते. मात्र हाफ डे न दिल्याने किमान दोन तास तरी ब्रेक द्या, अशी विनंती मी त्यांच्याकडे केली होती, असेही जेनिफरने सांगितले. ती म्हणाली, "ते प्रत्येकाची विनंती ऐकतात, पण माझी नाही. मी त्यांच्याकडे विनंती करत राहिली. पण त्यांनी माझे ऐकले नाही. पुरुष कलाकारांसाठी त्यांनी नेहमीच समजून घेतले. मालिकेचं सेट हे पूर्णपणे पुरुषप्रधान आहे. सोहेल माझ्याशी उद्धटपणे वागला आणि त्याने मला सेटवर चार वेळा हाकलून लावण्याची धमकी दिली. नंतर कार्यकारी निर्माते जतिन यांनी माझी गाडी थांबवण्याचा प्रयत्न केला", असे ती पुढे म्हणाली.

जेनिफरने आता असित मोदी, सोहेल रमानी आणि जतिन बजाज यांच्याविरोधात कायदेशीर नोटीस पाठवली आहे.

आता असित कुमार मोदी यांनी दिली प्रतिक्रिया

‘तारक मेहता का उल्टा चष्मा’ या मालिकेचे निर्माते असित कुमार मोदी यांनी जेनिफरने केलेले सर्व आरोप फेटाळले आहेत. जेनिफर प्रतिमा डागाळण्याचा प्रयत्न करत असल्याचे त्यांचे म्हणणे आहे. ई टाइम्सशी संवाद साधताना असित कुमार म्हणाले, "या आरोपांमध्ये काहीही तथ्य नाही. हे आरोप निराधार आहेत. खऱ्या आयुष्यात मी कसा आहे हे सगळ्यांनाच माहीत आहे. दिग्दर्शक आणि त्यांच्या टीमने जेनिफरला शो सोडण्यास सांगून, आम्ही तिला (जेनिफर) शोमधून आणि आमच्या टीममधून काढून टाकले होते. याबाबत आमच्याकडे सर्व पुरावे आहेत. लवकरच आम्ही योग्य ती कायदेशीर कारवाई करू आणि आमची प्रोडक्शन टीम सर्व पुरावे आणि कागदपत्रांचा खुलासा करेल."