अफगाणिस्तानात दररोज 167 मुलांचा मृत्यू:तालिबानी सत्तेत आरोग्य क्षेत्र कोलमडले, 60 मुलांमागे फक्त २ नर्स, ऑक्सिजन-मास्कही नाही

अफगाणिस्तानमध्ये दररोज तब्बल 167 बालकांचा मृत्यू होत आहेत. बीबीसीच्या म्हणण्यानुसार, हा आकडा केवळ अधिकृत आहे आणि वास्तव यापेक्षाही वाईट असू शकते. घोर प्रांतातील सर्वोत्तम रुग्णालयातील अनेक खोल्या आजारी मुलांनी भरलेल्या आहेत. रुग्णालयात एका बेडवर किमान 2 मुले दाखल आहेत. तर 60 मुलांसाठी वॉर्डात केवळ 2 नर्स कार्यरत आहेत.

युनिसेफच्या म्हणण्यानुसार ही मुले गंभीर आजारांनी ग्रस्त आहेत. तथापि, हे रोग बरे होऊ शकतात. वास्तविक, अफगाणिस्तानमध्ये आरोग्य सुविधांची अवस्था नेहमीच वाईट राहिली आहे. तालिबानच्या ताब्याआधी परकीय निधीतून येथे उपचार सुविधा उभारल्या गेल्या, पण हेही 2021 नंतर थांबले. बीबीसीच्या म्हणण्यानुसार, गेल्या 20 महिन्यांत अनेक मोठी रुग्णालये बंद झाली आहेत.

डॉक्टर म्हणाले - मुले मरताना पाहण्याशिवाय दुसरा मार्ग नाही

सत्ता काबीज केल्यापासून तालिबान महिलांवर सातत्याने वेगवेगळ्या बंदी लादत आहे. महिलांना स्वयंसेवी संस्थांमध्ये काम करण्यासही बंदी घालण्यात आली आहे. यामुळे एजन्सी समाजसेवेच्या स्वरूपातही मुलांना मदत करू शकत नाहीत. घोर येथील रुग्णालयात काम करणाऱ्या डॉ. समदी यांनी सांगितले की, रुग्णालयात पुरेसे ऑक्सिजन सिलिंडर नाहीत. उपचारासाठी आवश्यक असलेल्या इतर मशिन्सचाही तुटवडा आहे.

डॉ. समदी म्हणाले- आमच्याकडे आवश्यक प्रशिक्षित कर्मचारीही नाहीत. महिला कर्मचाऱ्यांची मोठी कमतरता आहे. जेव्हा आमच्याकडे सर्व मुले गंभीर स्थितीत असतात, तेव्हा आम्ही कोणत्या मुलावर प्रथम उपचार करावा, त्यांना मरताना पाहण्याशिवाय आमच्याकडे पर्याय नाही.

सरकारला मान्यता नसल्याने निधी मिळत नाही

संयुक्त राष्ट्राने अफगाणिस्तानसाठी आवाहन केलेल्या निधीपैकी केवळ 5% निधी त्यांना मिळाला आहे. खरं तर, 15 ऑगस्ट 2021 रोजी तालिबानने काबूल तसेच संपूर्ण अफगाणिस्तानवर कब्जा केला होता. यापूर्वी 21 वर्षे अफगाणिस्तानात सार्वजनिक आरोग्य सेवेसाठी कोट्यवधी रुपये खर्च करण्यात आले होते. 2021 मध्ये सत्ताबदल झाल्यापासून तालिबानच्या सरकारला आतापर्यंत मान्यता मिळालेली नाही. अशा परिस्थितीत देशासाठी पैसा वाटप करणे कठीण झाले आहे.

मात्र, काही स्वयंसेवी संस्था रुग्णालयातील कर्मचाऱ्यांना पगार देण्यासाठी आणि आवश्यक सुविधा देण्यासाठी सातत्याने निधी गोळा करण्याचा प्रयत्न करत आहेत. या स्वयंसेवी संस्थांच्या म्हणण्यानुसार, तालिबानचे महिलांवरील वाढते निर्बंध पाहता त्यांना मिळणारा निधीही लवकरच बंद होण्याची शक्यता आहे.

स्मशानभूमीतील बहुतेक नवीन कबरी लहान मुलांच्या

घोर रुग्णालयाजवळील स्मशानभूमीत अशा अनेक कबरी असून, तेथे कोणाचेही नाव नाही आणि त्यांची काळजी घेणारेही कोणी नाही. गेल्या काही वर्षांत येथे खोदण्यात आलेल्या नव्या कबरींपैकी निम्म्याहून अधिक कबरी लहान मुलांच्या आहेत. स्मशानभूमीजवळ राहणार्‍या एका व्यक्तीने सांगितले की, पूर्वी येथे आलेल्या बहुतेक लोकांनी लहान मुलांना दफन केले आहे.