तालिबानने अफगाण प्राध्यापकाला ताब्यात घेतले:महिला शिक्षणाच्या समर्थनार्थ फाडल्या होत्या पदव्या, आता केला जातोय छळ

अफगाणिस्तानमधील काबुल विद्यापीठातील एका प्राध्यापकाने डिसेंबर 2022 मध्ये थेट टीव्ही कार्यक्रमादरम्यान पदव्या फाडल्या होत्या. जिथे माझ्या आई आणि बहिणीला शिक्षण घेण्याचे स्वातंत्र्य नाही, असे शिक्षण मी स्वीकारत नाही, असे ते म्हणाले होते. आता तालिबानने त्या प्राध्यापक इस्माईल मशालला ताब्यात घेतले आहे.

त्याचा एक साथीदार फरीद अहमद फाजीलने शुक्रवारी सांगितले की, मशालला बेदम मारहाण करण्यात आली आणि त्याला क्रूरपणे नेण्यात आले. तालिबानच्या एका अधिकाऱ्यानेही याला दुजोरा दिला आहे.

तालिबानवर व्यवस्थेविरुद्ध काम केल्याचा आरोप
तालिबानने सांगितले की, शिक्षक मशाल काही काळापासून व्यवस्थेच्या विरोधात काम करत होता, त्यामुळे सुरक्षा एजन्सीने त्याला चौकशीसाठी नेले आहे. तर त्याचा सहकारी फाजील सांगतो की, तो काबूल विद्यापीठात गेल्या 10 वर्षांपासून शिकवत आहे.

त्याने कोणताही गुन्हा केलेला नाही, तरीही त्याला ताब्यात घेण्यात आले आहे. फाजील म्हणाला की, मशाल मुली आणि इतर विद्यार्थ्यांना अभ्यासासाठी मोफत पुस्तके देत असे. त्यांना अटक करून कोठे ठेवण्यात आले आहे, याची आम्हाला माहिती नाही.

महिलांच्या शिक्षणावर बंदी
डिसेंबरमध्ये तालिबानने अफगाणिस्तानातील मुलींच्या विद्यापीठीय शिक्षणावर पूर्णपणे बंदी घातली. तालिबानचे उच्च शिक्षण मंत्री नेदा मोहम्मद नदीम यांनी सर्व सरकारी आणि खाजगी विद्यापीठांना पत्र लिहिले आहे. पुढील नोटीस जारी होईपर्यंत हा नियम लागू राहणार असल्याचे सांगण्यात आले.

संयुक्त राष्ट्रांनी (UN) या निर्णयावर चिंता व्यक्त केली होती. सरचिटणीस अँटोनियो गुटेरेस यांनी सांगितले की, हे मुली आणि महिलांच्या मानवी हक्कांचे उल्लंघन आहे. त्याचवेळी अमेरिकेचे परराष्ट्र मंत्री अँटोनी ब्लिंकन यांनी तालिबानला आंतरराष्ट्रीय समुदायाचा सदस्य मानता येणार नाही, असे म्हटले होते.

'शरिया जबाबदारी'

तालिबानने अंमलात आणलेल्या प्रत्येक फर्मानाचे वर्णन 'शरिया जबाबदारी' असे केले आहे. शरिया कायद्यातील प्रत्येक शब्दाला धार्मिक महत्त्व आहे. येथे या कायद्यांतर्गत केलेले गुन्हे हे थेट अल्लाहची अवज्ञा मानली जातात. शरिया कायदा जीवन पद्धतीचे वर्णन करतो. या कायद्यांनुसार सर्व मुस्लिमांनी आपले जीवन जगणे अपेक्षित आहे. मुस्लिमांच्या दैनंदिन जीवनातील प्रत्येक पैलू, म्हणजे काय करावे आणि काय करू नये, हे शरिया कायद्याद्वारे नियंत्रित केले जाते. शरियामध्ये कुटुंब, वित्त आणि व्यवसायाशी संबंधित कायदे समाविष्ट आहेत. ड्रग्ज पिणे, वापरणे किंवा तस्करी करणे हा येथील शरिया कायद्यानुसार सर्वात मोठा गुन्हा आहे. जेव्हा एखादी व्यक्ती हा कायदा मोडते तेव्हा त्याने अल्लाहविरुद्ध गुन्हा केला आहे असे मानले जाते.

गुन्ह्यांना कठोर शिक्षा देण्याचे नियम
शरिया कायदा ही इस्लामिक कायदेशीर व्यवस्था आहे. कुराण आणि इस्लामिक फतवे एकत्र करून ते तयार करण्यात आले आहे. शरिया कायद्याचा उद्देश मुस्लिमांना त्यांच्या जीवनातील प्रत्येक पैलू अल्लाह किंवा खुदाच्या इच्छेनुसार कसे जगावे हे समजण्यास मदत करणे हा आहे.

शरियतच्या नावाखाली पुरुषांनी महिलांना अधिकारांपासून दूर खेचले

अफगाणिस्तानमध्ये तालिबानची सत्ता आली आहे. महिलांना शरिया कायद्यांतर्गत स्वातंत्र्य आणि अधिकार देण्यात येतील, असे तालिबान सांगतोय. परंतु महिलांवरील वाढत्या अत्याचाराबद्दल भीती व्यक्त केली जात आहे. तालिबान्यांनी 1996-2001 दरम्यान त्यांच्या राजवटीत हेच केले होते. येथे वाचा संपुर्ण बातमी.