अमेरिकेत गर्भपात कायद्याला आव्हान:टेक्सासच्या महिला म्हणाल्या– विचार न करता कायदा केला, जोखीम असूनही गर्भपाताला तयार नाहीत डॉक्टर

टेक्सासमधील 5 महिलांनी गर्भपात बंदीच्या विरोधात खटला दाखल केला आहे. या महिलांच्या म्हणण्यानुसार, त्यांच्या जिवाला धोका असतानाही त्यांना गर्भपात करण्याची परवानगी नव्हती. सोमवारी न्यायालयात खटला दाखल करताना गर्भपात कायद्यामुळे कोणाचा गर्भपात करायचा आणि कोणाचा नाही, हे डॉक्टरांना समजत नसल्याचे सांगण्यात आले. डॉक्टरांवर कारवाई होण्याची भीती असल्याने काही महिलांना कॉम्प्लिकेशन्स होऊनही रुग्णालयातून परत पाठवले जात आहे.

अमेरिकेच्या अनेक राज्यांमध्ये गर्भपात कायद्याविरुद्ध असेच खटले दाखल करण्यात आले आहेत. खरे तर 24 जून 2022 रोजी अमेरिकेच्या सर्वोच्च न्यायालयाने गर्भपाताशी संबंधित 50 वर्षे जुना कायदा रद्द केला होता. न्यायालयाने 1973 च्या 'रो व्हर्सेस वेड' प्रकरणात महिलांना दिलेले गर्भपाताचे घटनात्मक संरक्षण संपुष्टात आणले होते.

गर्भपातासाठी दुसऱ्या राज्यात जावे लागते

नवीन कायदा लागू झाल्यापासून रिपब्लिकन पक्षाची सत्ता असलेल्या राज्यांमध्ये याचे सर्वाधिक पालन केले जात आहे. अशा परिस्थितीत अनेक महिलांना गर्भपात करण्यासाठी इतर राज्यांत जावे लागते. टेक्सासमध्ये केस दाखल करणाऱ्या एका महिलेने सांगितले की, जोपर्यंत त्यांना रक्तातून विषबाधा झालेली नव्हती तोपर्यंत त्यांचा गर्भपात करण्यात आला नव्हता. दुसरीकडे, उर्वरित 4 महिलांना यासाठी दुसऱ्या राज्यात जावे लागले, कारण जीवाला धोका असतानाही टेक्सासमधील डॉक्टरांनी गर्भपात करण्यास नकार दिला होता.

सरकारने म्हटले- कोणत्याही परिस्थितीत आई आणि मुलांना वाचवू

या महिलांच्या केसशी लढणाऱ्या सेंटर ऑफ रिप्रॉडक्टिव्ह राइट्सच्या सीईओ नॅन्सी नॉर्थअप म्हणाल्या– एवढ्या उशिराने उपचार मिळू नयेत. गुन्हा दाखल करणाऱ्या गटाने कायद्याबाबत स्पष्टीकरण मागितले आहे. विचार न करता हा कायदा करण्यात आला असून त्यामुळे डॉक्टरांना त्यांचे कर्तव्य पार पाडता येत नसल्याचे त्यांचे म्हणणे आहे. त्याच वेळी टेक्सासचे अॅटर्नी जनरल म्हणाले - माता, मुले आणि कुटुंबांना वाचवण्यासाठी सरकार सर्वतोपरी प्रयत्न करेल. तसेच कायद्याचे पूर्ण पालन करू.

काय आहे रो व्हर्सेस वेड खटल्याचा निकाल?

नॉर्मा मॅककॉर्वी, ज्यांना आज जग 'जेन रो' म्हणून ओळखते, त्यांनी 1969 मध्ये गर्भपात कायदेशीर करण्यासाठी लढा दिला. नॉर्मा यांनी 1969 मध्ये गर्भपात बेकायदेशीर ठरवलेल्या राज्य कायद्याला आव्हान दिले होते. हे प्रकरण अमेरिकेच्या सर्वोच्च न्यायालयात पोहोचले आणि त्या जिंकल्या. जानेवारी 1973 मध्ये सर्वोच्च न्यायालयाने मॅककॉर्वींच्या बाजूने निर्णय दिला की गर्भपात करायचा की नाही हे ठरवण्याचा अधिकार स्त्रीचा आहे.

जेन रो यांनी गर्भपात कायदेशीर करण्यासाठी याचिका केली तेव्हा सरकारी वकील हेन्री वेड यांनी विरोधात युक्तिवाद केला. त्यामुळे हे प्रकरण 'रो व्हर्सेस वेड' या नावाने जगभर गाजले. या निर्णयामुळे जेन रो अमेरिकेतील घराघरांत पोहोचल्या होत्या.