अशोभनीय:बोलिव्हियाच्या संसदेत फ्रीस्टाइल हाणामारी, VIDEO; महिला खासदारांनी ओढले एकमेकींचे केस

दक्षिण अमेरिकन देश बोलिव्हियाच्या संसदेत वाद झाला. ही घटना 23 मेची आहे. येथे काही विरोधी खासदारांनी हातात बॅनर घेऊन घोषणाबाजी केली. यानंतर हाणामारी सुरू झाली. त्याचा व्हिडिओ समोर आला आहे. यामध्ये महिला खासदार एकमेकींचे केस ओढताना दिसत आहेत. यासोबतच त्या बॅनरही फाडताना दिसत आहेत.

व्हिडिओमध्ये काही खासदार एकमेकांना लाथा मारताना आणि धक्काबुक्की करताना दिसत आहेत. तर संसदेत उपस्थित इतर खासदार हस्तक्षेप करताना दिसत आहेत.

एएफपी या वृत्तसंस्थेने दिलेल्या वृत्तानुसार सत्ताधारी पक्षाचे मंत्री एडुआर्डो डेल कॅस्टिलो डिसेंबरमध्ये सांताक्रूझ प्रदेशाच्या गव्हर्नरच्या अटकेचा अहवाल सादर करत होते. त्यानंतर विरोधी पक्षनेत्यांनी घोषणाबाजी सुरू केली. त्यांनी मंत्री कॅस्टिलो यांचे छायाचित्र असलेले बॅनरही दाखवले. त्यावर लिहिले होते - दहशतवादी मंत्री. दरम्यान, सत्ताधारी पक्षाच्या खासदारांनी बॅनर फाडण्यास सुरुवात केली. हे पाहून सुमारे 20 खासदार एकमेकांना भिडले.

मंत्र्यांनी राज्यपालांची अटक कायदेशीर असल्याचे सांगितले
खरेतर, मंत्री एडुआर्डो डेल कॅस्टिलो यांनी सांताक्रूझ प्रदेशाचे राज्यपाल आणि संसदेतील विरोधी पक्षनेते लुईस फर्नांडो कॅमाचो यांच्या अटकेला कायदेशीर म्हटले आहे. जेव्हा विरोधी खासदारांनी गदारोळ घालण्यास सुरुवात केली तेव्हा डेल कॅस्टिलो यांनी त्यांना कट्टरपंथी, हिंसक म्हटले. यानंतर वाद वाढत गेला. विरोधी पक्षनेत्यांनी घोषणाबाजी करत म्हटले की, देशात राजकीय कैदी असतील तर तिथे लोकशाही नाही.

सेनेगलच्या संसदेत महिला खासदाराला थप्पड मारण्यावरून वाद
देशाच्या संसदेत गदारोळ होण्याची ही पहिलीच वेळ नाही. 2 डिसेंबर 2022 रोजी सेनेगलच्या संसदेत एका खासदाराने महिला खासदाराला थप्पड मारली होती. यानंतर संतापलेल्या महिला मंत्र्याने त्यांच्यावर खुर्ची फेकली. यानंतर दोन्ही खासदारांमध्ये हाणामारी झाली.

खरं तर, महिला संसदपटू एमी एनडियाये गनीबी यांनी एका आध्यात्मिक व्यक्तिमत्त्वावर टीका केली होती. ज्यांनी अध्यक्ष मॅकी सॅल यांच्या तिसऱ्या कार्यकाळाला विरोध केला. विरोधी पक्षाचे खासदार मसाता सांब यांना ही गोष्ट आवडली नाही. ते आपल्या जागेवरून उठले आणि त्यांनी गनिबी यांना चापट मारली.

ट्रम्प यांचे भाषण अमेरिकन संसदेच्या स्पीकरने फाडले
2020 मधील कामकाजादरम्यान अमेरिकन संसदेच्या स्पीकर नॅन्सी पेलोसी यांनी तत्कालीन राष्ट्राध्यक्ष डोनाल्ड ट्रम्प यांचे भाषण फाडले. द गार्डियनच्या वृत्तानुसार, पेलोसी यांनी ट्रम्प यांच्या भाषणाचे वर्णन 'अविश्वासाचा जाहीरनामा' असे केले. या सर्व वादांमुळे डोनाल्ड ट्रम्प यांनी पेलोसींना 'क्रेझी नॅन्सी' असेही संबोधले होते.

घानाच्या संसदेतही दे दणादण
घानाच्या संसदेत एका विधेयकावरील चर्चेदरम्यान सरकार आणि विरोधकांमधील वाद एवढा वाढला की, लाथा-बुक्क्यांनी मारहाण करण्यात आली होती. या घटनेचा व्हिडिओ सोशल मीडियावर व्हायरल झाला आहे. खासदारांमधील हाणामारी थांबत नाही हे पाहून सुरक्षेत तैनात असलेल्या मार्शल्सनी मध्ये येऊन परिस्थिती नियंत्रणात आणण्याचा प्रयत्न केला. काही खासदारांनीही मध्यस्थी करण्याचा प्रयत्न केला.

ट्रम्प यांच्याकडून अमेरिकन संसदेवरील हिंसाचाराचे समर्थन
अमेरिकेतील 2020 च्या अध्यक्षीय निवडणुकीत माजी राष्ट्राध्यक्ष डोनाल्ड ट्रम्प यांचा पराभव झाला. यानंतर 6 जानेवारी 2021 रोजी कॅपिटल हिल (यूएस संसद) वर त्यांच्या समर्थकांनी हल्ला केला. 2020च्या अध्यक्षीय निवडणुकीचे निकाल उलटवण्याचा हा प्रयत्न मानला जात होता. या संपूर्ण हिंसाचारात ट्रम्प मूक प्रेक्षक बनून राहिले.