अमेरिकन संसदेत हिंसाचार:ट्रम्प यांनी फेसबुकवर लिहिले- आय अ‍ॅम बॅक, फेसबुकने अकाउंट केले होते ब्लॉक

अमेरिकेचे माजी राष्ट्राध्यक्ष डोनाल्ड ट्रम्प पुन्हा फेसबुकवर आले आहेत. त्यांनी शुक्रवारी फेसबुक पोस्टमध्ये लिहिले- आय अ‍ॅम बॅक. 25 जानेवारी रोजी सोशल मीडिया कंपनी मेटाने ट्रम्प यांचे फेसबुक आणि इंस्टाग्राम अकाउंट पुन्हा सुरू करण्याची घोषणा केली. अमेरिकेच्या संसदेत झालेल्या हिंसाचारानंतर कंपनीने 6 जानेवारी 2021 रोजी ट्रम्प यांचे अकाउंट ब्लॉक केले होते. आता 2 वर्षांनी ते परतले आहेत.

ट्रम्प फेसबुकवर येण्याविषयी मेटा ग्लोबल अफेयर्सचे अध्यक्ष निक क्लेग म्हणाले होते- अमेरिकेचे माजी राष्ट्राध्यक्ष डोनाल्ड ट्रम्प यांचे खाते नवीन नियमांसह पुनर्संचयित केले जाईल, जेणेकरून त्यांच्या पोस्टमुळे पुन्हा हिंसाचार भडकू नये. त्यांचे खाते आमच्या समुदाय मानकांच्या अधीन आहे. त्यांनी पुन्हा हिंसाचार भडकावणारी पोस्ट केल्यास ती पोस्ट या प्लॅटफॉर्मवरून काढून टाकली जाईल. तसेच त्यांचे खातेही बॅन केले जाईल.

कॅपिटल हिंसाचारात 5 जणांचा मृत्यू
6 जानेवारी 2021 रोजी अमेरिकेच्या संसदेत अध्यक्षीय निवडणुकीच्या निकालादरम्यान शेकडो ट्रम्प समर्थकांनी येथे हिंसाचार केला. यामध्ये एका पोलीस अधिकाऱ्यासह पाच जणांचा मृत्यू झाला होता. ट्रम्प यांच्या समर्थकांना भडकावल्याचा आरोप होता. यानंतर त्याचे सोशल मीडिया अकाउंट सस्पेंड करण्यात आले होते.

फेसबुकने म्हटले- ट्रम्प यांच्या व्हिडिओमुळे हिंसा भडकण्याचा धोका
कॅपिटल हिलमधील हिंसाचारानंतर ट्रम्प यांनी सोशल मीडियावर 1 मिनिटाचा व्हिडिओ पोस्ट केला. ट्रम्प यांचा व्हिडिओ फेसबुक आणि यूट्यूबने हटवला होता. फेसबुकचे उपाध्यक्ष (इंटिग्रिटी) गुए रोजेन म्हणाले होते की, ही आणीबाणी असून ट्रम्प यांच्या व्हिडिओमुळे हिंसाचार आणखी भडकू शकतो.

ट्रम्प यांनी फेसबुकच्या या निर्णयाला मतदारांचा अपमान असल्याचे म्हटले
ट्रम्प यांनी फेसबुकच्या कृतीला 2020 च्या निवडणुकीत ट्रम्प यांना मतदान करणाऱ्या 75 दशलक्ष लोकांचा अपमान असल्याचे म्हटले होते. ट्रम्प म्हणाले होते - अशा लोकांना सेन्सॉरने गप्प केले जाऊ शकत नाही. आम्ही पुन्हा जिंकू. आपला देश हा अपमान यापुढे सहन करू शकत नाही.