क्रिमिनल केसशिवाय ट्रम्प यांच्यावर 19 खटले:हिंसाचार, निवडणुकीत हेराफेरी, बलात्कार-बदनामीसारखे डोनाल्ड यांच्यावर आरोप; शिक्षा नाही

30 मार्च 2023 रोजी न्यूयॉर्कच्या मॅनहॅटन कोर्टाने अमेरिकेचे माजी राष्ट्राध्यक्ष डोनाल्ड ट्रम्प यांच्याविरुद्ध फौजदारी खटल्याची घोषणा केली. 4 एप्रिल रोजी, मॅनहॅटन कोर्टाने पॉर्न स्टार स्टॉर्मी डॅनियल्सला 34 गुन्ह्यांमध्ये तिला गप्प करण्यासाठी पैसे देणे आणि आर्थिक रेकॉर्ड खोटे केल्याबद्दल दोषी ठरवले. ट्रम्प यांनी न्यायालयात सांगितले की, ते दोषी नाही. दरम्यान या प्रकरणाची पुढील सुनावणी 4 डिसेंबर रोजी होणार आहे.

अमेरिकेच्या इतिहासात पहिल्यांदाच एखाद्या राष्ट्राध्यक्षाविरुद्ध फौजदारी खटला चालवला जात आहे. 2016 च्या अध्यक्षीय निवडणुकीपूर्वी पॉर्न स्टार स्टॉर्मी डॅनियल्सशी प्रेमसंबंध ठेवल्याचा आणि तिला गप्प बसण्यासाठी पैसे दिल्याच्या आरोपांना ट्रम्प यांना सामोरे जावे लागले.

परंतू यात सर्वात महत्त्वाची बाब म्हणजे ट्रम्प यांच्याविरूद्ध हा एकमेव खटला नाही. त्याच्यावर एकूण 19 खटले सुरू आहेत. यापैकी निम्म्या प्रकरणांमध्ये त्यांच्यावर राष्ट्रपती असताना गैरवर्तनाचा आरोप आहे. ट्रम्प यांच्यावर सुरू असलेल्या खटल्यांपैकी बहुतेक प्रकरणे 3 प्रकरणांशी संबंधित आहेत. पहिल्या आर्थिक गडबड, दुसरे म्हणजे, 6 जानेवारी 2021 रोजी संसदेत झालेल्या हिंसाचारात ट्रम्प यांची भूमिका, तिसरे प्रकरण 2020 च्या अध्यक्षीय निवडणुकीत हस्तक्षेप करण्याचा झालेला प्रयत्न. मात्र, माजी राष्ट्रपतींनी सर्व आरोप फेटाळून लावले. ट्रम्प यांनी काही खटले बंद करण्यासाठी याचिकाही दाखल केल्या असून काहींमध्ये त्यांनी काउंटर केसही दाखल केली आहे. चला तर आज आपण जाणून घेऊया, ट्रम्प यांच्याशी संबंधित काही प्रमुख केस संदर्भात....

डोनाल्ड ट्रम्प आणि पॉर्न स्टार स्टॉर्मी डॅनियल्स यांची पहिली भेट 2006 मध्ये एका गोल्फ स्पर्धेदरम्यान झाली होती. तेव्हा ट्रम्प हे रिअल इस्टेट व्यावसायिक होते. या भेटीचा उल्लेख स्टॉर्मीने तिच्या फुल डिस्क्लोजर या पुस्तकात केला आहे. स्टॉर्मीने तिच्या पुस्तकात सांगितले की, ट्रम्प यांनी तिला पेंटहाऊसमध्ये डिनरसाठी आमंत्रित केले होते. पुस्तकात त्यांनी ट्रम्प यांच्याशी असलेले नाते आणि त्यांचे शारीरिक रूप यांचाही उल्लेख केला आहे. यानंतर दोघांमध्ये अफेअर सुरू झाले.

2016 च्या अध्यक्षीय निवडणुकीपूर्वी शांत राहण्यासाठी ट्रम्प यांनी स्टॉर्मीला पैसे दिल्याचे आरोप आहेत. ट्रम्प यांचे वकील मायकल कोहेन यांनीही ट्रम्प यांच्या वतीने पॉर्न स्टारला 1 लाख 30 हजार डॉलर (सुमारे 1 कोटी 7 लाख रुपये) दिल्याचे मान्य केले होते. हे पेमेंट वॉल स्ट्रीट जर्नलने जानेवारी 2018 मध्ये उघड केले होते. या आधारे ट्रम्प यांच्यावर फौजदारी खटला चालवण्याचा निर्णय घेण्यात आला आणि त्यांच्याविरुद्ध न्यायालयात 34 आरोप ठेवण्यात आले.

अमेरिकेत 6 जानेवारी 2021 रोजी कॅपिटल हिलमध्ये म्हणजेच अमेरिकन संसदेत ट्रम्प यांच्या समर्थकांकडून हिंसाचार करण्यात आला होता. 3 नोव्हेंबर 2020 रोजी अध्यक्षीय निवडणुकीसाठी झालेल्या मतदानात बायडेन यांना 306 आणि ट्रम्प यांना 232 इलेक्टोरल मते मिळाली. निकाल येताच ट्रम्प आणि त्यांच्या समर्थकांनी निवडणुकीत हेराफेरीचे आरोप केले.

मतदानाच्या 64 दिवसांनंतर, जेव्हा अमेरिकन संसदेत बायडेन यांचा विजयावर शिक्कामोर्तब करण्यात गुंतली होती. तेव्हा ट्रम्प यांच्या समर्थकांनी संसदेत प्रवेश केला. तोडफोड आणि हिंसाचार झाला. यामध्ये एका पोलीस अधिकाऱ्यासह 5 जणांचा मृत्यू झाला होता. हिंसाचारानंतर ट्रम्प यांच्यावर त्यांच्या समर्थकांना भडकवल्याचा आरोप करण्यात आला होता. ट्रम्प यांच्या पक्षाचे सिनेटर मिट रॉम्नी म्हणाले होते - मला लाज वाटते की, आमच्या राष्ट्रपतींनी दंगलखोरांना संसदेत घुसण्यास प्रवृत्त केले. लोकशाहीत विजय-पराजय स्विकारण्याची हिंमत असली पाहिजे.

या प्रकरणाचा तपास तब्बल 18 महिने चालला. गेल्या वर्षी डिसेंबरमध्ये चौकशी समितीने 845 पानी दोषारोष अहवाल तयार केला होता. यासाठी ट्रम्प यांना जबाबदार धरण्यात आले. त्याच्यावर फौजदारी खटल्याची शिफारस करण्यात आली होती. यासाठी 1000 प्रत्यक्षदर्शींचे जबाब नोंदवण्यात आले.

न्यूयॉर्क टाईम्सच्या वृत्तानुसार, चौकशी समितीने ट्रम्प यांच्यावर अध्यक्षीय निवडणुकीतील पराभवाचा निर्णय उलथवून टाकणे, बंडखोरीला चिथावणी देणे, अधिकृत कारवाईत अडथळा आणणे, कट रचणे, खोटी विधाने करणे आणि देशाचा विश्वासघात केल्याचा आरोप केला आहे. त्यानंतर समितीने हे प्रकरण न्याय विभागाकडे पाठवले. या प्रकरणी ट्रम्प यांच्या कार्यकाळातील ग्रँड ज्युरीसमोर उपराष्ट्रपती माइक पेन्स आणि व्हाईट हाऊसचे चीफ ऑफ स्टाफ मार्क मेडोज यांचे जबाब नोंदवले जातील.

अध्यक्षीय निवडणुकीतील पराभवानंतर ट्रम्प यांनी व्हाईट हाऊस सोडले. तेव्हा त्यांच्यावर अनेक गोपनीय कागदपत्रे सोबत घेतल्याचा आरोप करण्यात आला होता. वॉशिंग्टन पोस्टच्या वृत्तानुसार, नॅशनल आर्काइव्हजने अनेक वेळा कागदपत्रे मागितली पण ट्रम्प यांनी त्याकडे दुर्लक्ष केले. त्यानंतर ऑगस्टमध्ये FBIने ट्रम्प यांच्या फ्लोरिडास्थित रिसॉर्ट मार-ए-लागो आणि पाम हाऊसवर छापे टाकले. रॉयटर्सच्या म्हणण्यानुसार, झडतीदरम्यान 13,000 कागदपत्रे जप्त करण्यात आली, त्यापैकी 100 वर्गीकृत करण्यात आली.

न्यूयॉर्क टाइम्सच्या मते, एफबीआयच्या छाप्यांसाठी वापरलेले तीन वॉरंट गुन्हेगारी कायद्याशी संबंधित होते. यामध्ये हेरगिरी (राष्ट्रीय सुरक्षेशी संबंधित कागदपत्रे अनधिकृतपणे ताब्यात ठेवणे), सरकारी दस्तऐवज लपवणे किंवा नष्ट करणे आणि व्यवसायात हस्तक्षेप करणे यांचा समावेश आहे.

या कारवाईदरम्यान ट्रम्प यांनी गुप्त कागदपत्रे लपविण्याचा प्रयत्न केल्याचा दावा न्याय विभागाने केला आहे. ट्रम्प यांच्या प्रतिनिधींनी सर्व कागदपत्रे परत केल्याचा खोटा दावा केल्याचा पुरावाही त्यांच्याकडे आहे. अलीकडेच या खटल्याचा निकाल देताना जिल्हा न्यायालयाचे न्यायाधीश म्हणाले –सुरुवातीला सरकारी वकिलांनी ट्रम्प यांनी गुन्हा केल्याचे दाखवले आहे. मात्र, यावेळी न्यायाधीश कोणत्या गुन्ह्याचा संदर्भ देत होते, त्याची माहिती समोर आलेली नाही.

2020 मध्ये अध्यक्षीय निवडणुकीनंतर ट्रम्प यांच्यावर निकाल उलटवण्याचा प्रयत्न केल्याचा आरोप करण्यात आला. बीबीसीच्या म्हणण्यानुसार, 2 जानेवारी 2021 रोजी ट्रम्प आणि जॉर्जियाचे निवडणूक अधिकारी ब्रॅड राफेनस्परगर यांच्यात सुमारे तासभर फोन झाला होता. 3 जानेवारी रोजी दुपारी 2:41 वाजता व्हाईट हाऊसच्या कार्यालयातून हा कॉल करण्यात आला होता.

ट्रम्प यांनी फोनवर रॅफेनस्परगरला सांगितले की त्यांनी मतांची पुनर्मोजणी करावी जेणेकरून राज्याची 16 इलेक्टोरल मते त्यांच्याकडे गेली. कॉल रेकॉर्डिंग प्रथम वॉशिंग्टन पोस्टने प्रकाशित केले होते. त्यानुसार मला फक्त 11,780 मते हवी आहेत, असे ट्रम्प म्हणाले होते. विजयाच्या फरकापेक्षा हे एक मत जास्त आहे. यादरम्यान ट्रम्प यांनी रॅफेनस्परगरचे ऐकले नाही तर त्यांच्यावर फौजदारी गुन्हा दाखल करण्याची धमकीही दिली.

गेल्या वर्षी, एका विशेष ग्रँड ज्युरीने या खटल्यात अनेक महिन्यांत 75 साक्षीदारांचे जबाब नोंदवले. त्याचा अहवालही तयार करण्यात आला आहे. मात्र यामध्ये कोणाला दोषी ठरवण्यात आले आहे आणि त्याच्यावर कोणते आरोप ठेवण्यात आले आहेत, याची माहिती समोर आलेली नाही. न्यूयॉर्क टाइम्सच्या वृत्तानुसार, ग्रँड ज्युरी सदस्य एमिली कोहर्स यांनी सांगितले की, या प्रकरणात 12 हून अधिक लोकांवर फौजदारी आरोप ठेवण्यात आले आहेत.

मासिकाच्या लेखिका ई. जीन कॅरोल यांनी ट्रम्प यांच्यावर आरोप केला की, 1995-96 मध्ये त्याने माझ्यावर बलात्कार केला होता. कॅरोल यांच्या म्हणण्यानुसार, न्यूयॉर्कच्या डिपार्टमेंटल स्टोअरच्या ड्रेसिंग रूममध्ये ट्रम्पने तिच्यावर बलात्कार केला. तिने याविरोधात आवाज उठवण्याचा प्रयत्न केला असता ट्रम्प यांनी तिची बदनामी केली. आपल्या पुस्तकाची विक्री वाढवण्यासाठी कॅरोल आपल्यावर खोटे आरोप करत असल्याचे ट्रम्प यांनी म्हटले होते.

यानंतर कॅरोलने ट्रम्प यांच्यावर बॅटरी आणि मानहानीची केस देखील दाखल केली. गेल्यावर्षींच्या सप्टेंबरमध्ये न्यूयॉर्कच्या न्यायालयाने कॅरोलचे बलात्काराचे आरोप फेटाळून लावताना ट्रम्प हे फेडरल कर्मचारी असल्याचा निर्णय दिला होता. 25 एप्रिल रोजी होणाऱ्या सुनावणीदरम्यान, वॉशिंग्टन न्यायालय हे ठरवेल की, ट्रम्प यांनी पदावर असताना कथित बदनामीकारक विधाने केली होती की नाही.

न्यूयॉर्कचे अ‌ॅटर्नी जनरल, लेटिटिया जेम्स यांनी सप्टेंबरच्या खटल्यात ट्रम्प यांच्यावर अब्जावधी डॉलर्सहून अधिक संपत्तीची फसवणूक केल्याचा आणि सावकार-विमा कंपन्यांशी खोटे बोलल्याचा आरोप केला. रॉयटर्सच्या म्हणण्यानुसार, जेम्स यांनी दावा केला की, त्यांच्या कार्यालयाला 2011 ते 2021 दरम्यान ट्रम्प यांच्या मालमत्तेच्या गैरवापराची 200 हून अधिक प्रकरणे मिळून आली होती.

लेटिटिया यांनी ट्रम्प यांच्यावर त्यांची मुले डोनाल्ड ज्युनियर, एरिक आणि इव्हांका यांना न्यूयॉर्कमध्ये व्यवसाय करण्यावर बंदी घालण्याची मागणी केली आहे. यासोबतच त्यांनी फसवणुकीतून मिळालेले किमान 250 दशलक्ष डॉलर (2 हजार 54 कोटी रुपये) वसूल करण्याची मागणीही केली आहे.

जानेवारीमध्ये, न्यूयॉर्कच्या एका न्यायाधीशांनी अॅटर्नी जनरलचा ट्रम्प यांच्याविरुद्धचा खटला फेटाळण्यास नकार दिला. या प्रकरणाच्या सुनावणीसाठी ऑक्टोबर महिना निवडण्यात आला होता. अॅटर्नी जनरल जेम्सचे प्रकरण दिवाणी आहे, त्यामुळे ट्रम्प यांच्यावर फौजदारी आरोप लावता येणार नाहीत. ट्रम्प यांच्याशी तडजोड करून जेम्स आर्थिक भरपाईची मागणी करू शकतात. मात्र, ती केस जिंकली तर कोर्ट ट्रम्प यांना मोठा दंड ठोठावू शकते. याशिवाय न्यूयॉर्कमध्ये त्यांच्या व्यवसायावरही बंदी घातली जाऊ शकते.

हे ही वाचा

पॉर्न स्टार केस:डोनाल्ड ट्रम्प यांच्यावर 34 आरोप, मॅनहॅटन कोर्टात 57 मिनिटांची सुनावणी

अमेरिकेचे माजी राष्ट्राध्यक्ष डोनाल्ड ट्रम्प यांच्यावर मंगळवारी मॅनहॅटन न्यायालयात 34 आरोप ठेवण्यात आले. पॉर्न स्टार स्टॉर्मी डॅनियल्सचे तोंड बंद करण्यासाठी पैसे दिल्याबद्दल आणि त्यासाठी व्यावसायिक रेकॉर्ड खोटे सिद्ध केल्याबद्दल ट्रम्प यांच्यावर कोर्टात खटला चालवला गेला. दरम्यान, डोनाल्ड ट्रम्प यांनी न्यायालयात सांगितले की, त्यांनी कोणताही गुन्हा केलेला नाही. विशेष म्हणजे मॅनहॅटन कोर्टाने ट्रम्प यांच्या जामीन किंवा अटकेवर निर्णय दिला नाही. CNN च्या वृत्तानुसार, पुढील सुनावणी 4 डिसेंबरला होणार आहे. - वाचा संपूर्ण बातमी