हिंसाचार:पाकच्या 4 पैकी 3 प्रांतात लष्कर; PTI नेते शाह मेहमूद कुरेशींसह फवाद चौधरींना बेड्या; इम्रान यांना 8 दिवसांची कोठडी

अल कादिर ट्रस्ट घोटाळ्याप्रकरणी पाकचे माजी पंतप्रधान इम्रान खान यांना अटक केल्यानंतर हिंसाचाराची लाट उसळली आहे. पाकच्या राजधानीसह 3 प्रांतांत (पंजाब, खैबर पख्तूनख्वा व बलुचिस्तान) सैन्य तैनात करण्यात आले आहे. पीटीआय नेते शाह मेहमूद कुरेश व फवाद चौधरी यांना बेड्या ठोकण्यात आल्यात. पोलिसांनी आतापर्यंत इम्रानच्या पक्षाच्या 1900 नेते व कार्यकर्त्यांना ताब्यात घेतले आहे.

तत्पूर्वी बुधवारी इम्रान खान यांना 8 दिवसांची एनएबी (नॅशनल अकाउंटेबिलिटी ब्युरो) कोठडी ठोठावण्यात आली होती. पीटीआय समर्थकांनी पेशावरमधील निवडणूक आयोगाच्या कार्यालयावरही हल्ला केला. या हिंसाचारामुळे चांग भागातील आण्विक केंद्रावर कमांडो तैनात करण्यात आलेत. गिलगिट-बाल्टिस्तानमध्ये एका महिन्यासाठी कलम 144 लागू करण्यात आले आहे. हिंसाचारावर लष्कराने पहिली अधिकृत प्रतिक्रिया दिली. ते म्हणाले- 9 मेच्या दिवसाकडे पाकच्या इतिहासातील काळा अध्याय म्हणून पाहिला जाईल.

गत 24 तासांतील 5 मोठे अपडेट्स...

पाकिस्तानातील हिंसाचाराची 5 छायाचित्रे...

शाहबाज शरीफांच्या लाहोर स्थित घरावर हल्ला
वृत्तसंस्था पीटीआयच्या वृत्तानुसार, बुधवारी इम्रान खान यांच्या समर्थकांनी पंतप्रधान शाहबाज शरीफ यांच्या लाहोर स्थित घरावर हल्ला केला. 500 हून अधिक आंदोलकांनी शरीफ यांच्या घराबाहेर उभ्या असलेल्या वाहनांची जाळपोळ केली. तसेच घरावर पेट्रोल बॉम्ब फेकले. त्यानंतर पोलिसांचा फौजफाटा तिथे पोहोचताच निदर्शकांनी तेथून पळ काढला. पाकिस्तान सरकारने या हल्ल्याला अद्याप दुजोरा दिला नाही.

काय आहे अल-कादिर ट्रस्ट केस
सरकारच्या माहितीनुसार, इम्रान खान पंतप्रधान झाल्यावर त्यांनी भू माफिया मलिक रियाझला मनी लाँड्रिंग प्रकरणात अडकवले. लंडनमध्ये त्याचे 40 अब्ज रुपये जप्त करण्यात आले. त्यानंतर हा पैसा ब्रिटिश सरकारने पाकला दिला. इम्रान यांनी माहिती मंत्रिमंडळालाही कळवली नाही.

त्यानंतर इम्रान यांनी अल कादिर ट्रस्टची स्थापना केली. या ट्रस्टने धार्मिक शिक्षण देण्यासाठी अल कादिर विद्यापीठ स्थापन केले. यासाठी मलिक रियाझने कोट्यवधी रुपयांची जमीन दिली. तसेच बुशरा बीबी यांना हिऱ्याची अंगठी भेट दिली. त्यामोबदल्यात रियाझ यांची सर्व प्रकरणे वगळण्यात आली. कोट्यवधी रुपयांची सरकारी कंत्राटेही त्यांना मिळाली.

गृहमंत्री राणा सनाउल्ला याप्रकरणी म्हणाले - यामुळे सरकारी तिजोरीला 60 अब्ज रुपयांचा फटका बसला. 13 महिन्यांत एकदाही इम्रान किंवा बुशरा चौकशीसाठी आले नाहीत. 4 वर्षांनंतरही या विद्यापीठात केवळ 32 विद्यार्थी आहेत.