शस्त्रास्त स्पर्धा:इराणची 2000 किमी पल्ल्याच्या बॅलेस्टिक क्षेपणास्त्राची निर्मिती, US-इस्रायल तळापर्यंत पोहोचण्यास सक्षम

इराणने 2000 किमी पल्ल्याच्या क्षेपणास्त्राची यशस्वी चाचणी केली आहे. हे क्षेपणास्त्र मध्यपूर्वेतील अमेरिका आणि इस्रायलच्या तळापर्यंत पोहोचण्यास सक्षम असल्याचा दावा इराणने केला आहे. अमेरिका आणि युरोपकडून वारंवार विरोध होऊनही इराणने आपला क्षेपणास्त्र कार्यक्रम विकसित करणे सुरूच ठेवल्याचे सांगितले आहे.

इराणचे संरक्षण मंत्री मोहम्मदरेझा अशतियानी म्हणाले- हा आमच्या शत्रूंना संदेश आहे की आम्ही कोणत्याही परिस्थितीत स्वतःचे संरक्षण करू. त्याच वेळी, आम्ही आमच्या मित्रांना सांगू इच्छितो की आम्ही या प्रदेशात शांततेसाठी शक्य ते सर्व प्रयत्न करत आहोत. खैबर नावाचे हे क्षेपणास्त्र 1500 किलोपर्यंतचे वाॅरहेड वाहून नेण्यास सक्षम असल्याचे इराणची सरकारी वृत्तसंस्था IRNA ने म्हटले आहे.

अमेरिकेच्या टॉमहॉकपेक्षा जास्त मारा करण्यास सक्षम
IRNA नुसार, हे क्षेपणास्त्र पर्शियन गल्फमध्ये गस्त घालणाऱ्या युद्धनौका आणि पाणबुड्यांवर तैनात करण्यात आले आहे. नौदलाचे म्हणणे आहे की, इराणचे सशस्त्र दल IRGC आखातातील शत्रू जहाजांच्या हालचालींवर सतत लक्ष ठेवून आहे. हे बॅलेस्टिक क्षेपणास्त्र अमेरिकेच्या टॉमहॉकपेक्षा जास्त मारा करण्यास सक्षम आहे.

डोंगराखाली इराणचा अण्वस्त्र कार्यक्रम
काही दिवसांपूर्वी एपी या वृत्तसंस्थेने दिलेल्या वृत्तात दावा करण्यात आला होता की इराण आपल्या अणु केंद्राला इस्रायल आणि अमेरिकेच्या हल्ल्यापासून वाचवण्यासाठी सर्वतोपरी प्रयत्न करत आहे. ते आता डोंगराळ भागात जमिनीखाली अण्वस्त्रे बनवत आहेत. त्याची सॅटेलाइट छायाचित्रेही समोर आली आहेत. यामध्ये इराणी कामगार झाग्रोसच्या डोंगरात बोगदे खोदताना दिसले. हे ठिकाण इराणच्या आण्विक साइट नतान्झच्या अगदी जवळ आहे, ज्यावर पाश्चात्य देशांकडून सातत्याने टीका होत आहेत.

इराणला अण्वस्त्र बनवण्यापासून रोखण्यासाठी त्याच्या अणु केंद्रावर अनेकदा हल्ले झाले आहेत. Natanz अणुऊर्जा साइटवर Stuxnet व्हायरसने हल्ला केला होता. हा इस्रायल आणि अमेरिकेत बनलेला व्हायरस होता.

2010 मध्ये इराणवर निर्बंध
वास्तविक, इराण जवळपास 22 वर्षांपासून अणुऊर्जा मिळवण्याचा प्रयत्न करत आहे. इराणने अण्वस्त्रे विकसित केल्यास जगाला धोका निर्माण होईल, असे अमेरिका, इस्रायल आणि अरब जगतासह पाश्चात्य देशांना वाटते. 2010 मध्ये, संयुक्त राष्ट्र सुरक्षा परिषद, युरोपियन युनियन आणि अमेरिकेने इराणला रोखण्यासाठी निर्बंध लादले. यापैकी बहुतांश अजूनही सुरू आहेत.

अण्वस्त्रांबाबत 2015 मध्ये झाली डील
इराणला अण्वस्त्रे तयार करण्यापासून रोखण्यासाठी 2015 मध्ये एक करार झाला होता. त्यात इराण, ब्रिटन, चीन, फ्रान्स, जर्मनी, रशिया आणि अमेरिका यांचा समावेश होता. या करारात असे ठरले होते की, इराण त्याच्या अणुभट्ट्यांची वेळोवेळी संयुक्त राष्ट्राकडून तपासणी करून घेईल आणि तो आपला अणुकार्यक्रम पुढे नेणार नाही. तथापि, 2018 मध्ये अध्यक्ष डोनाल्ड ट्रम्प यांनी अमेरिकेला करारातून बाहेर काढले. परिणामी इराणवर पुन्हा निर्बंध लादण्यात आले.

तथापि, अणुकरार संपल्यापासून इराणने युरेनियमचे 60% समृद्धीकरण केले आहे. इराण आता अण्वस्त्रांसाठी 83.7% शुद्ध युरेनियम तयार करत आहे, या प्रकरणाचा तपास करणार्‍या लोकांच्या मते. शस्त्रे बनवण्यासाठी 90% शुद्ध युरेनियमचे कण लागतात.