किंग चार्ल्स यांचे हॅरी आणि मेगन यांना राज्याभिषेकाचे निमंत्रण:राजेशाही सोडलेल्या मुलाला पाठवला मेल, पुस्तकातील खुलाशांमुळे वाढली होती नाराजी

ब्रिटनचे राजघराणे सोडून अमेरिकेत स्थायिक झालेले प्रिन्स हॅरी आणि त्यांची पत्नी मेघन मर्केल यांना तीव्र मतभेद असूनही किंग चार्ल्स यांनी आपल्या राज्याभिषेकासाठी निमंत्रित केले आहे. खुद्द प्रिन्स हॅरी यांनी ही माहिती दिली आहे.

त्यांनी एक निवेदन जारी केले आहे. त्यात म्हटले आहे की, त्यांना राजे चार्ल्स यांच्या राज्याभिषेकासाठी आमंत्रित करणारा एक मेल प्राप्त झाला आहे. मात्र, राजेशाही सोडलेल्या या जोडप्याने आपण या कार्यक्रमाला उपस्थित राहणार की नाही, हे स्पष्ट केलेले नाही.

बकिंगहॅम पॅलेसचा टिप्पणी करण्यास नकार

दुसरीकडे, बकिंगहॅम पॅलेसने या निमंत्रणावर प्रतिक्रिया देण्यास नकार दिला आहे. खरं तर, याआधी असे अनेक अहवाल समोर आले होते ज्यात प्रिन्स हॅरी आणि मेघन यांना राज्याभिषेकाला आमंत्रित केले जाणार नाही, असा दावा करण्यात आला होता. बीबीसीच्या वृत्तानुसार, मे महिन्यात होणाऱ्या राजा चार्ल्स यांच्या राज्याभिषेकासाठी काही खास लोकांना निमंत्रण देण्यात आले होते.

या सर्वाना छापील कार्ड पाठवण्यात आले आहेत. याआधीच प्रिन्स हॅरी यांना एका मुलाखतीदरम्यान विचारण्यात आले की, ते आपल्या वडिलांच्या राज्याभिषेकाला उपस्थित राहणार का? यावर हॅरी यांनी प्रतिक्रिया देताना म्हटले होते की, माझे दरवाजे त्यांच्यासाठी नेहमीच खुले आहेत, आता त्यांना हे ठरवायचे आहे की, मला बोलवायचे की नाही.

3 दिवसांपूर्वीच हॅरी-मेगन यांच्याकडून काढून घेतले रॉयल हाऊस

ड्यूक आणि डचेस ऑफ ससेक्स यांना बकिंगहॅम पॅलेसने तीन दिवस आधीच रॉयल हाऊस सोडण्यास सांगितले होते. हा आदेश राजा चार्ल्स यांनी दिला होता. ब्रिटिश वृत्तपत्र 'द सन'ने दिलेल्या माहितीनुसार, घर रिकामे केल्यानंतर सर्व सामान अमेरिकेतील कॅलिफोर्नियाला पाठवले जाईल.

रॉयल फॅमिली सोडल्यापासून हॅरी-मेगन अमेरिकेत राहत आहेत. एवढेच नाही तर चार्ल्स यांनी हे घर त्यांचे बंधू प्रिन्स अँड्र्यूसाठी रिकामे केले आहे. म्हणजेच, आता प्रिन्स अँड्रयू येथे राहणार आहेत.

डॉक्यूमेंट्री आणि पुस्तकामुळे बिघडले नातेसंबंध

2020 मध्ये प्रिन्स हॅरी आणि मेगन मर्केल यांनी राजेशाही सोडताच ब्रिटनच्या राजघराण्याशी संबंध बिघडले. तथापि, प्रिन्स हॅरी यांची नेटफ्लिक्सवर नुकतीच प्रदर्शित झालेली डॉक्युमेंट्री आणि त्यानंतरचे त्यांचे 'स्पेअर' हे पुस्तक यामुळे दोन्ही बाजूंमधील वाद आणखी वाढला आहे. पुस्तक आणि डॉक्यूमेंट्रीत प्रिन्स हॅरी यांनी राजघराण्यावर अनेक प्रकारे टीका केली आहे.

पुस्तकातील खुलासे येथे वाचा...