UN मध्ये भाषण देणाऱ्या नित्यानंदाच्या शिष्येचे स्पष्टीकरण:म्हणाल्या- आम्ही भारताचा आदर करतो; आधी म्हटले होते– हिंदूविरोधींकडून नित्यानंद टार्गेटवर

भारताचा वाँटेड स्वयंघोषित आध्यात्मिक गुरू नित्यानंदच्या शिष्या विजयप्रिया यांनी 1 मार्च रोजी जीनिव्हा येथे झालेल्या संयुक्त राष्ट्रांच्या बैठकीत म्हटले होते की, हिंदूविरोधी लोक नित्यानंद यांना त्यांच्या जन्मस्थानी त्रास देत आहेत. आता विजयप्रिया यांचा एक व्हिडिओ समोर आला आहे. यामध्ये त्या आपल्या वक्तव्यावर स्पष्टीकरण देताना दिसत आहे.

त्या म्हणाल्या- मी स्पष्ट करू इच्छिते की मी भारताविरोधात काहीही बोलले नाही. आम्ही भारताचा आदर करतो. माझ्या विधानाचा गैरसमज होत आहे. मीडियातील काही हिंदुद्वेषी मंडळी माझ्या विधानाचा जाणीवपूर्वक विपर्यास करत आहेत.

हिंदुत्वविरोधी गटांवर कारवाईची मागणी केली

विजयप्रिया म्हणाल्या- भारत सरकारने या हिंदूविरोधी गटांवर कारवाई करावी अशी आमची इच्छा आहे. हे गट कैलासाविरुद्ध सातत्याने हल्ले आणि हिंसाचार भडकावत आहेत. हिंदुद्वेषी लोक हा भारतीय लोकसंख्येचा फारच छोटा भाग आहे. त्यांच्या कृतीमुळे संपूर्ण भारतावर प्रश्न निर्माण होऊ शकत नाहीत. हिंदुत्वविरोधी लोकांच्या कारवाया बंद करण्यासाठी भारत सरकारने पावले उचलणे आवश्यक आहे.

यूएनमध्ये पारंपरिक कपडे आणि दागिन्यांमध्ये दिसल्या विजयप्रिया

स्वित्झर्लंडमधील जीनिव्हा येथे संयुक्त राष्ट्रांच्या बैठकीदरम्यान, कैलासाच्या (विजयाप्रिया) महिला भक्ताने आर्थिक आणि सामाजिक हक्कांसह शाश्वत विकास या विषयावरील चर्चेत भाग घेतला. कैलासाचे प्रतिनिधी नित्यानंदप्रमाणेच पारंपरिक कपडे आणि दागिन्यांमध्ये दिसले. नित्यानंद यांनी ट्विट करून याची माहिती दिली होती.

नित्यानंदवर बलात्काराचा आरोप, संयुक्त राष्ट्रांचाच याबाबत अहवाल

नित्यानंदवर भारतात बलात्कार आणि शिष्यांचे अपहरण केल्याचा आरोप होता. 2019 मध्ये तो देश सोडून पळून गेला. नंतर त्याने अमेरिकेजवळ 'रिपब्लिक ऑफ कैलास' नावाचे स्वतःचे वेगळे बेट स्थापन करण्याचा दावा केला. मात्र, आजपर्यंत कोणत्याही देशाने या बेटाला किंवा देशाला मान्यता दिलेली नाही.

जीनिव्हा बैठकीपूर्वीच यूएनमधील कैलासाच्या प्रतिनिधींचे काही अहवाल प्रसिद्ध केले आहेत. यामध्ये हिंदूंसोबतच कैलासातील धर्मगुरू नित्यानंदवर झालेल्या अत्याचाराचा उल्लेख करण्यात आला होता. याशिवाय हे अहवाल UN समितीत कैलासाच्या वेबसाइटवरही दाखवण्यात आले होते. कैलासाने यूएनला महिला आणि अल्पसंख्याकांच्या हक्कांबाबतही अहवाल सादर केला आहे.

कैलास UNच्या सदस्य राष्ट्रांचा भाग नाही

UNच्या अधिकृत वेबसाइटमध्ये 193 सदस्य राष्ट्रांमध्ये कैलासाचा समावेश नाही. किंबहुना, 'तथाकथित' देशाला (किंवा संघटनेला) UNच्या ठराविक अधिवेशनांना प्रतिनिधी पाठवण्याचा अधिकार आहे. यासाठी UN सदस्य असणे आवश्यक नाही. पॅलेस्टाइन आणि बलुचिस्तानचे प्रतिनिधीही संयुक्त राष्ट्रांच्या बैठकीचा भाग राहिले आहेत. आजपर्यंत कोणत्याही देशाने कैलासाला स्वतंत्र देश म्हणून मान्यता दिलेली नाही.