दक्षिण कोरियाचा चित्रपट पाहिल्याने उत्तर कोरियात 2 विद्यार्थ्यांना मृत्यूदंड:भर चौकात गोळ्या घातल्या; शत्रू देशाचा चित्रपट पाहणे गुन्हा

उत्तर कोरियातून एक स्तब्ध करणारी घटना समोर आली आहे. इथे माध्यमिक शाळेत शिकणाऱ्या दोन विद्यार्थ्यांना मृत्यूदंडाची शिक्षा देण्यात आली. त्यांची चूक इतकीच होती की त्यांनी दक्षिण कोरियात तयार झालेला एक शो पाहिला.

रेडिओ फ्री एशियाच्या वृत्तानुसार, दोन्ही विद्यार्थ्यांचे वय 15-16 वर्षांदरम्यान होते. त्यांना भरदिवसा लोकांसमोर गोळ्या घालण्यात आल्या. वास्तविक, उत्तर कोरिया आणि दक्षिण कोरियात नेहमी तणाव राहतो. त्यामुळे उत्तर कोरियातील लोक दक्षिण कोरियातील शो आणि चित्रपट पाहू शकत नाही.

प्रत्यक्षदर्शी म्हणाले - आम्हाला शिक्षा पाहण्यास भाग पाडले

कोरियन मीडियाचा हवाला देत ब्रिटिश वृत्तपत्र 'द इंडिपेन्डन्ट'ने लिहिले आहे की, ही घटना ऑक्टोबरमधील आहे. पण ती आता समोर आली आहे. एका प्रत्यक्षदर्शीने सांगितले की, राष्ट्राध्यक्ष किम जोंग ऊन यांच्या अधिकाऱ्यांनी हेसन शहरातील नागरिकांना एका मोकळ्या मैदानात गोळ्या होण्यास सांगितले. येथे काही अधिकाऱ्यांनी जमावासमोर विद्यार्थ्यांना मृत्यूदंडाची शिक्षा सुनावली आणि त्यांना गोळी मारली.

कोरियन ड्रामा वितरणाचाही आरोप

दोन्ही विद्यार्थी उत्तर कोरियाच्या रियांगगँग प्रांतातील एका माध्यमिक शाळेत भेटले होते. तिथे त्यांनी दक्षिण कोरियन आणि अमेरिकन ड्रामा आणि चित्रपट बघितले. या दोघांवर इतरांनीही कोरियन ड्रामा दाखवल्याचे आरोप केले. वृत्तात असेही म्हटले आहे की, दोघांनी त्यांच्या मित्रांनाही कोरियन ड्रामाचे वितरण केले.