कबरींवर काढला राग:पुतिन यांच्या पालकांच्या कबरीवर महिलेने लिहिले- तुम्ही राक्षस जन्माला घातलाय, कोर्टाने ठोठावली 2 वर्षांची शिक्षा

रशियातील एका न्यायालयाने सेंट पीटर्सबर्ग येथील एका महिलेला दोन वर्षांच्या तुरुंगवासाची शिक्षा सुनावली आहे. न्यायालयाने महिलेला ऑक्टोबरमध्ये राष्ट्राध्यक्ष व्लादिमीर पुतीन यांच्या आई-वडिलांच्या कबरींची विटंबना केल्याबद्दल दोषी ठरवले होते.

इरिना सिबानेवा नावाच्या या महिलेने पुतीन यांच्या आई-वडिलांच्या कबरीजवळ एक चिठ्ठी टाकली होती. या चिठ्ठीत लिहिले होते की, तुम्ही एका राक्षसाला जन्माला घातले आहे. इरिनाने हे सर्व राजकीय द्वेषातून केल्याचे न्यायालयाने निकालात म्हटले आहे.

महिलेने लिहिले - पुतिनचा मृत्यू व्हावा, ही संपूर्ण जगाची इच्छा
फिर्यादीने महिलेला 3 वर्षांच्या तुरुंगवासाची शिक्षा व्हावी अशी मागणी केली होती. कटाचा एक भाग म्हणून इरिनाने पुतिन यांच्या कुटुंबाचा अपमान केल्याचे त्यांनी म्हटले होते. चिठ्ठीत महिलेने पुतीन यांच्या आई-वडिलांचे वर्णन एका वेड्याचे पालक असे केले आहे. त्यांनी असेही लिहिले की, "पुतिन जगासाठी संकट निर्माण करत आहेत. तुम्ही त्यांना तुमच्याकडे बोलावा. पुतिन मरण पावावेत, अशी सर्व जग प्रार्थना करत आहे."

युद्धाच्या बातम्या पाहून भीती वाटली म्हणून हे केले
महिलेने कोर्टात आपली बाजू मांडली. ती म्हणाली की, युद्धाच्या बातम्या पाहून मी घाबरले. माझी भीती इतकी वाढली होती की मला ते थांबवता येत नव्हते. आता ती चिठ्ठी कधी लिहिली होती आणि त्यात काय लिहिले होते तेही आठवत नाही.

मला माफ करा, माझ्या कृतीमुळे एखादा इतका दुखावला जाईल याची मला कल्पना नव्हती. ही नोट कोणाला मिळेल असे वाटले नव्हते, असे महिलेने कोर्टात सांगितले.

रशियन सैन्याचा अपमान केल्याबद्दल इतिहास शिक्षकाला शिक्षा
त्याच वेळी, इरिना सिबानेवव्यतिरिक्त, रशियाच्या लष्करी न्यायालयाने गुरुवारी निकिता तुष्कानोव्ह या इतिहासाच्या शिक्षकाला साडेपाच वर्षांच्या तुरुंगवासाची शिक्षा सुनावली. गेल्या वर्षी क्रिमियातील केर्च ब्रिजवर युक्रेनच्या हल्ल्याचे त्यांनी समर्थन केले. त्यानंतर न्यायालयाने त्यांना लष्कराचा अपमान आणि हिंसाचाराचे समर्थन केल्याबद्दल दोषी ठरवले. इतिहास शिक्षिका निकिता तुष्कानोव्ह यांनी केर्चवरील हल्ल्याला पुतिनसाठी वाढदिवसाची भेट म्हटले होते.