पाकिस्तानची भारताला अण्वस्त्र हल्ल्याची धमकी:महिला मंत्री म्हणाल्या - आम्ही शांत बसण्यासाठी अणुबॉम्ब बनवलेला नाही

पाकिस्तानच्या शहबाज सरकारच्या मंत्री शाजिया मर्री यांनी भारताला अण्वस्त्र हल्ल्याची धमकी दिली आहे. शाजिया म्हणाल्या की, आम्ही शांत बसण्यासाठी अणुबॉम्ब बनवलेला नाही. पाकिस्तानचे परराष्ट्र मंत्री बिलावल भुट्टो झरदारी यांच्या विधानाचाही भारतात जोरदार विरोध होत आहे.

बिलावल यांच्या समर्थनार्थ घेतलेल्या पत्रकार परिषदेत शाजिया म्हणाल्या, 'पाकिस्तानला प्रत्युत्तर द्यायचं माहीत आहे. पाकिस्तान एक थप्पड खाऊन दुसरा गाल समोर करणारा देश नाही. भारताकडून काही कारवाई झाल्यास त्याला उत्तर दिले जाईल, असे शाजिया म्हणाल्या. पुढे म्हणाल्या, 'मी अनेक मंचांवर मोदी सरकारने पाठवलेल्या प्रतिनिधींशी लढले आहे.'

पाकिस्तानकडे अणुबॉम्ब आहे, हे भारताने विसरू नये. आमची आण्विक स्थिती गप्प बसण्यासाठी नाही. जेव्हा गरज पडेल तेव्हा आम्ही मागे हटणार नाही.

कटाचा पर्दाफाश व्हायला हवा

शाजिया म्हणाल्या की, भारतीय मंत्र्याने यूएनमध्ये पाकिस्तान हे दहशतवादाचे केंद्र असल्याचे म्हटले आहे. हा सर्व त्यांचा प्रचार आहे. हे फक्त आजचे नाही. आम्ही विरोधात असतानाही लढतो. आपल्यालाही आपल्या देशाचे रक्षण करायचे असून देशाविरुद्धच्या चुकीच्या प्रचाराचे षडयंत्र उघड करायचे आहे. तुम्ही पाकिस्तानवर वारंवार आरोप करत राहिल्यास पाकिस्तान शांतपणे ऐकून घेऊ शकत नाही.

शाजिया म्हणाल्या, आम्ही शांतताप्रिय सभ्य लोक आहोत. बिलावल भुट्टो यांनी भारताचे पंतप्रधान मोदी यांना 'गुजरातचा कसाई' संबोधल्यानंतर दोन्ही देशांमधील तणाव आणखी वाढला आहे. अशा स्थितीत शाजियाचे वक्तव्य प्रक्षोभक आहे.

बिलावल यांचे वादग्रस्त विधान
ओसामा बिन लादेन मेला, पण गुजरातचा कसाई अजूनही जिवंत आहे आणि तो भारताचा पंतप्रधान असल्याचे वादग्रस्त विधान बिलावल भुट्टो यांनी गुरुवारी केले होते.