युक्रेनियन मुलांच्या मदतीसाठी रशियन पत्रकाराचा पुढाकार:नोबेल लिलावातून जमवले 10.35 दशलक्ष, मदतीचे केले आवाहन

रशियन सैन्याने युक्रेनमध्ये कहर केला आहे ज्यामुळे लाखो लोकांना घरे सोडून जावे लागले आहे. यामध्ये लहान मुलांचाही मोठ्या प्रमाणात समावेश आहे. या मुलांना मदत करण्यासाठी जगभरातून मदतीचा पैसा उभा केला जात आहे. दरम्यान, रशियाच्या ‘नोव्हाया गॅझेटा’या स्वतंत्र वृत्तपत्राचे मुख्य संपादक दिमित्री मुराटोव्ह यांनीही युक्रेनियन मुलांना मदत करण्यासाठी आपल्या नोबेल पुरस्काराचा लिलाव केला आहे.

हेरिटेज ऑक्शनतर्फे न्यूयॉर्कमध्ये नोबेल पारितोषिकाच्या लिलावासाठी एका कार्यक्रमाचे आयोजन करण्यात आले होते. एका अज्ञात खरेदीदाराने हे नोबेल पारितोषिक 10.35 दशलक्ष रुपयात विकत घेतले. फिलीपीन पत्रकार मारिया रुसा यांच्यासोबत 'अभिव्यक्ती स्वातंत्र्याचे रक्षण करण्यासाठी' मुराटोव्ह यांना 2021 मध्ये शांततेचा नोबेल पुरस्कार प्रदान करण्यात आला होता.

1993 मध्ये नोवाया गॅझेटाची स्थापना

दिमित्री मुराटोव्ह हे रशियातील अभिव्यक्ती स्वातंत्र्यासाठी दीर्घकाळ काम करत आहेत. त्यांनी काही सहकार्‍यांसह 1993 मध्ये नोवाया गॅझेटा या संस्थेची स्थापना केली. काही वर्षांत, हे वृत्तपत्र रशियाचे अध्यक्ष व्लादिमीर पुतिन यांच्यावर देशाच्या आत आणि बाहेर टीका करणारे एकमेव प्रमुख वृत्तपत्र बनले.

2000 मध्ये नोव्हायाच्या 6 पत्रकारांची हत्या करण्यात आली

मुराटोव्हवर अनेकदा प्राणघातक हल्ले झाले आहेत. गेल्या एप्रिलमध्ये ट्रेनमध्ये त्यांच्यावर एसीटोन मिश्रित ऑइल पेंट फेकण्यात आले होते, त्यात त्याचे डोळे भाजले होते. 2000 साली त्यांच्या वृत्तपत्राच्या लोकांवर हल्ला झाला होता, ज्यामध्ये 6 लोक मारले गेले होते. त्यांच्यामध्ये शोध पत्रकार अण्णा पॉलिटकोव्स्कायांचाही समावेश होता. हेरिटेज ऑक्शनने जारी केलेल्या व्हिडिओमध्ये ते म्हणाले, नोबेल जिंकल्याने तुम्हाला ऐकण्याची संधी मिळते. आज लोकांना हे समजले पाहिजे की युद्ध सुरू आहे आणि ज्यांना सर्वात जास्त त्रास होत आहे त्यांना मदत करणे आवश्यक आहे.

रशियाचा तोश्किव्का शहरावर ताब्याचा दावा

युद्धाच्या परिस्थितीबद्दल बोलताना रशियन सैन्याने सोमवारी पूर्व युक्रेनमधील सेवेरोडोनेत्स्क शहराजवळील सिव्हर्स्की डोनेट्स नदीचा परिसर आणि तोशकिव्का शहराचा ताबा घेतल्याचा दावा केला आहे. सेवेरोडोनेत्स्कवर रशियन हल्ले वाढतच आहेत. दुसरीकडे, युक्रेनने रशियाच्या ताब्यात असलेल्या क्रिमियामध्ये तेल ड्रिलिंग प्लॅटफॉर्मवर हल्ला केला आहे. क्रिमियाच्या राज्य प्रमुखाच्या म्हणण्यानुसार या हल्ल्यात तीन जण जखमी झाले आहेत.