युक्रेनमध्ये युद्धाचे ट्रेलर:फुटीरतावाद्यांनी सुरक्षा प्रमुखांची कार उडवली, गॅस पाइपलाइनमध्येही ब्लास्ट; काल शाळेवर रॉकेट डागण्यात आले

रशियासोबतच्या युद्धाच्या संकटादरम्यान युक्रेनमध्ये सलग दुसऱ्या दिवशी स्फोट झाले आहेत. पूर्व युक्रेनमध्ये कथित रशियन समर्थित फुटीरतावाद्यांनी एका कारला लक्ष्य केले. त्याचवेळी गॅस पाइपलाइनही फोडण्यात आली. या दोन्ही स्फोटांकडे रशियासोबतच्या युद्धाचे ट्रेलर म्हणून पाहिले जात आहे. युक्रेनने या हल्ल्यासाठी रशियाला जबाबदार धरले आहे, तर रशियाने याला युक्रेनचा कट असल्याचे म्हटले आहे.

युक्रेनमधील लुहान्स्कमध्ये शनिवारी सकाळी (युक्रेनच्या वेळेनुसार शुक्रवारी रात्री) झालेल्या हल्ल्यामुळे गॅस पाइपलाइन फुटली, ज्याचा व्हिडिओ देखील व्हायरल होत आहे. हल्ल्यानंतर युक्रेनच्या आपत्कालीन विभागाने लोकांना घरीच राहण्यास तसेच सार्वजनिक वाहतूक न वापरण्यास सांगितले आहे.

रशियाचा आरोप - युक्रेनने कट रचला
इकडे रशियाने युक्रेनमध्ये अशांतता पसरवण्याचा कट रचत असल्याचा आरोप केला आहे. रशियन न्यूज एजन्सी रिया नावोस्तीच्या वृत्तानुसार, युक्रेनच्या फुटीरतावाद्यांनी केलेल्या हल्ल्यात गॅस पाइपलाइनचे नुकसान झाले आहे.

बायडेन म्हणाले - रशिया खोटे बोलत आहे
जो बायडेन यांनी रशियावर खोटे बोलत असल्याचा आणि दिशाभूल केल्याचा आरोप केला आहे. रशियाच्या राष्ट्राध्यक्षांनी आम्हाला स्पष्टपणे सांगावे आणि युक्रेनवर हल्ला करणार नाही, असे वचन द्यावे, असे अमेरिकेने म्हटले आहे. रशियाचे अध्यक्ष पुतीन यांनी नुकतेच सीमेवरून सैन्य मागे घेण्याबाबत सांगितले होते.