मेक्सिकोमध्ये गोळीबार:बंदुकधारींनी सुरक्षादलांवर गोळीबार केला; 10 गुन्हेगार ठार, 3 पोलीस जखमी

मेक्सिकोमधील टेक्सकल्टिटलान येथे मंगळवारी पोलीस आणि बंदूकधाऱ्यांमध्ये चकमक उडाली. यामध्ये 10 बंदुकधारी ठार तर 4 जखमी झाले. यावेळी 3 पोलीस जखमी झाले. या घटनेत सहभागी 7 जणांना पोलिसांनी अटक केली आहे. मेक्सिको सिटीच्या नैऋत्येला सुमारे 130 किमी अंतरावर असलेल्या टेक्सकाल्टिटलान शहरात गोळीबार झाला.

पोलिसांनी घटनास्थळावरून शस्त्रे जप्त केली
पोलिसांनी घटनास्थळावरून 20 रायफल, पिस्तूल, हँडगन, काडतुसे, पाच वाहने, लष्करी गणवेश आणि बुलेटप्रूफ जॅकेट जप्त केले आहेत. मेक्सिकोमध्ये ज्या भागात गोळीबार झाला तो भाग ड्रग डीलर आणि टोळीयुद्धांच्या दहशतीने पछाडलेला आहे. या घटनेची माहिती मेक्सिकोच्या सरकारी वकील कार्यालयाने सोशल मीडियावर एक पोस्ट शेअर करून दिली.

सरकारची चिंता वाढली
राष्ट्राध्यक्ष आंद्रेस मॅन्युएल लोपेझ ओब्राडोर यांचे सरकार या हिंसाचारामुळे हैराण झाले आहे. नुकतेच मेक्सिकोची राजधानी मेक्सिको सिटीमध्ये सुरक्षित रस्त्यांच्या मागणीसाठी लोकांनी निदर्शने केली. मॅन्युएल लोपेझ सरकारने आश्वासन दिले होते की हिंसा आणि गुन्हेगारीला आळा बसेल. आता मंगळवारी सुरक्षा दलांवर झालेल्या गोळीबारामुळे सरकारची चिंता वाढली आहे.

2007 पासून मेक्सिकोमधील परिस्थिती वाईट
2007 पासून मेक्सिकोमध्ये हिंसाचार आणि टोळीयुद्धासारखे गुन्हे वाढले आहेत. 2007 मध्ये माजी राष्ट्राध्यक्ष फेलिप कॅल्डेरॉन यांनी ड्रग्ज माफियांशी लढण्यासाठी लष्कराला बोलावले होते. तेव्हापासून मेक्सिकोतील हिंसाचार तीव्र झाला होता, जो अजूनही थांबण्याचे नाव घेत नाही आहे.