अमेरिकेत भीषण अपघात:रस्त्यावर उभ्या लोकांना कारने चिरडले, 8 ठार, 10 जखमी; मृतांमध्ये बहुतांश प्रवासी

अमेरिकेतील टेक्सासमध्ये एका भरधाव एसयूव्हीने सिटी बसच्या स्टॉपवर उभ्या असलेल्या लोकांना चिरडले. रविवारी झालेल्या या अपघातात 8 जणांचा मृत्यू झाला, तर 10 जण जखमी झाले. टेक्सासमधील ब्राउन्सविले येथील एका शेल्टर होमबाहेर बस स्टॉपवर ही घटना घडली. मृतांमध्ये काही स्थलांतरितांचाही समावेश आहे. कार चालक आरोपीला पोलिसांनी ताब्यात घेतले आहे.

शेल्टर होमच्या संचालकांनी सांगितले की, लोकांना चिरडल्यानंतर वाहन उलटले आणि 200 फूट अंतरापर्यंत घसरत गेले. हा अपघात होता की जाणूनबुजून दिलेली धडक याचा तपास अधिकारी करत आहेत.

अपघाताची 3 छायाचित्रे...

आरोपीचे तपासात सहकार्य नाही

पोलिस अधिकारी सँडोवाल यांनी सांगितले की, आरोपी चालक काहीही सांगण्यास नकार देत आहे. तो तपासात अजिबात सहकार्य करत नाही. उपचारानंतर त्याला शहर कारागृहात हलवण्यात येणार आहे. यानंतर त्याच्या बोटांचे ठसे आणि फोटो घेऊन त्याची ओळख पटवली जाईल. त्याचबरोबर आरोपी दारूच्या नशेत होता की नाही हे जाणून घेण्यासाठी त्याच्या रक्ताच्या नमुन्याचा अहवाल घेण्यात आला आहे.

अहवालानुसार, ब्राउन्सविलेमध्ये फक्त एकच स्थलांतरित शेल्टर होम आहे, जे हजारो स्थलांतरितांचे व्यवस्थापन करते. टाईम मासिकाच्या अहवालानुसार, या शेल्टर होमची क्षमता केवळ 250 लोकांची आहे, तर दररोज सुमारे 400 लोक त्यांच्याकडे येतात. काही आठवड्यांत, स्थलांतरितांची संख्या इतकी वाढली आहे की स्थानिक प्रशासनाला तेथे आणीबाणी लागू करावी लागली आहे.