बळीराजा हवालदिल ‎:"मुळा''च्या 96 थकबाकीदार शेतकऱ्यांना‎ 29 लाख 80 हजार वसुलीच्या नोटिसा‎

मुळा पाटबंधारे विभागाने २० हजारांपेक्षा‎ अधिक पाणीपट्टी थकीत असलेल्या ९६‎ शेतकऱ्यांना सुमारे २९ लाख ८० हजार‎ रुपयांच्या वसुलीपोटी नोटिसा‎ बजावल्या आहेत. थकबाकी न‎ भरल्यास नोटिसीत शेतजमिनीच्या‎ सात-बारा उताऱ्यावर बोजा‎ चढवण्याचा इशारा दिला आहे.‎ जिल्हा शेती समृद्ध असला, तरी‎ शेतकऱ्यांनी पिकवलेल्या मालाला‎ समाधानकारक भाव मिळत नाही. १‎ नंबर कांद्याला ८ ते १० रुपये, तर तीन‎ नंबर कांद्याला १ रुपया ते ६ रुपये‎ प्रतिकिलो भाव मिळाला. कांद्याचे‎ कोसळलेल्या दरामुळे शेतकऱ्यांच्या‎ डोळ्यांत पाणी आहे.

अशातच‎ सिंचनाच्या पाणीपट्टीची थकबाकी‎ मानगुटीवर बसल्याने बळीराजा‎ हवालदिल झाला आहे. जलसंपदा‎ विभागाने १० नोव्हेंबर २०२१ रोजी एक‎ परिपत्रक काढून २० हजारापेक्षा अधिक‎ पाणीपट्टी थकीत असलेल्या‎ शेतकऱ्यांच्या जमिनीवर आकारणीचा‎ बोजा चढवण्याचे निर्देश दिले होते.‎ याच निर्देशांचा संदर्भ देत, जलसंपदा‎ विभागाने १३ डिसेंबर २०२२ रोजी‎ नाशिक, अहमदनगर, मुळा, पालखेड,‎ मालेगाव पाटबंधारे पाटबंधारे‎ विभागाच्या कार्यकारी अभियंत्यांना‎ सूचना दिल्या आहेत. त्यानंतर मुळा‎ पाटंबधारे विभागाने शेतकऱ्यांना‎ नोटिसा बजावण्यास सुरूवात केली‎ आहे. जिल्ह्यात असे ९६ थकबाकीदार‎ शेतकरी आहेत. राहुरी, घोडेगाव या‎ उपविभागात २० हजारावरील‎ शेतकऱ्यांकडे थकबाकी नसल्याची‎ माहिती पाटबंधारे विभागाकडून‎ मिळाली.‎

कोणत्या नियमानुसार कारवाई?‎
महाराष्ट्र सिंचन कायदा १९७६ मधील प्रकरण पाच‎ मधील भाग ८ त्यातील परिच्छेद ८८ (१) नुसार‎ पाणीपट्टी वसूल न झाल्यास वाढीव दराने‎ आकारणी करणे तसेच परिच्छेद ८८ (२) नुसार‎ भरणा न केल्यास महाराष्ट्र जमीन महसूल‎ अधिनियम १९६६ मधील तरतुदीनुसार थकबाकी‎ जमीन महसूल थकबाकी मानली जाईल, अशी‎ तरतूद असल्याचे १० नोव्हेंबर २०२१ च्या‎ शासनाच्या परीपत्रात म्हटले आहे.‎

बहुतांश थकबाकी २००५ पूर्वीची?‎
जिल्ह्यात २००५ नंतर पाणीवापर संस्था स्थापन झाल्या‎ आहेत. त्यापूर्वी सिंचनासाठी वैयक्तीक लाभार्थी‎ असलेल्या बहुतांश शेतकऱ्यांकडे २० हजारांवर‎ पाणीपट्टी थकीत आहे. जिल्ह्यात सद्यस्थितीत २७९‎ पाणीवापर संस्था आहेत. यापैकी काही संस्थांकडेही‎ पाणीपट्टी थकीत आहे. मार्च अखेर असल्याने‎ वसुलीसाठी जलसंपदा विभाग अॅक्शन मोडवर आहे.‎ दरम्यान, नुना सात नुसार ५५ हजार ९३२ शेतकऱ्यांकडे‎ सुमारे ५ कोटी ६१ लाखांची थकबाकी आहे.‎

मुळा विभागाची शेतकरी संख्या व थकबाकी‎
नेवासे उपविभाग: वडाळा ७५ शेतकरी, थकबाकी - २३१५३५९ नेवासे १ -१५ शेतकरी, थकबाकी ३६१२२३,‎ नेवासे २ - ४ शेतकरी, थकबाकी १४७९८ खडका - १२ शेतकरी, थकबाकी ४९३७६‎ चिलेखनवाडी, कुकाणा उपविभाग ‎: शिरसगाव १- शेतकरी ३, थकबाकी २५५९३ ‎, शिरसगाव २ -‎ शेतकरी १, थकबाकी ६२४२७ अमरापूर उपविभाग : देडगाव - शेतकरी १, थकबाकी २५२८७ ‎,‎ राहुरी व घोडेगाव उपविभागात शेतकऱ्यांकडे २० हजारांवरील बाकी नाही.‎