प्रवाशांची सोय:नगर विभागात 30 नवीन बसेस प्रवाशांच्या सेवेत‎, नव्या बसेसमुळे एकूण संख्या 638वर

राज्य परिवहन महामंडळाच्या अहमदनगर‎ विभागात नव्याने ३० एसटी बसगाड्या‎ दाखल झाल्या आहेत. जिल्ह्यातील‎ प्रवाशांच्या सेवेसाठी ६३८ बस उपलब्ध‎ असून दररोज सुमारे ७० लाखांचे उत्पन्न ‎ ‎ एकट्या अहमदनगर विभागाला मिळत‎ आहे.‎ सरकारने महिलाच्या प्रवासभाड्यात ५० ‎टक्के सवलत दिल्यामुळे प्रवासी संख्येत‎ वाढ झाली आहे. महिला प्रवाशांच्या‎ सवलतीची रक्कम शासनाकडून‎ राज्यपरिवहन महामंडळाला प्राप्त होते.‎

महिला प्रवासापोटी एसटी महामंडळाच्या‎ नगर विभागाला दरमहा सुमारे ५ कोटीपर्यंत‎ उत्पन्न मिळते आहे. दररोज मिळणाऱ्या‎ एकुण ७० लाखांच्या उत्पन्नापैकी महिला‎ प्रवासापोटी सुमारे २० ते ३० लाखांचे उत्पन्न‎ एसटीला मिळत आहे.‎ सण, उत्सव, यात्रा आदी हंगामानुसार‎ उत्पन्नाचा आकडा कमी-अधिक होतो.‎ त्यातच नव्याने ३० एसटी बस दाखल‎ झाल्या असल्याने उत्पन्न वाढीसही त्याचा‎ फायदा झाला आहे. ३० पैकी २० बस‎ तारकपूर आगारात तर १० गाड्या संगमनेर‎ आगाराला देण्यात आल्या आहेत.‎ एसटीच्या अमृत महोत्सवानिमित्त पहिली‎ इलेक्ट्रिक बस जूनमध्ये नगर ते पुणे धावली‎ होती. परंतु, चार्जिंग पॉइंटच्या अडचणींमुळे‎ इलेक्ट्रिक शिवाई बस, पुणे विभागाकडे वर्ग‎ करण्यात आली आहे. सद्यस्थितीत‎ जिल्ह्यात विविध ६३८ बस प्रवाशांच्या‎ सेवेसाठी उपलब्ध आहेत. कोरोना‎ कालावधी बंद झालेल्या बहुतांश भागात‎ ग्रामीण फेऱ्या सुरू झाल्या आहेत.‎