कारवाई‎:70 एकर जमिनीच्या खरेदी-विक्री‎ व्यवहाराला पोलिसांकडून ब्रेक‎

नगर अर्बन बँकेतून घेतलेल्या सुमारे तीन कोटी‎ रुपये कर्जाच्या रकमेचा गैरवापर करत सदर‎ रक्कम श्रीगोंदे तालुक्यात सुमारे ७० एकर‎ जमीन खरेदी करण्यासाठी वापरण्यात आल्याचे‎ समोर आले आहे. या जमिनीचे पुढील खरेदी व‎ विक्रीचे व्यवहार थांबविण्याबाबत महसूल व‎ भूमिअभिलेख विभागाला पत्र देण्यात‎ आल्याची माहिती आर्थिक गुन्हे शाखेचे‎ उपअधीक्षक कमलाकर जाधव यांनी सांगितले.‎ माजी संचालक राजेंद्र गांधी यांच्या‎ फिर्यादीवरून दाखल असलेल्या नगर अर्बन‎ बँकेतील १५० कोटींच्या घोटाळ्याप्रकरणी‎ आर्थिक गुन्हे शाखेकडून तपास सुरू आहे.‎

बँकेच्या सर्व कर्ज प्रकरणांचे फॉरेन्सिक ऑडिट‎ सुरू आहे. त्यातून अनेक धक्कादायक बाबी‎ समोर आल्या आहेत. बँकेच्या काही माजी‎ पदाधिकार्‍यांनी कर्जत व श्रीगोंदे तालुक्याच्या‎ काही भागातून महामार्ग जाणार असल्याने‎ त्यावेळी जमिनीला किंमत येईल, या उद्देशाने‎ श्रीगोंदे तालुक्यातील एका गावात सुमारे ७०‎ एकर जमीन खरेदी केली आहे. या खरेदीसाठी‎ बँकेतून पैसे वर्ग झाल्याचे समोर आल्याने‎ पोलिसांनी या संबंधित जमिनीच्या विक्रीचे‎ होणारे व्यवहार पाहून संबंधित शासकीय‎ कार्यालयांशी पत्र व्यवहार केला होता. त्यानंतर‎ या जमिनीच्या खरेदी व विक्रीच्या व्यवहारावर‎ निर्बंध घातले असल्याचे जाधव यांनी‎ सांगितले. दरम्यान, बँकेतून घेतलेल्या कर्जाच्या‎ रकमेचा गैरवापर झाल्याचे तपासात स्पष्ट झाले‎ आहे. फॉरेन्सिक ऑडिट मधून या पैशांचा‎ वापर कुठे झाला, या रकमा कोणापर्यंत‎ पोहोचल्या याची माहिती समोर येत आहे.‎ जमीन खरेदीसाठी कर्जाच्या रकमेचा वापर‎ झाल्याचे समोर आले असले, तरी अशी‎ आणखी प्रकरणे समोर येऊ शकतात, असे‎ सांगत फॉरेन्सिकचा अंतिम अहवाल लवकरच‎ येईल, असेही उपअधीक्षक जाधव यांनी‎ सांगितले.‎