दहावीची परीक्षा:पहिल्याच पेपरला 910 विद्यार्थ्यांची दांडी‎

उच्च माध्यमिक व माध्यमिक शिक्षण‎ मंडळाच्या वतीने घेण्यात येत असलेल्या‎ दहावीच्या परीक्षेला गुरुवारपासून (२ मार्च)‎ नगर जिल्ह्यातील १७९ परीक्षा केंद्रांवर सुरुवात‎ झाली. सकाळी ११ वाजता मराठी विषयाचा‎ पेपरला सुरुवात झाली. दहावीच्या परीक्षेला ५८‎ हजार ९१० परीक्षार्थी उपस्थित होते, तर ९११‎ परीक्षार्थींनी दांडी मारली. दरम्यान, नगर‎ शहरातील सेंट झेवियर्स स्कूलमध्ये चक्क‎ माध्यमिक विभागाचे शिक्षण अधिकारी‎ अशोक कडूस यांनी एका कॉपीबहाद्दरास‎ पकडले.‎ नगर जिल्ह्यात २ ते २५ मार्च दरम्यान‎ दहावीची परीक्षा होत आहे. या परीक्षेसाठी‎ कॉपीमुक्त अभियान राबविण्यात येत असून,‎ त्यासाठी जिल्हाधिकारी सिद्धाराम साळीमठ‎ यांच्या अध्यक्षतेखाली पथकांची नियुक्ती‎ करण्यात आली आहे.

त्यात जिल्हा परिषदेचे‎ मुख्य कार्यकारी अधिकारी, माध्यमिक‎ शिक्षणाधिकारी, शिक्षण अधिकारी (योजना),‎ प्राथमिक शिक्षणाधिकारी व प्राचार्य यांची ७‎ पथके नियुक्त केली आहेत.‎ दहावीच्या परीक्षेसाठी ५९ हजार ८२१‎ विद्यार्थी प्रविष्ट होते. त्यापैकी ५८ हजार ९१०‎ परीक्षार्थी उपस्थित होते, तर ९११ परीक्षार्थींनी‎ दांडी मारली.

सकाळी ११ वाजता नगर‎ शहरासह जिल्ह्यातील १७९ परीक्षा केंद्रांवर‎ दहावीच्या परीक्षेला सुरुवात झाली. विविध‎ केंद्रांबाहेर पाल्यांना शुभेच्छा देण्यासाठी‎ पालकांनीही मोठी गर्दी केली.‎ पेपर झाल्यानंतर विद्यार्थ्यांनी सुटकेचा‎ नि:श्वास सोडत परीक्षा केंद्राबाहेर पडले.‎ विद्यार्थ्यांनी एकमेकांशी चर्चा करत‎ पेपरमधील प्रश्नांबद्दल चर्चा केली.‎ दरम्यान, शहरात एका केंद्राचा अपवाद‎ वगळता मराठीचा पेपर शांततेत पार पडला.‎ आता दुसरा इंग्रजीचा पेपर सोमवारी (६‎ मार्च) आहे. या पेपरच्या तयारीसाठी‎ विद्यार्थ्यांना चार दिवसांचा वेळ मिळणार‎ आहे.‎‎

केंद्रांवर‎ परीक्षार्थींची‎ झडती‎
परीक्षा कक्षात प्रवेश करण्यापूर्वी प्रत्येक‎ केंद्रांवर परीक्षार्थींची झडती घेण्यात आली.‎ विद्यार्थ्यांबरोबरच पालकांचीही परीक्षा‎ केंद्राबाहेर मोठी गर्दी झाली होती. नगर‎ शहरातील जिल्हा मराठा विद्या प्रसारक‎ मंडळाच्या रेसिडेन्शियल हायस्कूल येथील‎ केंद्रांवर परीक्षा सुरू होण्यापूर्वी विद्यार्थ्यांना‎ गुलाबपुष्प देऊन स्वागत करण्यात‎ आले.

कॉपी करताना‎ एकास पकडले‎
कॉपीमुक्त अभियानांतर्गत‎ शहरातील सेंट झेवियर्स स्कूलमध्ये‎ मराठी विषयाच्या पेपरला कॉपी‎ करताना थेट शिक्षणाधिकारी‎ अशोक कडूस यांनी एकास‎ पकडले. दरम्यान, जिल्ह्यातील‎ अन्य परीक्षा केंद्रावरही मोठा‎ पोलिस बंदोबस्त तैनात करण्यात‎ आला आहे.‎