सरकारी दवाखान्यांना रंगरंगोटी:जिल्ह्यात 98 आरोग्य केंद्र, 505 उपकेंद्रातील दवाखाने झाले सुंदर‎, आता पुरस्काराची प्रतीक्षा‎

जिल्ह्यात सरकारी दवाखान्यांना‎ आयुष्मान भारत योजनेंतर्गत रंगरंगोटी‎ करून त्यावर वारली चित्रे रेखाटण्यात‎ आली आहेत. आता सुंदर माझा‎ दवाखाना उपक्रमांतर्गत ७ एप्रिलपासून‎ विविध उपक्रम हाती घेण्यात आले.‎ त्यानुसार रूग्णालय परिसर स्वच्छ‎ करून त्यात सातत्य ठेवण्यासाठी दर‎ शनिवारी स्वच्छता मोहिम राबवली‎ जाते. तथापि, उत्कृष्ट दवाखाना‎ निवडीची प्रक्रिया संथ गतीने सुरू आहे.‎ जागतिक आरोग्य दिनानिमित्त ७‎ एप्रिलपासून सुंदर माझा दवाखाना‎ उपक्रम हाती घेण्यात आला. या‎ मोहिमेत आरोग्य केंद्र, परिसर,‎ स्वच्छतागृहे, भांडारगृहे आदींची‎ स्वच्छता करण्याचे निश्चित केले.‎ त्याचबरोबर रूग्णालयाच्या आवारात‎ दर्शनी भागात सुशोभिकरण, रंगरंगोटी,‎ रूग्णालयातील उपलब्ध सुविधांच्या‎ माहितीचे फलक लावण्यात आले‎ आहेत. स्थानिक रूग्ण कल्याण‎ समिती, स्वयंसेवक, लोकप्रतिनिधी‎ यांचा सहभाग घेण्यात आला. या‎ उपक्रमाला सुरूवात करताना,‎ शासकीय रूग्णालयांची अगोदरची‎ स्थिती व उपक्रम राबवल्यानंतर झालेला‎ कायापालट याच्या नोंदी आरोग्य विभाग‎ घेत आहे. याचा अहवाल फोटोसह‎ शासनाला पाठवला जाणार आहे.‎

दर शनिवारी पाळला‎ जातो स्वच्छता दिवस‎

आरोग्य संस्था स्वच्छ व प्रसन्न‎ ठेवणे, रूग्णालय इमारती आत व‎ बाहेर स्वच्छ करणे.‎ रूग्णालयाबाहेर माहितीचे फलक‎ लावण्यात आले. बगीचा संगोपन‎ करणे, रूग्णालयातील भंडार‎ साहित्याचे निर्लेखन करणे, दर‎ शनिवारी सर्व शासकीय‎ रूग्णालयात स्वच्छता दिवस‎ पाळला जात आहे.‎

प्रत्येक तालुक्यातून एक उपकेंद्र‎ याप्रमाणे १४ आरोग्य उपकेंद्र व‎ जिल्हास्तरावर तीन उत्कृष्ट आरोग्य‎ केंद्रांना पुरस्कार देण्यात येणार आहे.‎ उत्कृष्ट केंद्रांची निवड करण्यासाठी‎ तालुका आरोग्य अधिकाऱ्यांकडून‎ अहवाल मागवण्यात आला होता. परंतु,‎ अहवाल उशिरा आल्याने सुंदर माझा‎ दवाखाना उपक्रमांतर्गत उत्कृष्ट‎ रूग्णालयांची यादी अद्याप निश्चित‎ होऊ शकली नाही.‎ पारितोषिक वितरण १ मे रोजी‎ करण्याचे निर्देश आरोग्य मंत्र्यांनी दिले‎ होते. परंतु, तालुका व जिल्हास्तर‎ समितीकडून अद्याप उत्तम गुणवत्तापूर्ण‎ सेवा प्रदान करणाऱ्या आरोग्य संस्था‎ निश्चित झाल्या नसल्याने पारितोषिक‎ वितरण रखडले आहे.‎

आरोग्य उपसंचालकांना पाठवला अहवाल‎

प्रत्येक तालुक्यातील एक उपकेंद्र व जिल्हास्तरावर तीन आरोग्य‎ केंद्रांची निवड करण्यात येणार आहे. या उपक्रमात उत्कृष्ट उपकेंद्राला‎ दहा हजार तर आरोग्य केंद्राला २० हजार रूपयांचे पारितोषीत दिले‎ जाणार आहे. जिल्हा गुणवत्ता समिती स्तरावर कार्यवाही सुरू आहे. तर‎ पुढील प्रक्रियेसाठी आरोग्य उपसंचालकांना अहवाल पाठवला आहे.‎ - डॉ. रवींद्र सोनवणे, आरोग्य अधिकारी.‎

या रूग्णालयांत राबवले अभियान‎

जिल्ह्यात जिल्हा परिषदे अंतर्गत ग्रामीण भागात ९८‎ आरोग्य केंद्र व ५५५ आरोग्य उपकेंद्र आहेत. या ठिकाणी‎ मोहिम राबवली जाणार आहे. तसेच जिल्हा रूग्णालय,‎ ३ उपजिल्हा, २२ ग्रामीण रूग्णालयात, सुंदर माझा‎ दवाखाना अभियान राबवले जात आहे.‎