दळणवळण:अहमदनगर-अक्कलकोट ‘ग्रीन फिल्ड’ नगरच्या‎ १८ गावांतून जाणार; ऑक्टोबरला प्रत्यक्षात काम!‎

सुरत-चेन्नई या राष्ट्रीय महामार्गाचे नगर जिल्ह्यातील‎ शेवटचे टोक म्हणजे शहापूर (चांदबिबी महल).. या‎ शहापूरपासूनच अहमदनगर-अक्कलकोट हा नवीन सहा‎ पदरी ‘ग्रीन फील्ड’ एक्सप्रेस-वे तयार होत आहे. हा नवा‎ ‘ग्रीन फील्ड’ नगर जिल्ह्यातील १८ गावांमधून जाणार‎ असून, त्यासाठी ५५९ हेक्टर जमिनीचे संपादन केले‎ जाणार आहे. आतापर्यंत ११ गावांची मोजणी पूर्ण झाली‎ असून, मार्चअखेरपर्यंत मोजणी व भूसंपादन पूर्ण केले‎ जाईल.

त्यानंतर ऑक्टोबरपासून प्रत्यक्ष कामाला सुरुवात‎ होणार आहे.‎ नगर शहराजवळील चांदबिबी महालाजवळून‎ अहमदनगर-बीड-सोलापूर- अक्कलकोट हा नवा ‘ग्रीन‎ फील्ड’ एक्सप्रेस-वे जात आहे. सुरत - चेन्नई या राष्ट्रीय‎ महामार्गाचा हा एक टप्पा असून, एकूण ४ हजार कोटींचा‎ हा प्रकल्प आहे. नगर व बीड जिल्ह्यातील ३७ गावांतून हा‎ ‘ग्रीन फील्ड’ जाईल. नगर जिल्ह्यातील नगर, जामखेड या‎ दोन तालुक्यांतील १८ गावांचा त्यात समावेश असणार‎ आहे.

आतापर्यंत १८ पैकी ११ गावांतील जमिनीची मोजणी‎ पूर्ण झाली आहे. नगर तालुक्यातील शहापूर (चांदबिबी‎ महल) येथे सुरू असलेल्या १० किलोमीटर अंतराच्या‎ ‘ग्रीन फील्ड’मार्गे चिंचोडी पाटील येथून आष्टी व‎ जामखेडला हा महामार्ग जोडला जाणार आहे.‎ हैदराबादचा दुसरा टप्पा हा ‘ग्रीन फील्ड’ असेल. विशेष‎ म्हणजे नगरमधून तयार होऊन जाणारा हा पहिलाच ‘ग्रीन‎ फील्ड’ एक्सप्रेस-वे असणार आहे. ऑक्टोबरपासून‎ प्रत्यक्ष या ‘ग्रीन फील्ड’चे काम सुरू होणार आहे.‎

अक्कलकोटचा प्रवास‎ सुखकर होणार
‎नगर शहराजवळून जाणारा‎ अहमदनगर - बीड - सोलापूर -‎ अक्कलकोट हा ‘ग्रीन फील्ड’‎ शहापूरपासूनच सुरत- चेन्नईला‎ जोडण्यात येणार आहे. नवा नगर‎ अक्कलकोट मार्ग पूर्ण‎ झाल्यानंतर नगरहून जाणाऱ्या‎ प्रवाशांना अवघ्या ३ तासांत‎ अक्कलकोटला जाता येणार‎ आहे.‎

मार्चपर्यंत ग्रीन फील्डची‎ मोजणी पूर्ण होणार‎
ग्रीन फील्ड एक्सप्रेसवे हा सहा‎ पदरी आहे. मार्च अखेरपर्यंत ही‎ मोजणी पूर्ण करण्याचे उद्दिष्ट आहे.‎ जुलै महिन्यापासून प्रत्यक्षात भूसंपादन‎ केले जाणार आहे. त्यानंतर निविदा‎ प्रक्रिया राबवून पुढची प्रक्रिया सुरू‎ होणार आहे. ऑक्टोबरपासून प्रत्यक्ष‎ रस्त्याचा कामाला सुरुवात होणार‎ आहे. मिलिंद वाबळे, उपमहाप्रबंधक,‎ राष्ट्रीय महामार्ग प्राधिकरण‎

आष्टीतील दोन‎ गावांचे भूसंपादन‎
‎अहमदनगर - बीड - सोलापूर -‎ अक्कलकोट हा ‘ग्रीन फील्ड’ बीड‎ जिल्ह्यातील आष्टी तालुक्यातील १९‎ गावांमधून जाणार आहे. आष्टी‎ तालुक्यातील गावांची भूसंपादन व‎ मोजणीची प्रक्रिया ही नगरच्या‎ राष्ट्रीय महामार्ग प्राधिकरण‎ कार्यालयाकडे आहे. १९ पैकी‎ आतापर्यंत आष्टी तालुक्यातील २‎ गावांचे भूसंपादन पूर्ण झाले आहे.‎

नगर-मनमाडची‎ निविदा आज उघडणार‎
उत्तर व दक्षिण भारतातील‎ भाविकांसाठी महत्त्वाच्या‎ असलेल्या नगर - मनमाड‎ महामार्गाच्या कामाची निविदा‎ गुरुवारी (२ फेब्रुवारी) प्रसिद्ध‎ होणार आहे. त्यानंतर एप्रिल, मे‎ महिन्यात प्रत्यक्षात या कामाला‎ सुरुवात होण्याची शक्यता आहे.‎ विळद ते सावळीविहीर असे ७५‎ किलोमीटरचे हे काम असून, ७९७‎ कोटी रुपयांचा हा प्रकल्प आहे.‎ गेल्या तीन वर्षांपासून हा रस्ता‎ रखडला आहे. त्याची फेरनिविदा‎ प्रसिद्ध करण्यात आली होती.‎

असा जाणार ‘ग्रीन फील्ड’
नगर तालुक्यातील शहापूर येथून हा‎ ‘ग्रीन फील्ड’ सुरू होईल. सुरत -‎ चेन्नईचा हा दुसरा टप्पा असून,‎ चिंचोडी पाटीलमार्गे आष्टी, भूम‎ परांडा, सोलापूर, अक्कलकोट मार्गे‎ आंध्र प्रदेशातील कर्नुल येथे हा‎ ‘ग्रीन फील्ड’ जाणार आहे. कर्नुल‎ येथून हा चेन्नईला जाणार आहे.‎