दिशा ठरवणार:राज्य पेन्शनर्स संघटनेचे रविवारी‎ श्रीरामपूरला जिल्हाव्यापी मेळावा‎

अहमदनगर‎ सर्वोच्च न्यायालयाच्या निर्णयानंतर ईपीएस ९५‎ पेन्शन धारकांच्या पेन्शन वाढीचे ऑनलाईन‎ फॉर्म भरण्यासह भारत सरकारच्या नवी दिल्ली‎ येथे झालेल्या स्थायी समितीच्या बैठकीची‎ माहिती देण्यासाठी व संघटनेची पुढील दिशा‎ ठरविण्यासाठी महाराष्ट्र राज्य पेन्शनर्स‎ संघटनेच्या वतीने रविवारी (७ मे) मेळाव्याचे‎ आयोजन करण्यात आले आहे.‎

या मेळाव्यात जिल्ह्यातील सर्व ईपीएस ९५‎ पेन्शनर्सना सहभागी होण्याचे आवाहन संघटनेचे‎ अध्यक्ष एस.एल. दहिफळे व सरचिटणीस‎ सुभाष कुलकर्णी यांनी केले आहे. नेवासा रोड‎ श्रीरामपूर येथील साखर कामगार हॉस्पिटल येथे‎ साडेबारा वाजता मेळाव्याला प्रारंभ होणार आहे.‎

ऑल इंडिया कॉर्डिनेशन समिती ऑफ ईपीएफ‎ पेन्शन असोसिएशनचे निमंत्रक कॉ. अतुल दिघे‎ यांच्या मार्गदर्शनाखाली मेळावा होणार आहे.‎ सर्वोच्च न्यायालयाच्या निर्णयानंतर‎ बर्‍याचशा पेन्शन धारकांनी पेन्शन वाढीचे फॉर्म‎ भरून दिले आहेत. काहींनी ऑनलाइन भरले‎ आहेत, तर काहींचे ऑनलाइन झालेले नाही.‎ त्यानुसार काही पेन्शन धारकांना सहाय्यक‎ आयुक्त भविष्य निर्वाह निधी कार्यालय नाशिक‎ यांच्याकडून लेखी पत्रही आले आहेत. त्यावरील‎ सविस्तर चर्चा करून पुढील माहिती देण्यात‎ येणार आहे.

पेन्शनधारकांना किमान ९ हजार‎ व महागाई भत्ता मिळावा यासाठी पुढील‎ आंदोलनाची दिशा या मेळाव्यात ठरविण्यात‎ येणार आहे. गेली दहा ते बारा वर्षे प्रयत्न करूनही‎ अद्याप पेन्शन वाढ झाली नाही, त्यामुळे येत्या‎ २०२४ च्या निवडणुकीबाबत काय भूमिका‎ घ्यावी? यासंबंधी मार्गदर्शन केले जाणार आहे.‎