गुन्हा दाखल:शहर‎ विकासाच्या उपोषणानंतर युवक काँग्रेस पदाधिकाऱ्यावर हल्ला, आवाज‎ दाबण्याचा प्रयत्न होत असल्याचा आरोप

काँग्रेसच्या एमआयडीसी कार्यालयासमोरील‎ स्वराज्यरक्षक छत्रपती संभाजी महाराज आयटी पार्कच्या‎ मागणीसाठी शहर काँग्रेसच्यावतीने उपोषण करण्यात‎ आले. उपोषणानंतर गुरुवारी रात्री उशिरा युवक काँग्रेसचे‎ आनंद जवंजाळवर भ्याड हल्ला झाला.

हा प्रकार शहर‎ विकासाच्या मागणीचा आवाज दाबण्याचा प्रयत्न आहे,‎ असा आरोप काँग्रेसचे शहर जिल्हाध्यक्ष किरण काळे‎ यांनी केला. काँग्रेस कार्यालयात शुक्रवारी आयोजित‎ पत्रकार परिषदेत काळे बोलत होते. काळे म्हणाले,‎ तथाकथित बनावट आयटी पार्कचा काँग्रेसने भांडाफोड‎ केला. त्यावेळी माझ्यासह कार्यकर्त्यांवर विनयभंगाचा‎ खोटा गुन्हा दाखल झाला होता.

शहर विकास, तरुणांच्या‎ रोजगारासाठी आम्ही आयटी पार्कच्या मागणीसाठी‎ उपोषण केले. यात जवंजाळ सहभागी झाला होता.‎ म्हणूनच त्याला टार्गेट केले गेले. शहरात दहशत आहे.‎ दहशत करणारे कोण आहेत आणि त्यांचा राजकीय पक्ष‎ कोणता ? हे नगरकरांना माहीत आहे. पण असे भ्याड‎ हल्ले, काँग्रेस खपवून घेणार नाही. सत्तेची मस्ती‎ चढलेल्यांना कायद्याचा धाक उरलेला नाही.

आपण‎ हत्याकांड जिरवू शकतो म्हणजे काहीही करू शकतो,‎ असा त्यांचा गैरसमज झाला आहे. असे कितीही भ्याड‎ हल्ले केले तरी शहर विकासासाठी लढणारे काँग्रेस‎ कार्यकर्ते मागे हटणार नाहीत. तसेच युवक काँग्रेस‎ उपाध्यक्ष आकाश आल्हाटला जीवे मारण्याची धमकी‎ देण्यात आली आहे. तुझा मुलगा आयटी पार्कच्या‎ उपोषणाला का बसला ? असे म्हणत धमकी देऊन‎ विनयभंग केल्याच्या फिर्यादीवरून श्याम कदम, निरज‎ तांबे, अक्षय धाडगे व इतरांच्या विरुद्ध तोफखाना‎ पोलिसांत गुन्हा नोंदवण्यात आला आहे.

जवंजाळवर‎ जिल्हा रुग्णालयात उपचार सुरू आहेत. सर्व आरोपी‎ फरार असल्याचे काळे यांनी सांगितले. यावेळी पत्रकार‎ परिषदेस मनोज गुंदेचा, दशरथ शिंदे, संजय झिंजे,‎ अनिस चुडीवाला, प्रवीण गीते, अलतमश जरिवाला,‎ ॲड. अक्षय कुलट, आकाश अल्हाट आदी उपस्थित‎ होते.‎