‘एच 3 एन 2’सह कोरोना झालेल्या रुग्णाचा मृत्यू:नगरमधील घटना; 19 जणांचे नमुने तपासणीला

देशात नव्याने आढळलेल्या ‘एच ३ एन २’ विषाणूसह कोरोनाबाधित असलेल्या रुग्णाचा नगरमधील खासगी रुग्णालयात उपचार सुरू असताना मृत्यू झाल्याचे समोर आले आहे. एका मेडिकल कॉलेजचा तो विद्यार्थी होता, असे सांगण्यात येत असून आरोग्य यंत्रणा सतर्क झाली आहे. त्याच्या संपर्कातील १९ जणांचे नमुने तपासणीसाठी पाठवण्यात आले आहेत. दरम्यान, मनपा वैद्यकीय आरोग्य अधिकारी डॉ. अनिल बोरागे यांनी याला दुजोरा देत जिल्हा आरोग्य प्रशासनाला याची माहिती देण्यात आल्याचे सांगितले.

देशभरात ‘एच ३ एन २’ या विषाणूचे रुग्ण आढळले आहेत. राज्यातील अनेक शहरांतही रुग्ण आढळले असून, नगरमध्येही संशयित रुग्ण आढळून आला आहे. एका मेडिकल कॉलेजचा तो विद्यार्थी असून, बाहेर फिरून आल्यानंतर त्याला फ्लूची लक्षणे दिसल्याने त्याला रुग्णालयात दाखल करण्यात आले होते. इन्फ्लुएन्झा ए, ‘एच ३ एन २’सह तो कोरोनाबाधित असल्याचा अहवाल रुग्णालयाने दिला आहे.