आजपासून संप:शासकीय कार्यालयातील कामकाज होणार ठप्प‎

जूनी पेन्शन योजना लागू करण्याच्या‎ मागणीसाठी राज्यभरातील सुमारे १८ लाख‎ शासकीय कर्मचारी मंगळवारपासून (ता. १४)‎ बेमुदत संपावर जात आहेत. नगर जिल्ह्यातील‎ प्राथमिक शाळेतील २१ हजार, तर माध्यमिक व‎ उच्च माध्यमिकचे सुमारे ८ हजार ९२८ शिक्षक‎ या संपात सहभागी होणार आहेत. त्यामुळे‎ जिल्ह्यातील शाळांचे कामकाज मंगळवारपासून‎ (१४ मार्च) बेमुदत ठप्प होण्याची शक्यता‎ आहे. तथापि, जिल्हा परिषदेच्या शिक्षण‎ विभागाने अंगणवाडी सेविकांना या शाळांवर‎ पाठवण्याची तयारी केली आहे. त्यामुळे शाळा‎ सुरूच राहणार असल्याचा दावा प्रशासनाने‎ केला आहे. मंगळवारी शिक्षकांचा आनंद‎ विद्यालय ते जिल्हाधिकारी कार्यालयावर मोर्चा‎ निघणार आहे.‎

अंगणवाडी सेविकांना आंदोलनात सहभागी होण्याचे आवाहन‎
शिक्षक समन्वय समितीच्या वतीने सर्व शिक्षकांना आम्ही आंदोलनात सहभागी होण्याचे आवाहन‎ केले आहे. जुन्या पेन्शनची मागणी मान्य होईपर्यंत आम्ही बेमुदत संपावर जात आहोत. विद्यार्थ्यांचे‎ नुकसान भरून काढू, तसेच अंगणवाडी सेविकांनाही शाळेवर जाऊ नये, असे आवाहन केले आहे.‎ सुनील पंडित, मुख्याध्यापक संघ.‎

अशी आहे जिल्ह्यातील‎ शिक्षकांची संख्या‎
जिल्हा परिषद शाळा, तसेच‎ खासगी अनुदानित शाळेतील‎ १४ हजार ५१५, उच्च‎ प्राथमिकचे ४ हजार ५५१,‎ प्राथमिक अधिक उच्च‎ प्राथमिकच्या शाळेवरील २‎ हजार ६८ शिक्षक. माध्यमिक‎ शाळेतील ५ हजार ४०४, उच्च‎ माध्यमिकचे ३ हजार ५२४,‎ माध्यमिक अधिक उच्च‎ विद्यालयातील २९० शिक्षक‎ बेमुदत संपात सहभागी होणार‎ आहेत.‎

उद्याचा संप मोडून काढण्याचा‎ राज्य सरकारचा प्रयत्न‎
आंदोलनात शिक्षक समितीसह सर्व शिक्षक‎ सहभागी आहेत. शासनाच्या बैठकीत तोडगा न‎ निघाल्याने, आता आमचा संप मोडून‎ काढण्यासाठी शासन पर्यायी व्यवस्था करीत‎ आहे. परंतु, आम्ही आमच्या मागण्यांसाठी‎ संपावर ठाम आहोत.‎- रा. या. औटी, शिक्षक समिती.‎

विद्यार्थ्यांच्या नुकसानीस‎ शासन जबाबदार राहील
‎जिल्हाभरातील शिक्षक संपात सहभागी‎ झालेले असून, नगर शहरातील आनंद‎ विद्यालयापासून सर्व शिक्षक मोर्चा काढून‎ जिल्हाधिकारी कार्यालयाकडे जाणार आहेत.‎ विद्यार्थ्यांच्या शैक्षणिक नुकसानीस शासनच‎ जबाबदार असेल.-‎ बापूसाहेब तांबे, शिक्षक नेते, प्राथमिक.‎