क्राईम:दरोडेखोरांच्या हल्ल्यात एक जण ठार‎, अकोले तालुक्यातील सगभोर वस्तीवरील घटना, हल्ल्यात महिला जखमी‎

अकोले‎ तालुक्यातील भंडारदरा धरण‎ परिसरातील वाकी जलाशयाजवळ‎ निवासस्थान असलेल्या मधुकर‎ किसन सगभोर यांच्या वस्तीवर‎ आलेल्या अज्ञात ३ दरोडेखोरांनी‎ केलेल्या हल्ल्यात ३८ वर्षीय‎ घरमालकाचा खून झाला,‎ मारहाणीत पत्नी पुष्पा मधुकर‎ सदगीर (३२) जखमी झाली. ही‎ घटना मंगळवारी (९ मे) पहाटे‎ उघडकीस आली.‎

तालुक्यातील मधुकर सगभोर‎ (वय ३८) यांची वाकी‎ जलाशयाजवळ वस्ती आहे.‎ सोमवारी (८ मे) रात्री दीडच्या‎ सुमारास अज्ञात ३ दरोडेखोरांनी‎ चोरीच्या उद्देशाने मधुकर सगभोर‎ यांच्या वस्तीत रात्रीच्या सुमारास‎ प्रवेश करून धुमाकूळ घातला. या‎ दरोडेखोरांनी घरातील लोकांना‎ मारहाण करून किमतींऐवज व रोख‎ पैशाची मागणी केली. यावेळी‎ घरातील बेन्टेक्सच्या दागिन्यांसह‎ उपलब्ध रक्कम दरोडेखोरांनी‎ हस्तगत केली. यात मधुकर सगभोर‎ यांना मारहाण केल्यामुळे त्यांचा‎ जागीच मृत्यू झाला.

मारहाण करून केले जखमी

घरात‎ झोपलेल्या मधुकर यांच्या पत्नी पुष्पा‎ व मुलगी पायल व इतरांना‎ दरोडेखोरांनी लाकडी दांड्याने‎ मारहाण करून जखमी केले. या‎ घटनेची माहिती वाकीचे पोलिस‎ पाटील सोमनाथ सगभोर यांनी राजूर‎ पोलिसांना कळवली. या घटनेचा‎ तपास सहायक पोलिस निरीक्षक‎ गणेश इंगळे यांच्या मार्गदर्शनाखाली‎ पोलिस उपनिरीक्षक जे. एफ. शेख‎ व पोलिस कर्मचारी दिलीप डगळे,‎ विजय मुंडे, विजय फटांगरे, अशोक‎ काळे, संभाजी सांगळे, साईनाथ‎ वर्षे, पांडुरंग पटेकर, उषा मुठे हे‎ करीत आहेत.

मृत मधुकर यांची‎ मुलगी पायल सगभोर हिच्या‎ फिर्यादीवरून तीन दरोडेखोरांविरुद्ध‎ खून तसेच घरफोडीचा गुन्हा दाखल‎ केला. श्रीरामपूरचे अतिरिक्त‎ पोलिस अधीक्षक स्वाती भोर,‎ संगमनेर येथील पोलिस‎ उपअधीक्षक संजय सातव यांनी‎ घटनास्थळी भेट दिली. दरम्यान,‎ तपासकामी त्यांनी सपोनि गणेश‎ इंगळे यांना सूचना दिल्या.‎