नुकसान:नेवासे तालुका दूध संघाला अखेर टाळे‎

राजकीय हेतूने सुरू असलेल्या सलग‎ कारवायांमुळे नेवासे तालुका दूध संघाला‎ टाळे ठोकण्याचा निर्णय दूध संघ‎ व्यवस्थापनाने घेतला आहे. माजी मंत्री‎ शंकरराव गडाख यांच्या ताब्यातील नेवासे‎ तालुका दूध संघ अखेर बंद करण्यात‎ आल्याने हजारो दूधउत्पादकांचे मोठे‎ नुकसान झाले आहे. संघाची वीज तोडू‎ नये, असा न्यायालयाचा आदेश‎ असतानाही वीजजोड तोडल्याने गडाख‎ यांना राजकीय शॉक दिल्याचे बोलले जाते.‎

नेवासे तालुक्यात दूधउत्पादकांना कुठे दूध‎ घालायचे, असा प्रश्न निर्माण झाला,‎ त्यावेळी आमदार गडाख यांच्या‎ मार्गदर्शनाखाली या दूध संघाची निर्मिती‎ झाली होती. मोठे राजकीय वजन वापरून,‎ सतत पाठपुरावा करुन गडाख यांनी त्यास‎ परवानगी मिळवली. संघामार्फत‎ तालुक्यातील ७२ गावांत दूध थंड‎ करण्यासाठी चिलिंग मशीनसाठी अनुदान‎ देण्यात आले. त्यातून शेतकऱ्यांना हक्काचे‎‎‎‎‎‎‎‎‎‎‎‎‎ पैसे मिळू लागले व अर्थकारणाला गती‎ आली. घोडेगाव येथे जनावरांच्या‎ बाजारात येणाऱ्या शेतकऱ्यांना‎ पशुपालनास प्रोत्साहन देणारे व मार्गदर्शन‎ करणारे विविध शिबिरे राबवून संघामार्फत‎ मदत करण्यात आली. महानंद, आरे,‎ तसेच गुजरातमधील ‘अमूल’ दूध संघांशी‎ करार केल्याने दूधउत्पादकांना वाढीव पैसे‎ मिळू लागले.

‎तिरमली, डवरी गोसावी, वाघवाले‎ अशा हातावर पोट असलेल्या व‎‎‎‎‎‎‎‎‎‎‎‎‎ अल्पभूधारक शेतकऱ्यांना जनावरे खरेदी‎ करण्यासाठी दूध संघामार्फत बिगरव्याजी‎ ४ ते ५ कोटी रुपयांचे वाटप करण्यात‎ आळे. त्यामुळे सर्वसामान्यांना दूध संघाचे‎ पाठबळ मिळून आर्थिक पत निर्माण झाली.‎ आता हक्काचा दूध संघ बंद झाल्याने दूध‎ उत्पादक व कामगारांसमोर मोठा प्रश्न‎ निर्माण झाला आहे. नेवासे तालुका दूध‎ संघातील ५० कर्मचारी बेरोजगार झाले‎ असून, त्यांच्या कुटुंबांचा रोजीरोटीचा प्रश्न‎ निर्माण झाला आहे.‎

मुळा शिक्षण संस्थेचीही तक्रार‎
आमदार गडाख हे राजकीय चक्रव्यूहात‎ अडकत चालल्याचे दिसते. दूध संघ बंद‎ झाला असून, आता मुळा शिक्षण संस्थाही‎ अडचणीत सापडली आहे. या संस्थेची‎ तक्रार शासनाकडे करण्यात आली असून,‎ लवकरच त्याचा निर्णय होणार असल्याचे‎ बोलले जाते. विरोधकांचा चक्रव्यूह भेदता‎ न आल्याने गडाख मोठ्या संकटात‎ सापडले आहेत.‎

कर्मचाऱ्यांना इतरत्र सेवेत घेऊ‎
आमदार गडाख यांनी तळहाताच्या‎ फोडाप्रमाणे जपलेला संघ बंद करताना‎ मनाला मोठ्या वेदना होत आहेत.‎ गावागावात दूध संकलन केंद्रांमार्फत दूध‎ संकलित होते. या दूधउत्पादकांची अडचण‎ झाली आहे. संघाच्या कर्मचाऱ्यांना इतरत्र‎ सेवेत घेऊन त्यांच्या रोजीरोटीचा प्रश्न‎ सोडवण्यासाठी गडाख प्रयत्नशील आहेत.‎ गणपत चव्हाण, अध्यक्ष, दूध संघ.‎