राष्ट्रीय विज्ञान दिन उत्साहात साजरा:सेठ नंदलाल धूत शाळेमध्ये विज्ञान दिन‎

श्रीराम कृष्ण एज्युकेशन फाउंडेशनच्या‎ संचलित सेठ नंदलाल धूत इंग्लिश‎ मीडियम स्कूल आणि श्री मोहनलाल‎ रामावतार मानधना ज्युनियर कॉलेज येथे‎ राष्ट्रीय विज्ञान दिन उत्साहात साजरा‎ झाला. यानिमित्त आठवडाभर विविध‎ स्पर्धा व उपक्रमांचे आयोजन करण्यात‎ आले होते.‎ तिसरी व चौथीच्या विद्यार्थ्यांनी विविध‎ उपक्रम सादर केले.

पाचवीसाठी‎ चित्रकला स्पर्धा, तर सहावीच्या‎ विद्यार्थ्यांनी सेन्सरी ऑर्गन्स रांगोळीच्या‎ माध्यमातून रेखाटले. सातवी, आठवी,‎ नववीच्या वर्गांसाठी प्रश्नमंजुषा झाली. या‎ स्पर्धेत लक्ष्मी हाऊस हा विजेता ठरला,‎ तर राणा प्रताप हाऊस उपविजेता घोषित‎ करण्यात आला. माणसाचे चंद्रावरील‎ पहिले पाऊल, तसेच डायनासोरचा जन्म‎ या वैज्ञानिक विषयावर शो झाला. शाळा‎ व परिसरातील ४०० विद्यार्थ्यांनी या शोचा‎‎‎‎‎‎‎‎‎‎‎ आनंद लुटला.

मुलांच्या दृष्टीने हा एक‎ वेगळाच अनुभव होता. शाळेत विज्ञान‎ शिक्षक व चित्रकला शिक्षकांनी मिळून‎ भव्य रॉकेट व पवनचक्कीची निर्मिती‎ केली होती. शाळेमध्ये येणाऱ्यांसाठी ते‎ मोठे आकर्षण ठरले. सकाळच्या‎ परिपाठात विद्यार्थ्यांनी पिरीओडिक टेबल‎ गाण्याद्वारे सादर केला. एका समूहाने‎ व्हॅलेन्सीवर आरती सादर केली.‎

या संपूर्ण उपक्रमांसाठी शाळेतील‎ विज्ञान विषयाचे शिक्षिका अंजना पंडित,‎ तबस्सुम, प्रांजली, किरण मोरे यांनी‎‎‎‎‎‎‎‎‎‎‎ मेहनत घेतली. तसेच प्रतिकृती निर्माण‎ करण्यासाठी चित्रकला शिक्षिका पूजा व‎ अश्विनी यांनी भरपूर परिश्रम घेतले. तृप्ती‎ व कांचनमाला यांनी प्राथमिकच्या‎ वर्गासाठी उपक्रमाला मार्गदर्शन केले.‎ आठवडाभरात घेतलेल्या सर्व स्पर्धांसाठी‎ सर्व शिक्षकांचे सहकार्य लाभले. या संपूर्ण‎ नियोजनासाठी शाळेच्या प्राचार्या राधिका‎ जेऊरकर व समन्वयक अंजना पंडित‎ यांनी मार्गदर्शन केले. या उपक्रमाबद्दल‎ संस्थेच्या सर्व पदाधिकाऱ्यांनी सर्व‎ शिक्षकांचे व विद्यार्थ्यांचे अभिनंदन केले.‎